مَاتِيُ 10 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَلِلَاٻٜ سَڤّٛ اٜ طِطٛ 1 سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، اٛ حٛکِّٻٜ بَوْطٜ وُرْتِنْکِ غِنِّ اٜ يَمْطِتِنْکِ يِمْٻٜ دَغَ کٛو اِرِ طُمٜ ݧَوُ اٜ شِيَ نجَمُ؞ 2 رَا اِنْطٜ لِلَاٻٜ سَڤّٛ اٜ طِطٛ ٻٜنْ: اَرَنْدٜ اٜ وٛودِ سِيمَنْ بِعٜتٜىٰطٛ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ ٻِي جَبَدِ، اٜ مِݧِرَاوٛ مَاکٛ يَحَيَ، 3 اٜ فِلِبُسْ، اٜ بَتِلٛومِ، اٜ تٛومَ، اٜ مَاتِيُ جَٻٛووٛ شٜىٰدٜ لٜيْدِ، اٜ يَاکُبُ ٻِي حَلْفَ، اٜ تَادِيُسْ، 4 اٜ سِيمَنْ کَنَنِيَنْکٜىٰجٛ، ندٜنْ اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞ يٜىٰسُ لِلِي تٛکُّٻٜمٛ سَڤّٛ اٜ طِطٛ 5 يٜىٰسُ لِلِ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، «تٛع اٛنْ نجَحُ تٛ يِمْٻٜ نَاع يَحُودَنْکٛعٜنْ؞ طٛنْمَا تٛع اٛنْ نَتُّ غَرِيجٜ سَمَارِيَنْکٛعٜنْ؞ 6 سٜيْ نِ نجَحٛنْ تٛ يِمْٻٜ اِسْرَاعِيلَ غَرْتُٻٜ بٛ بَالِ مَجُّطِ؞ 7 نجَحٜىٰ، نغَعَجِنَنٛنْٻٜ، مبِعٛنْ، ‹لَامُ اَللَّه وَرِي حَادٜ؞› 8 نجَمْطِتِنٜىٰ ݧَوْٻٜ، اُمِّنٜىٰ مَيْٻٜ دَغَ مَيْدٜ، نجَمْطِتِنٜىٰ غٛودُٻٜ ݧَوُ ݧَامٛوجُمْ لَرَلْ، مبُرْتِنَنٜىٰ يِمْٻٜ غِنِّ؞ مِ حٛکِّيعٛنْ بَوْطٜ يَمْطِتِنْکِ يِمْٻٜ شَاحُ، نغَمْ نٛنْ نجَمْطِتِنٜىٰ يِمْٻٜ شَاحُ؞ 9 تٛع اٛنْ نجٛغٛ شٜىٰدٜ جِينَارِ، کٛو شٜىٰدٜ اَجُرْفَارِ، کٛو شٜىٰدٜ نجَمْندِ مبٛطٜىٰرِ؞ 10 ندٜنْ تٛع اٛنْ نجَادُ اٜ جَکَارٜ، کٛو تٛغّٛوجٜ طِطِ، کٛو ڤَطٜ کٛيْطٜ طِطِ، کٛو سَوْرُ، نغَمْ کُوٛووٛ حَانِي حٛکّٜىٰ ݧَمْندُ؞ 11 «فُو غَرِيرِ کٛو غَرِيٜلْ ڤَمَرٜلْ تٛ نَتُّطٛنْ، طَٻِّتٜىٰ نٜطّٛ مٛ نغِکُّ بٛطُّمْ، نجٛوطٛوطٛنْ وُرٛ مَاکٛ نَا اٛنْ اَلِي وِغٜىٰرٜ ندٜنْ؞ 12 تٛ اٛنْ نَتِّي وُرٛ نغٛنْ، شِلْمِنٜىٰ؞ 13 تٛ يِمْٻٜ وُرٛ نغٛنْ نجَٻَّکٜعٛنْ بٛطُّمْ، اَلٜىٰ بَرْکَ مٛوطٛنْ جٛوطٛو دٛوْ مَٻّٜ؞ اَمَّا تٛ ٻٜ نجَٻَّاکِعٛنْ بٛطُّمْ، اَلٜىٰ بَرْکَ مٛوطٛنْ وَرْتَ تٛ مٛوطٛنْ؞ 14 فُو مٛ جَٻَّاکِعٛنْ، کٛو وَݧِ کٛ مبِيطٛنْ، تٛ اٛنْ مبُرْتَکٜ وُرٛ نغٛنْ کٛو غَرِيرِ ندِنْ، ڤِطّٜىٰ سٛلَّارٜ کٛيْطٜ مٛوطٛنْ؞ 15 اٜ مِ وِعَعٛنْ غٛونغَ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ اٜ غٛمٛورَ دٛوْ يِمْٻٜ غَرِيرِ ندِنْ طٛنْ؞ تٛرَّاجِ غَرَيْطِ 16 «رَطُّمْ، اٜ مِ لِلَعٛنْ بٛنٛ مبَالٛيْ شَکَ شَافَالِ؞ نغَمْ نٛنْ، ڤَامَنٜىٰ کٛعٜ مٛوطٛنْ نٛ بٛولٜ نغَطَتَ، طٛنْمَا نغَرْتٜىٰ ٻٜ کَلَّا بٛ ڤٛولِ؞ 17 ڤَامَنٜىٰ يِمْٻٜ، نغَمْ ٻٜ نجَارَيْعٛنْ يٜىٰسٛ مَوْٻٜ، ٻٜ ڤِيَعٛنْ ندٜرْ شُوطِ دٛعَارٜ مَٻّٜ، 18 ٻٜ نجَارَعٛنْ يٜىٰسٛ مَوْٻٜ لٜيْدِ اٜ لَامِيٻٜ، نغَمْ اٛنْ تٛکُّٻٜيَمْ اٛنْ کٛکَّيْٻٜ حَبَرُ اَمْ؞ نٛنْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ کَمْٻٜ اٜ يِمْٻٜ نَاع يَحُودَنْکٛعٜنْ؞ 19 فُو شَرٜلْ نغٜلْ طُمْ نَنْغِعٛنْ طُمْ يَارِعٛنْ يٜىٰسٛ لَامُ، تٛع اٛنْ نغَنُّ دٛوْ نٛ مٜتِرْتٛنْ، کٛو کٛ مبِعٛتٛنْ، نغَمْ ندٜرْ شَرٜلْ نغٜلْ طُمْ وِعَيْعٛنْ کٛ مبِعٛتٛنْ؞ 20 نغَمْ نَاع طُمْ اٛنٛنْ مٜتَتَ، اَمَّا طُمْ رُوحُ ݧَاکٛ مٛوطٛنْ مٛ دٛوْ مٜتَتَ ندٜرْ کٛنْدُطٜ مٛوطٛنْ؞ 21 «نٜطّٛ حٛکِّتِرَيْ سَکِرَاوٛ مُوطُمْ طُمْ وَرَمٛ، ݧَاکٛ مَا حٛکِّتِرَيْ ٻِطّٛ مُوطُمْ؞ ٻِٻّٜ اُمَّنْتٛ دَݧٛوٻٜ مَٻّٜ، ٻٜ نغَطَ طُمْ وَرَٻٜ؞ 22 کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا مُݧُطٛ حَا رٜعِرْدٜ حِسَيْ؞ 23 تٛ يِمْٻٜ تٛرِّيعٛنْ ندٜرْ وٛنْدِ غَرِيرِ، ندٛغّٜىٰ نجَحٛنْ وٛنْدِ غَرِيرِ؞ اٜ مِ وِعَعٛنْ غٛونغَ، کٛ نجَحِدٛنْ غَرِيجٜ اِسْرَاعِيلَ فُو، ٻِي نٜطّٛ وَرْتٛيَيْ؞ 24 «اٜکِّتٛتٛوطٛ ٻُرَتَا مٛودِبّٛ مُوطُمْ، مَشُّطٛ بٛو ٻُرَتَا جٜيْطٛمٛ؞ 25 اٜکِّتٛتٛوطٛ نَنَيْ بٜلْطُمْ تٛ وَرْتِي بٛ مٛودِبّٛ مُوطُمْ، مَشُّطٛ مَا نَنَيْ بٜلْطُمْ تٛ وَرْتِي بٛ جٜيْطٛمٛ؞ تٛ ٻٜ نٛدِّرِي جٛومُ وُرٛ اٛنْ بَعَلْجَبُلْ لَامِيطٛ غِنِّ، ٻٜ ٻُرَيْ وِيکِ کٛ حَلِّ دٛوْ ٻٜ وُرٛ نغٛنْ! کَانُطٛ حُلٜىٰ 26 «نغَمْ نٛنْ، تٛع اٛنْ کُلُ يِمْٻٜ، نغَمْ وَلَا غٛطُّمْ اٛمْبَاطُمْ طُمْ اٛمْتَتَاکٜ، نٛنْ مَا وَلَا شُوطِيطُمْ طُمْ سُورِتَتَاکٜ؞ 27 کٛ مبِيمِعٛنْ ندٜرْ ݧِوْرٜ، مبِعٜىٰکَ ݧَلَوْمَ، نٛنْ مَا کٛ نَنْطٛنْ تٛ اَمْ اٜ سُوطٜ، مبِعٜىٰکَ اٜ نجَيْرِ؞ 28 تٛع اٛنْ کُلُ وَرٛوٻٜ ٻَنْدُ نٜطّٛ، اَمَّا ٻٜ مبَاوَتَا وَرْکِ يٛنْکِ مَاکٛ؞ سٜيْ نِ کُلٛنْ اٛنْ طٛنْ بَاوَيْطٛ حَلْکَ ٻَنْدُ اٜ يٛنْکِ فُو ندٜرْ وُرٛ حِيتٜ؞ 29 نَاع شٛلٛيْ طِطٛيْ اٜ شٛورٜىٰ يَمْندٜ غٛعٛ؟ فُو اٜ نٛنْ وَلَا کٛو غٛعٛتٜلْ مَاکٛيْ بَاتَيْنغٜلْ نَا اٜ يِدّٜ ݧَاکٛ مٛوطٛنْ مٛ دٛوْ؞ 30 کٛو غَاسَ کٛعٜ مٛوطٛنْ مَا فُو کَ لِمَامَ؞ 31 نغَمْ نٛنْ، تٛع اٛنْ کُلُ، اٛنْ ٻُرِي شٛلٛيْ طُطْکٛيْ؞ جَٻُکِ اَلْمَسِيحُ يٜىٰسٛ يِمْٻٜ 32 «کٛو مٛيٜ جَٻُطٛيَمْ يٜىٰسٛ يِمْٻٜ، مِ جَٻَيْمٛ يٜىٰسٛ ݧَاکٛ اَمْ مٛ دٛوْ؞ 33 اَمَّا فُو غَݧُطٛيَمْ يٜىٰسٛ يِمْٻٜ، مِنْ مَا مِ وَݧَيْمٛ يٜىٰسٛ ݧَاکٛ اَمْ مٛ دٛوْ؞ مِ وَدَّايِ جٛنْدٜ جَمْ 34 «تٛع اٛنْ کَمّٛ مِ وَرٛيِي وَدَّنْکِ دُونِيَارُ جٛنْدٜ جَمْ؞ مِ وَرٛيَايِ نغَمْ وَدُّکِ جٛنْدٜ جَمْ، سٜيْ نِ حَوْرٜ؞ 35 مِ وَرِي نغَمْ مِ وَدَّ سٜنْدِرْکِ حَکُّندٜ ٻِطّٛ اٜ ݧَاکٛ مُوطُمْ، ٻِطّٛ دٜبّٛ اٜ مَدُوجٛ مُوطُمْ، دٜبّٛ بٛو اٜ اٜسِرَاوٛ مُوطُمْ دٜبّٛ؞ 36 ٻٜ نجٛوطٛدِطَا وُرٛ غٛعٛ ٻٜ نغَرْتَيْ وَݧْوَݧْٻٜ مَاطَ؞ 37 «کٛو مٛيٜ ٻُرِ يِطُکِ ݧَاکٛ مُوطُمْ کٛو مَدُوجٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ طٛنْمَا فُو ٻُرْطٛ يِطُکِ ٻِطّٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ 38 ندٜنْ فُو مٛ حٛشَّايِ غَافَانغَلْ مُوطُمْ تٛکِّيَمْ، اٛ فٛتَايِ وَرْتُکِ تٛکُّطٛيَمْ؞ 39 فُو غِطّٛ حِسْنُکِ يٛنْکِ مُوطُمْ، اٛ دُلَّيْکِ؞ اَمَّا فُو دُلُّطٛ يٛنْکِ مُوطُمْ نغَمْ اَمْ، اٛ حِسْنَيْکِ؞ مبَرْجَارِ 40 «فُو جَٻُطٛعٛنْ جَٻِييَمْ، طٛنْمَا فُو جَٻُطٛيَم جَٻِي اٛنْ طٛنْ لِلٛيْطٛيَمْ؞ 41 کٛو مٛيٜ جَٻُطٛ اَنَّبِيجٛ نغَمْ اٛ اَنَّبِيجٛ، اٛ حٜٻَيْ مبَرْجَارِ اَنَّبِيجٛ؞ ندٜنْ کٛو مٛيٜ جَٻُطٛ اَادِلِيجٛ نغَمْ اٛ اَادِلِيجٛ، اٛ حٜٻَيْ مبَرْجَارِ اَادِلِيجٛ؞ 42 کٛو مٛيٜ کٛکُّطٛ ٻُرْطٛ فَمْطُکِ ندٜرْ تٛکُّٻٜيَمْ ٻٜعٜ کٛو ندِيَمْ ڤٜوْطَمْ ندٜرْ جَرْدُغٜلْ نغَمْ اٛ تٛکُّطٛيَمْ، اٜ مِ وِعَعٛنْ غٛونغَ، اٛ دُلَّتَا حٜٻُکِ مبَرْجَارِ؞» |
© 2011, Bible League, All rights reserved.
Wycliffe Bible Translators, Inc.