اِبْرَانِيَنْکٛعٜنْ 5 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ

¹ کٛو مٛيٜ مَوْطٛ مَوْٻٜ اَرْدِيٻٜ دِينَ شُٻَاطٛ دَغَ ندٜرْ يِمْٻٜ، طُمْ حٛکُّمٛ کُوغَلْ نغَمْ اٛ حُوَنَ اَللَّه نغَمْ مَٻّٜ، اٛ حٛکَّ اَللَّه شَکِّرِ اٜ دٛکّٜ نغَمْ حَکّٜ مَٻّٜ؞

² ندٜ کَنْکٛ مَا اٜ حٛورٜ مَاکٛ اٛ تَمْڤُطٛ اٜ طَتٜ طُطّٜ، اٛ وَاوَيْ اٛ وَادَ مُݧَلْ اٜ ٻٜ نغَلَا اَنْدَلْ اٜ شٜلُٻٜ لَاوٛلْ؞

³ ندٜنْ ندٜ کَنْکٛ اٜ حٛورٜ مَاکٛ اٛ تَمْڤُطٛ، دٛولٜ اٛ سَکَّنَ اَللَّه نغَمْ حَکّٜ يِمْٻٜ اٜ حَکّٜ مَاکٛ، کَنْکٛ مَا؞

⁴ وَلَا کٜٻَنَيْطٛ حٛورٜ مُوطُمْ مَنْغُ وَرْتُکِ مَوْطٛ مَوْٻٜ اَرْدِيٻٜ دِينَ، اَمَّا اَللَّه نٛدَّتَمٛ، نٛنْ نٛ نٛدِّرِ هَرُونَ؞

⁵ نٛنْ مَا اَلْمَسِيحُ نَاع کَنُمْ مَوْنِنِ حٛورٜ مُوطُمْ وَرْتِ مَوْطٛ مَوْٻٜ اَرْدِيٻٜ دِينَ، اَمَّا اَللَّه حٛکِّمٛ کُوغَلْ نغَلْ، وِعِمٛ، ‏«‏اَنْ اَ ٻِطّٛ اَمْ؞ حَنْدٜ مِ وَرْتِي ݧَاکٛ مَاطَ؞»‏

⁶ نٛ اٛ وِعِ ندٜرْ وٛنْدٜ اَايَارٜ، ‏«‏اَنْ اَ اَرْدِيطٛ دِينَ حَا اَبَدَا بٛ مَلْکِسَدِکْ؞»‏

⁷ شَرٜلْ کٛ يٜىٰسُ وٛنِ ندٜرْ دُونِيَارُ، اٛ وَطِي دٛعَاجٜ اٜ حٛنٛنْدٜ شٜمْبِنْدٜ اٜ غٛنْطِ اٛ تٛرَکٜ اَللَّه بَاوَيْطٛ حِسْنُکِمٛ دَغَ مَيْدٜ؞ طُمْ بٛو جَٻِي دٛعَارٜ مَاکٛ نغَمْ اٛ وَطِي کٛ اَللَّه وِعِ ندٜرْ کُلٛلْ اَللَّه؞

⁸ کٛو ندٜ اٛ ٻِطّٛ اَللَّه اٛ اٜکِّتَکٜ وَطُکِ کٛ اَللَّه وِعِ ندٜرْ تٛرَّ کَ اٛ يَرِ؞

⁹ ندٜ اٛ وَرْتِرَا کٜوْطٛ، اٛ وَرْتِي کٛکّٛووٛ فُو غَطٛوٻٜ کٛ اٛ وِعِ کِسْندَمْ تَبِتَيْطَمْ؞

¹⁰ اَللَّه نٛدِّيمٛ اٛ وَرْتَ مَوْطٛ مَوْٻٜ اَرْدِيٻٜ دِينَ بٛ مَلْکِسَدِکْ؞

وَغِّنْکِ دٛوْ سٜلُکِ لَاوٛلْ غٛونغَ

¹¹ دٛوْ حَالَ کَعَ اٜ مِنْ نغٛودِ فِي طُطُّمْ طُمْ مِنْ مبِعَتَ، اَمَّا اٜ طُمْ سَطِ فَمْتِنٜىٰکِ نغَمْ اٛنْ نجَاوَا فَامُکِ؞

¹² اٜ حَانِ جٛونِ دَا اٛنْ نغَرْتِي مٛودِٻّٜ، اَمَّا حَا جٛونِ سٜيْ تٛ غٛطّٛ اٜکِّتِنِيعٛنْ اٜکِّتِنٛلْ اَرَنْدٜوٛلْ نغٛلْ وٛلْدٜ اَللَّه؞ اٜ حَانِ ݧَامٛنْ ݧَمْندُ شٜمْبِنْدُ، اَمَّا حَا جٛونِ اٛنْ مُسِنَ؞

¹³ نغَمْ کٛو مٛيٜ مُسِنٛووٛ حَا جٛونِ اٛ ٻِنْغٜلْ، اٛ اَنْدَا اٜکِّتِنٛلْ اَادِلَاکُ؞

¹⁴ اَمَّا ݧَمْندُ شٜمْبِنْدُ بٛو، طُمْ ندُ مَوْنُٻٜ؞ کَمْٻٜ نغٛنِ حُوتِرْٻٜ حَکِّيلٛ مَٻّٜ کٛو ندٜيٜ حَا اٜ ٻٜ مبَاوِ فٜىٰرٛوتِرْکِ حَکُّندٜ کٛ وٛوطِ اٜ کٛ وٛوطَا؞