اِبْرَانِيَنْکٛعٜنْ 9 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ

مَوْنِنْکِ اَللَّه ندٜرْ دُونِيَارُ

¹ اَلْکَوَلْ اَرَنْدٜوَلْ اٜ وٛودِ دٛوکَاجِ نٛ طُمْ مَوْنِنِرْتَ اَللَّه ندٜنْ اٜ وُرٛ نغٛ طُمْ ݧِٻِ ندٜرْ دُونِيَارُ نغَمْ مَوْنِنْکِمٛ طٛنْمَا؞

² لُکُرُ تِغَّامَ سٜنْدَا شُوطِ طِطِ؞ سُودُ اَرَنْدٜىٰرُ اٜ نٛدِّرٜىٰ وِغٜىٰرٜ شٜنِيندٜ؞ ندٜرْ مَيْرُ اٜ وٛودِ تٛ طُمْ رٜسَتَ فِتِلَارُ اٜ دَنْکِ اٜ بُرٛودِ طُمْ اُمْ حٛکَّتَ اَللَّه؞

³ غَطَ وُدٜرٜ شٜنْدُندٜ سُودُ ندُنْ اٜ وٛودِ وِغٜىٰرٜ بِعٜتٜىٰندٜ وِغٜىٰرٜ ٻُرْندٜ سٜنَاکِ؞

⁴ ندٜرْ وِغٜىٰرٜ ندٜنْ اٜ وٛودِ سَکِّرْدٜ جِينَارِ تٛ طُمْ وُلَتَ اُرْدٜ وٜلْندٜ، ندٜنْ اٜ وٛودِ اَکوَاتِيَ اَلْکَوَلْ شُدِّرَانغَ جِينَارِ؞ ندٜنْ ندٜرْ مَاغَ اٜ وٛودِ تُمُّغٜلْ غَطِرَانغٜلْ جِينَارِ؛ ندٜرْ مَغّٜلْ بٛو اٜ وٛودِ ݧَمْندُ بِعٜتٜىٰندُ مَنَّ؞ طٛنْمَا اٜ وٛودِ سَوْرُ هَرُونَ غَطُندُ ڤِنْدِ، اٜ اَلّٛوجٜ طِطِ طٜ کَاپٜ طٜ طُمْ وِنْدِ دٛوکَاجِ اَللَّه دٛوْ مَاجٜ؞

⁵ دٛوْ اَکوَاتِيَ نغَنْ بٛو اٜ وٛودِ کٜرُبَعٜنْ غَطِرَاٻٜ جِينَارِ کٛلّٛوٻٜ تٜدُّنغَلْ اَللَّه؞ بِيٜىٰلِ مَٻّٜ اٜ شُدِّ مَٻّٛودٜ اَکوَاتِيَ نغَنْ تٛ طُمْ يَافٛتٛو حَکّٜ؞ اَمَّا جٛونِ طُمْ وَاوَتَا طُمْ وِعَ کٛو طُمٜ نٛ وٛنْتِندِرِ دٛوْ مَاجُمْ؞

⁶ غَطَ طُمْ سِرْيَکٜ کٛو طُمٜ نٛنْ، اَرْدِيٻٜ دِينَ بٛو اٜ نَتَّ سُودُ اَرَنْدٜىٰرُ ندُ لُکُرُ نغَمْ ٻٜ کُوَ کُوغَلْ مَٻّٜ؞

⁷ اَمَّا مَوْطٛ مَوْٻٜ اَرْدِيٻٜ دِينَ تَنْ نَتَّتَ سُودُ طِطَوْرُ ندُ لُکُرُ طُمْ، ندٜنْ اٜ مٛ نَتَّندُ ندٜ غٛعٛ اٜ حِتَاندٜ؞ اٜ مٛ نَتِّدَ اٜ پِيپَمْ مَرْلٜ طٜ اٛ سَکَّنِ اَللَّه نغَمْ حٛورٜ مَاکٛ اٜ نغَمْ حَکّٜ طُمْ يِمْٻٜ نغَطِ اَنْدَا؞

⁸ نٛنْ رُوحُ اَللَّه حٛلِّرِعٜنْ وِيکِ لَاوٛلْ نَتُّکِ وِغٜىٰرٜ ٻُرْندٜ سٜنَاکِ مَٻِّتَاکَ تَوْ تٛ نِ لُکُرُ اَرَنْدٜجُمْ طُمْ اٜ طٛنْ دَرِي؞

⁹ طُعُمْ طُمْ مِسَالُ دٛوْ جَامَنُ طُعُمْ؞ طُمْ حٛلِّي حٛکُّکِ اَللَّه دٛکّٜ اٜ شَکِّرِ وَاوَتَا اِتُّکِ وَنَّارٜ حَکّٜ دَغَ ٻٜرْندٜ مَوْنِنٛووٛ اَللَّه؞

¹⁰ ݧَمْکِ اٜ يَرْکِ اٜ لٛوتٜ‑لٛوتٜ فٜىٰرٜ‑فٜىٰرٜ نغَمْ دِينَ، طُمْ دٛوکَاجِ نغَمْ ٻَنْدُ تَنْ، طِ طُمْ وَطِ نَا شَرٜلْ اَلْکَوَلْ کٜسَلْ وَطِي؞

¹¹ اَمَّا اَلْمَسِيحُ يَادَکٜ وَرْتِي مَوْطٛ مَوْٻٜ اَرْدِيٻٜ دِينَ دٛوْ اَلْکَوَلْ کٜسَلْ نغَلْ نغٛودُطٜنْ؞ اٛ نَتِّ لُکُرُ سٜنِيطُمْ ٻُرْطُمْ طُمْ ندٜنّٛ تٜدُّنغَلْ اٜ سٜنَاکِ؞ لُکُرُ طُمْ نَاع جُنْغٛ نٜطّٛ وَطِطُمْ، نَاع اِرِ طُمْ دُونِيَارُ؞

¹² اَلْمَسِيحُ بٛو نَتِّي ندٜرْ وِغٜىٰرٜ ٻُرْندٜ سٜنَاکِ ندٜ غٛعٛ تَنْ؞ ندٜ اٛ نَتِّ اٛ سَکَّنَ اَللَّه اٛ نَتِّدَايِ اٜ پِيپَمْ بٜعِ اٜ غَعِ، اَمَّا اٛ نَتِّدِي اٜ پِيپَمْ مَاکٛ؞ سَکُّکِ کِنْ حٜپِي حَا اَبَدَا؞ نٛنْ اٛ حٜٻِرَنِعٜنْ رِمْطِنْکِ کِ حَا اَبَدَا؞

¹³ پِيپَمْ بٜعِ اٜ پِيپَمْ غَعِ اٜ تٛوکَ وِيغٜ نغٜ طُمْ وُلِ، اٜ طُمْ مٜشَّنَطُمْ يِمْٻٜ ٻٜ دِينَ حٛلِّ ٻٜ لَاٻَا، اٜ طُمْ اِتَّ شِيَ لَٻْکِ مَٻّٜ طُمْ وَرْتِرَٻٜ لَٻّٜ ندٜرْ دِينَ؞

¹⁴ حَکّٛ پِيپَمْ اَلْمَسِيحُ طَمْ وَطَيْ کٛ ٻُرِ نٛنْ؞ بَرْکَ رُوحُ اَللَّه غٛنْطُمْ حَا اَبَدَا، اٛ حٛکِّي حٛورٜ مَاکٛ اٛ وَرْتِي شَکِّرِ ندِ وَلَا غٛطُّمْ کٛ حَانَا؞ پِيپَمْ مَاکٛ بٛو لَاٻِنَيْ ٻٜرْطٜ مٜىٰطٜنْ دَغَ کُوطٜ جَارَيْطٜ مَيْدٜ، نغَمْ کُوَنٜنْ اَللَّه مٛ يٛنْکِ؞

¹⁵ نغَمْ مَاجُمْ اَلْمَسِيحُ وٛنِ شِرْيِيطٛ اَلْکَوَلْ کٜسَلْ حَکُّندٜ اَللَّه اٜ يِمْٻٜ، نغَمْ ٻٜنْ طٛنْ ٻٜ اَللَّه نٛدِّ کٜٻَ ندٛنُ تَبِتَيْطُمْ طُمْ اٛ وَطِ اَلْکَوَلْ؞ مَيْدٜ مَاکٛ رِمْطِنِي يِمْٻٜ دَغَ حَکّٜ طُمْ ٻٜ نغَطِ شَرٜلْ نغٜلْ طُمْ حُوتِرْتَ اَلْکَوَلْ اَرَنْدٜوَلْ؞

¹⁶ تٛ نٜطّٛ وَطِي اَلْکَوَلْ حٛکُّکِ غٛطّٛ ندٛنُ، دٛولٜ طُمْ تَبِّتِنَ مَيْدٜ غَطُطٛ اَلْکَوَلْ نغَلْ؞

¹⁷ نغَمْ اَلْکَوَلْ ندٛنُ تَبِّتَتَا سٜيْ تٛ غَطُطٛنغَلْ مَايِي؛ تٛ اٜ مٛ فٛوفَ، نغَلْ حُوَتَا؞

¹⁸ کَنْجُمْ وَطِ کٛو اَلْکَوَلْ اَرَنْدٜوَلْ نغَلْ فُطَّايِ حُوُکِ سٜيْ اٜ پِيپَمْ؞

