مَرْکُسْ 9 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ1 اٛ وِعِٻٜ، «اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي لَامُ اَللَّه وَرْدِ اٜ بَوْطٜ؞» يٜىٰسُ وَنْغِي ندٜرْ مَنْغُ مُوطُمْ 2 غَطَ بَلْطٜ جٛوٜىٰغٛعٛ، سٜيْ يٜىٰسُ حٛشِّ بِيتُرُسْ، اٜ يَاکُبُ، اٜ يَحَيَ، اٛ يَارِٻٜ دٛوْ وٛنْدٜ حٛشّٜىٰرٜ تٛوْندٜ کَمْٻٜ تَنْ؞ سٜيْ نَنْدِ مَاکٛ وَيْلِتِي يٜىٰسٛ مَٻّٜ؞ 3 کٛلْتٜ مَاکٛ نغَرْتِ دَنٜىٰجٜ تَرْ؞ وَلَا غٛطّٛ بَاوَيْطٛ لَاٻِنِرَ کٛلْتٜ نٛنْ ندٜرْ دُونِيَارُ فُو؞ 4 سٜيْ اَنَّبِ اِلِيَ اٜ اَنَّبِ مُوسَ مبَنْغَنِٻٜ اٜ ٻٜ مٜدَّ اٜ يٜىٰسُ؞ 5 سٜيْ بِيتُرُسْ وِعِ يٜىٰسُ، «مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ طٛعٛ، وٛعٛيْرُ ندُ مَاطَ، وٛعٛيْرُ ندُ مُوسَ، وٛعٛيْرُ ندُ اِلِيَ؞» 6 بِيتُرُسْ نٛ دُلُّ کٛ وِعَتَ نغَمْ کَنْکٛ اٜ تٛکُّٻٜ يٜىٰسُ کٛرِيٻٜ ٻٜ کُلْتٛرِي نَاع سٜطَّ؞ 7 سٜيْ ندُولَ وَنْغِ سُدِّٻٜ، سٜيْ وٛنْدٜ حٛنٛنْدٜ پِوٛيِ ندٜرْ ندُولَ نغَنْ، وِعِ، «اٛعٛ وٛنِ ٻِطّٛ اَمْ مٛ نغِطُمِ؞ نَنٜىٰ کٛ اٛ وِعَتَعٛنْ!» 8 طٛنْ اٜ طٛنْ ٻٜ ندَارِ ٻٜ نغِعَايِ غٛطّٛ اٜ وٛنْدِ اٜ مَٻّٜ سٜيْ يٜىٰسُ تَنْ؞ 9 اٜ ٻٜ نجِڤّٛيٛو دَغَ دٛوْ حٛشّٜىٰرٜ ندٜنْ، سٜيْ يٜىٰسُ وَغِّنِٻٜ وِعِ تٛع ٻٜ مبِعَ کٛو مٛيٜ کٛ ٻٜ نغِعِ نَا غَطَ ٻِي نٜطّٛ اُمَّکٜ دَغَ مَيْدٜ؞ 10 نغَمْ نٛنْ ٻٜ اَلِ حَالَ کَنْ حَکُّندٜ مَٻّٜ، اٜ ٻٜ مٜدَّ دٛوْ مَعَنَ «اُمَّاکِ دَغَ مَيْدٜ؞» 11 سٜيْ ٻٜ پَمِمٛ، ٻٜ مبِعِ، «نغَمْ طُمٜ مٛودِٻّٜ اَتَّوْرَ اٜ مبِعَ دٛولٜ اَنَّبِ اِلِيَ اَرْتَ اَلْمَسِيحُ وَرْکِ؟» 12 يٜىٰسُ نٛوتِي، وِعِ، «غٛونغَ، اَنَّبِ اِلِيَ اَرْتَيْ وَرْکِ نغَمْ اٛ سِرْيٛو کٛو طُمٜ؞ نغَمْ طُمٜ طُمْ وِنْدِ وِيکِ دٛولٜ ٻِي نٜطّٛ تٛرّٛو نَاع سٜطَّ ندٜنْ اٛ وَݧٜىٰ؟ 