¹⁹ ندٜ مُوسَ وَعَجِنَنِ يِمْٻٜ فُو کٛ اَللَّه وِعِ طُمْ وَطَ غٛنْطُمْ ندٜرْ اَتَّوْرَ، اٛ حٛشِّي پِيپَمْ غَعِ اٜ بٜعِ، اٜ ندِيَمْ، ندٜنْ اٛ حٛشِّ حَاکٛ لٜکِّ بِعٜتٜىٰکِ حِسٛڤْ اٜ لٜىٰٻٜ مبَالَ بٛطٜىٰجٜ، اٛ سُووِطُمْ ندٜرْ مَاجَمْ، اٛ مِسِطَمْ دٛوْ دٜفْتٜرٜ اَتَّوْرَ اٜ دٛوْ فُو يِمْٻٜ؞

²⁰ اٛ وِعِ، ‏«‏طَعَمْ وٛنِ پِيپَمْ تَبِّتِنْطَمْ اَلْکَوَلْ نغَلْ اَللَّه وِعِعٛنْ تٛکّٛنْ؞»‏

²¹ نٛنْ مَا اٛ مِسِ پِيپَمْ طَمْ دٛوْ لُکُرُ طُمْ اٜ دٛوْ فُو کُوتِرْتٜىٰطُمْ ندٜرْ مَوْنِنْکِ اَللَّه؞

²² غٛونغَ، اَتَّوْرَ وِعِي حَادٜ کٛو طُمٜ اٜ لَاٻِنِرٜىٰ پِيپَمْ، ندٜنْ تٛ نَاع پِيپَمْ رُفَا، حَکّٜ يَافَتَاکٜ؞

اَلْمَسِيحُ وٛنِ شَکِّرِ اِتَّيْندِ حَکّٜ

²³ فُو فِي طُمْ طٛنْ طُمْ نَنْدُطُمْ اٜ غٛنْطُمْ تٛنْ دٛوْ غٛونغَجُمْ، دٛولٜ طُمْ لَاٻِنِرٜىٰ اٜ اِرِ کِنْ طٛنْ سَکُّکِ؞ اَمَّا فُو فِي غٛنْطُمْ تٛنْ دٛوْ، دٛولٜ طُمْ لَاٻِنِرٜىٰ اٜ سَکُّکِ ٻُرْکِ کِنْ تٛنْ؞

²⁴ نغَمْ اَلْمَسِيحُ نَتَّايِ ندٜرْ وِغٜىٰرٜ ٻُرْندٜ سٜنَاکِ ندٜ نٜطّٛ وَطِ نَنْدُندٜ اٜ وِغٜىٰرٜ ندٜ غٛونغَ غٛنْدٜ دٛوْ؞ اَمَّا دٛوْ اٜ حٛورٜ مَاجُمْ اٛ نَتِّ، جٛونِ تٛنْ اٛ وٛنِ يٜىٰسٛ اَللَّه نغَمْ مٜىٰطٜنْ؞

²⁵ اَلْمَسِيحُ نَتَّايِ دٛوْ نغَمْ وَطَ کَ سَکُّکِ حٛورٜ مُوطُمْ کٛو ندٜيٜ نٛ مَوْطٛ مَوْٻٜ اَرْدِيٻٜ دِينَ نَتِّدَتَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ کٛو ندٜيٜ حِتَاندٜ؞

²⁶ دَا طُمْ نٛنْ، دَا اَلْمَسِيحُ يَرِي تٛرَّ ندٜ طُطُّمْ دَغَ شَرٜلْ نغٜلْ دُونِيَارُ تَغَا؞ اَمَّا رَطُّمْ جٛونِ اٜ رٜعِرْدٜ دُونِيَارُ اٛ وَرِي ندٜ غٛعٛ تَنْ نغَمْ اٛ اِتَّ حَکّٜ بَرْکَ سَکُّکِ حٛورٜ مَاکٛ؞

²⁷ نٛنْ نٛ طُمْ سِرْيَنِي نٜطّٛ مَايَ ندٜ غٛعٛ، غَطَ مَيْدٜ ندٜنْ طُمْ وَطَنَيْمٛ کِيتَ،

²⁸ نٛنْ مَا اَلْمَسِيحُ سَکَّامَ ندٜ غٛعٛ نغَمْ اٛ اِتَّ حَکّٜ يِمْٻٜ طُطْٻٜ؞ اٛ وَرْتٛيَيْ غَرْتٛلْ طِطَٻٛلْ نَاع نغَمْ اٛ اِتَّ حَکّٜ، اَمَّا نغَمْ اٛ حِسْنَ ٻٜنْ طٛنْ کٜطِيٻٜمٛ؞