13 اَمَّا اٜ مِ وِعَعٛنْ اِلِيَ يَادَکٜ وَرِي، يِمْٻٜ بٛو نغَطَنِيمٛ فُو کٛ ٻٜ نغِطِ، نٛنْ نٛ طُمْ وِنْدِرَا دٛوْ مَاکٛ؞» يٜىٰسُ يَمْطِتِنِي سُکَ مٛ غِنّٛلْ 14 ندٜ يٜىٰسُ اٜ تٛکُّٻٜمٛ نجٛتِّي تٛ تٛکُّٻٜمٛ کٛرِيٻٜ، سٜيْ ٻٜ نغِعِ يِمْٻٜ طُطْٻٜ اٜ ڤِلِيٻٜ؞ وٛٻّٜ مٛودِٻّٜ اَتَّوْرَ اٜ نغٜدّٛوتِرَ اٜ مَٻّٜ؞ 15 ندٜ فُو يِمْٻٜ ٻٜنْ نغِعِ يٜىٰسُ، ٻٜ کَيْطِنِ نَاع سٜطَّ، ٻٜ ندٛغِّ ٻٜ نجَحِ تٛ مَاکٛ نغَمْ ٻٜ کٛوْنَمٛ؞ 16 سٜيْ يٜىٰسُ پَمِٻٜ وِعِ، «دٛوْ طُمٜ نغٜدّٛوتِرْتٛنْ اٜ مَٻّٜ؟» 17 سٜيْ غٛعٛتٛ ندٜرْ يِمْٻٜ ٻٜنْ نٛوتِي وِعِ، «مٛودِبّٛ، مِ وَدَّنِيمَ ٻِطّٛ اَمْ غٛودُطٛ غِنّٛلْ؞ غِنّٛلْ نغٛلْ حَطِيمٛ اٛ مٜتَ؞ 18 فُو شَرٜلْ نغٜلْ غِنّٛلْ نغٛلْ نَنْغِمٛ، سٜيْ نغٛلْ دٛعَّمٛ تٛ لٜيْدِ، نغُوفٛ نغَطَ کَ وُرْتَاکِ اٜ حٛنْدُکٛ مَاکٛ، اٜ مٛ ݧٜرْپِندِرَ ݧِيپٜ مَاکٛ، ٻَنْدُ مَاکٛ وَرْتَ بٛ لٜکِّ؞ مِ تٛرَکٜ تٛکُّٻٜمَ مبُرْتِنَنغٛلْ، اَمَّا ٻٜ مبَاوَايِ؞» 19 يٜىٰسُ نٛوتِي وِعِ، «اٛنٛنْ يِمْٻٜ جَامَنُ طُعُمْ طُمْ حٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ نغَدَّنٜىٰيَمْ سُکَ اٛنْ؞» 20 سٜيْ ٻٜ نغَدِّمٛ؞ ندٜ غِنّٛلْ نغٛلْ يِعِ يٜىٰسُ، طٛنْ اٜ طٛنْ نغٛلْ وَطِ ٻَنْدُ سُکَ اٛنْ وَطِ کَ دِوْنُکِ، اٛ يَنِ تٛ لٜيْدِ، اٜ مٛ تَلِّتٛو، حٛنْدُکٛ مَاکٛ اٜ وُرْتِنَ نغُوفٛ؞ 21 سٜيْ يٜىٰسُ پَمِ ݧَاکٛ سُکَ اٛنْ، وِعِ، «دَغَ ندٜيٜ طُعُمْ فِي حٜٻِ سُکَ اٛنْ؟» ݧَاکٛ اٛنْ وِعِ، «دَغَ اٛ ڤَمَرٛ؞ 22 ندٜ طُطُّمْ اٜ نغٛلْ فَطَّمٛ ندٜرْ حِيتٜ کٛو ندٜرْ ندِيَمْ نغَمْ نغٛلْ وَرَمٛ؞ اَمَّا تَا وَاوَيْ وَطُکِ غٛطُّمْ، يُرْمِنَنْمِنْ مبَلَّامِنْ؞» 23 يٜىٰسُ وِعِمٛ، «نغَمْ طُمٜ مبِعَتَايَمْ، ‹تَا وَاوَيْ؟› کٛو طُمٜ طُمْ غَطٛتٛوطُمْ تٛ نٜطّٛ حٛولَکٜيَمْ؞» 24 طٛنْ اٜ طٛنْ سٜيْ ݧَاکٛ سُکَ اٛنْ پٜفْتِ حٛنٛنْدٜ وِعِ، «مِ حٛولَکٜمَ؞ وَلَّمْ مِ جَالٛو شِيَ حٛولَارٜ اَمْ!» 25 ندٜ يٜىٰسُ يِعِ يِمْٻٜ اٜ نغَرٛيَ اٜ دٛغُّدُ نغَمْ نغِعَ کٛ وَطَتَ، سٜيْ اٛ حَٻَنِ غِنّٛلْ نغٛلْ، اٛ وِعِنغٛلْ، «اَنْ، غِنّٛلْ کَطُنغٛلْ سُکَ اٛعٛ مٜتُکِ اٜ نَنُکِ، اٜ مِ وِعِمَا، وُرْتَ دَغَ ندٜرْ مَاکٛ! تَاع فُطُّتُ نَتُّکِمٛ!» 26 سٜيْ غِنّٛلْ نغٛلْ وُلِّ، نغٛلْ وَطِ سُکَ اٛنْ دِوْنِ نَاع سٜطَّ، ندٜنْ نغٛلْ وُرْتِي؞ سُکَ اٛنْ وَرْتِ بٛ مَيْطٛ، حَا مَا يِمْٻٜ طُطْٻٜ مبِعِ، «اٛ مَايِي؞» 27 اَمَّا يٜىٰسُ جٛغِي جُنْغٛ مَاکٛ اُمِّنِمٛ، اٛ دَرِي؞ 28 ندٜ يٜىٰسُ نَتِّ ندٜرْ وُرٛ، تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، «نغَمْ طُمٜ مِنٛنْ مِنْ مبَاوَايِ وُرْتِنْکِ غِنّٛلْ نغٛلْ؟» 29 يٜىٰسُ نٛوتِي، وِعِ، «اِرِ نغٛعٛلْ غِنّٛلْ نغٛلْ وُرْتَتَاکٛ سٜيْ اٜ دٛعَارٜ؞» يٜىٰسُ فُطِّتِي مٜتِي دٛوْ مَيْدٜ مُوطُمْ 30 سٜيْ يٜىٰسُ اٜ تٛکُّٻٜمٛ اَلِ طٛنْ ٻٜ ندِلِّ ٻٜ پِوِ ندٜرْ لٜيْدِ غَلِيلِ؞ يٜىٰسُ يِطَا کٛو مٛيٜ اَنْدَ تٛ ٻٜ نغٛنِ، 31 نغَمْ اٜ مٛ اٜکِّتِنَ تٛکُّٻٜمٛ، اٜ مٛ وِعَٻٜ، «طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ ٻٜ مبَرَمٛ؞ ندٜنْ تٛ اٛ وَرَامَ، غَطَ بَلْطٜ تَتِ اٛ اُمّٛتٛ؞» 32 اَمَّا ٻٜ ڤَامَايِ کٛ اٛ وِعِٻٜ، ندٜنْ اٜ ٻٜ کُلَ پَمُکِمٛ؞ مٛيٜ ٻُرِ مَنْغُ؟ 33 سٜيْ ٻٜ نجٛتِّي کَفَرْنَحُمْ؞ غَطَ يٜىٰسُ نَتِّي وُرٛ، اٛ پَمِ تٛکُّٻٜمٛ، اٛ وِعِ، «دٛوْ طُمٜ مٜدّٛتٛنْ دٛوْ طَتَلْ؟» 34 اَمَّا ٻٜ ندٜعِّتِ نغَمْ دٛوْ طَتَلْ ٻٜ نغٜدّٛوتِرِ دٛوْ مٛيٜ وٛنِ ٻُرْطٛ مَنْغُ ندٜرْ مَٻّٜ؞ 35 سٜيْ اٛ جٛوطِي، اٛ نٛدِّ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، «فُو غِطّٛ وَرْتَ مَوْطٛ، دٛولٜ اٛ وَرْتَ ڤَمَرٛ، ندٜنْ اٛ وَرْتَ مَشُّطٛ کٛو مٛيٜ؞» 36 سٜيْ اٛ حٛشِّ سُکَ ڤَمَرٛ، اٛ دَرْنِنغٜلْ شَکَ مَٻّٜ، اٛ وُوندِينغٜلْ، اٛ وِعِٻٜ، 37 «فُو جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ فُو جَٻُطٛيَمْ بٛو نَاع مِنْ تَنْ جَٻِ، اَمَّا جَٻِي لِلٛيْطٛيَمْ مَا؞» مٛ وَݧَايِعٜنْ فُو اٜ وٛنْدِ اٜ مٜىٰطٜنْ 38 سٜيْ يَحَيَ وِعِمٛ، «مٛودِبّٛ، مِنْ نغِعِ غٛطّٛ اٜ وُرْتِنَ غِنِّ ندٜرْ اِنْدٜ مَاطَ مِنْ کَطِمٛ، نغَمْ کَنْکٛ نَاع اٛ تٛکُّطٛعٜنْ؞» 39 اَمَّا يٜىٰسُ وِعِ، «تٛع اٛنْ کَطُمٛ، نغَمْ وَلَا غَطٛووٛ غٛطُّمْ کَيْطِنِيطُمْ ندٜرْ اِنْدٜ اَمْ ندٜنْ طٛنْ اٜ طٛنْ وِعَ حَالَ کَلُّکَ دٛوْ اَمْ؞ 40 نغَمْ فُو مٛ وَݧَايِعٜنْ اٜ وٛنْدِ اٜ مٜىٰطٜنْ؞ 41 اٜ مِ وِعَعٛنْ غٛونغَ، کٛو مٛيٜ حٛکِّعٛنْ ندِيَمْ ندٜرْ جَرْدُغٜلْ نجَرٛنْ نغَمْ اٛنٛنْ طُمْ ٻٜ اَلْمَسِيحُ، غٛونغَ اٛ دُلَّتَا حٜٻُکِ مبَرْجَارِ؞ کٛ وَدَّتَ حَکّٜ 42 «تٛ غٛطّٛ وَطِي غٛعٛتٛ ندٜرْ سُکَحٛيْ ڤَمَرٛيْ کٛعٛيْ کٛولِيکٛيْيَمْ وَطِي حَکّٜ، طُمْ ٻُرَنِيمٛ اٛ حَٻَّنٜىٰ کَاپَ نَمٛلْ مَنْغَ اٜ دَاندٜ طُمْ فَطَّمٛ ندٜرْ مبٜىٰلَ؞ 43 تٛ جُنْغٛ مَاطَ اٜ وَطُمَا نغَطَا حَکّٜ، اِتُّنغٛ؞ طُمْ ٻُرَنِيمَ نَتَّا وُرٛ اَللَّه جُنْغٛ وٛعٛتٛ دٛوْ طُمْ حُبٛمَا ندٜرْ وُرٛ حِيتٜ نغٜ ݧِفَتَا اٜ جُوطٜ طِطِ؞ 44-45 نٛنْ مَا تٛ کٛيْنغَلْ مَاطَ اٜ وَطُمَا نغَطَا حَکّٜ، اِتُّنغَلْ؞ طُمْ ٻُرَنِيمَ نَتَّا وُرٛ اَللَّه اٜ کٛيْنغَلْ غٛعٛتَلْ دٛوْ طُمْ حُبٛمَا ندٜرْ وُرٛ حِيتٜ اٜ کٛيْطٜ طِطِ؞ 46-47 تٛ بٛو حِتٜرٜ مَاطَ اٜ وَطُمَا نغَطَا حَکّٜ، اِتُّندٜ؞ طُمْ ٻُرَنِيمَ نَتَّا وُرٛ اَللَّه اٜ حِتٜرٜ غٛعٛ دٛوْ طُمْ حُبٛمَا ندٜرْ وُرٛ حِيتٜ اٜ غِتٜ طِطِ؞ 48 ندٜرْ حِيتٜ نغٜنْ ‹غِلْپِ ݧَامَيْطِٻٜ طِ مبَاتَتَا، حِيتٜ نغٜنْ بٛو نغٜ ݧِفَتَا؞› 49 «نٛنْ نٛ وٛنْدُ ݧَمْندُ دٛولٜ وَطَنٜىٰ لَمْطَمْ نغَمْ ندُ وٜلَ، نٛنْ مَا فُو يِمْٻٜ دٛولٜ نَتَّ حِيتٜ، وَاتٛ شَطٜىٰلٜ، نغَمْ نغِکُّ مَٻّٜ وَرْتَ بٛطُّمْ؞ 50 «لَمْطَمْ طُمْ فِي بٛطُّمْ، اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ نغَرْتٜىٰ بٛ لَمْطَمْ، وَاتٛ مبٜلْنِنْدِرٜىٰ ٻٜرْطٜ مٛوطٛنْ، ندٜنْ نجٛوطٜىٰ جَمْ حَکُّندٜ مٛوطٛنْ؞» |
© 2011, Bible League, All rights reserved.
Wycliffe Bible Translators, Inc.