اِبْرَانِيَنْکٛعٜنْ 2 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ

کِسْندَمْ مَوْطَمْ

¹ نغَمْ مَاجُمْ دٛولٜ نغَطٜنْ فُو حَکِّيلٛ مٜىٰطٜنْ دٛوْ کٛ نَنْطٜنْ، نغَمْ تٛع شٜلٜنْ دَغَ تٛکُّکِطُمْ؞

² حَالَ کَ طُمْ مٜتِ دَغَ کٛنْدُطٜ مَلَاعِکَعٜنْ کَ تَبِّتِنَامَ، ندٜنْ کٛو مٛيٜ غَݧُطٛ تٛکَّکَ حٜٻِي تٛرَّ نٛ حَانَنِمٛ؞

³ تٛ طُمْ نٛنْ، نٛ وَطَتَ ندَطٜنْ تٛ اٜنْ نغَطَايِ حَکِّيلٛ مٜىٰطٜنْ دٛوْ کِسْندَمْ طَعَمْ مَوْطَمْ؟ جٛومِرَاوٛ اَرْتِي مٜتُکِ دٛوْ مَاجَمْ، ندٜنْ ٻٜنْ طٛنْ نَنْٻٜمٛ تَبِّتِنَنِيمِنْ وِيکِ طُمْ غٛونغَ؞

⁴ نٛنْ مَا اَللَّه تَبِّتِنِيطُمْ اٜ اَلَامَاجِ، اٜ کُوطٜ کَيْطِنِيطٜ فٜىٰرٜ‑فٜىٰرٜ، اٜ حٛکُّکِ رُوحُ مَاکٛ نٛنْ نٛ اٛ يِطِرِ؞

اَرْدِيطٛ کِسْندَمْ

⁵ دُونِيَارُ غَرَيْندُ ندُ مِنْ مٜتَتَ، نَاع مَلَاعِکَعٜنْ اَللَّه وَطِ لَامٛوندُ؞

⁶ اَمَّا اٜ وٛودِ اَايَارٜ تٛ طُمْ وِعِ، ‏«‏يَا اَللَّه، نٜطّٛ طُمْ طُمٜ حَا ݧُمَتَا دٛوْ مَاکٛ؟ ٻِي نٜطّٛ اٛ مٛيٜ حَا اَ فَامَنَمٛ؟

⁷ اَ لٜسْتِنِيمٛ لٜيْ مَلَاعِکَعٜنْ نغَمْ شَرٜلْ سٜطَّ، اَمَّا غَطَ طٛنْ اَ حٛکِّيمٛ تٜدُّنغَلْ اٜ مَنْغُ،

⁸ اَ وَطِي کٛو طُمٜ لٜيْ لَامُ مَاکٛ؞»‏ ندٜ اَللَّه وَطِ کٛو طُمٜ لٜيْ لَامُ مَاکٛ، اَلَايِ غٛطُّمْ طُمْ وَلَا لٜيْ لَامُ مَاکٛ؞ فُو اٜ نٛنْ، حَا جٛونِ اٜنْ نغِعَايِ کٛو طُمٜ فُو لٜيْ لَامُ مَاکٛ؞

⁹ شَرٜلْ سٜطَّ طُمْ حٛکِّ يٜىٰسُ مَنْغُ طُمْ حٜوْتَايِ طُمْ مَلَاعِکَعٜنْ؞ اَمَّا جٛونِ اٜنْ نغِعِي اٛ حٛکَّامَ تٜدُّنغَلْ اٜ مَنْغُ نغَمْ تٛرَّ مَيْدٜ کَ اٛ يَرِ، نغَمْ بَرْکَ يِدّٜ اَللَّه اٛ مَايَ نغَمْ کٛو مٛيٜ؞

¹⁰ اَللَّه تَغِ کٛو طُمٜ، کَنْکٛ فَامَنْتَ کٛو طُمٜ؞ اٛ وَطِي کٛ حَانِ ندٜ اٛ وَرْتِرِ يٜىٰسُ کٜوْطٛ لَاوٛلْ تٛرَّ کَ يَرِ، نغَمْ اٛ وَدَّ يِمْٻٜ طُطْٻٜ تٛ تٜدُّنغَلْ مَاکٛ؞ يٜىٰسُ وٛنِ مَٻُّتُطٛ لَاوٛلْ کِسْندَمْ تٛکِّنٛووٛٻٜ لَاوٛلْ نغٛلْ ٻٜ کِسَ؞

¹¹ لٛوتَنٛووٛ يِمْٻٜ حَکّٜ، کَنْکٛ اٜ ٻٜنْ طٛنْ لٛوتَنَاٻٜ ٻٜ فُو ݧَاکٛ مَٻّٜ اٛ غٛعٛتٛ؞ کَنْجُمْ وَطِ يٜىٰسُ نَنَتَا شٜمْتُطُمْ نٛدِّرْکِٻٜ مِݧِرَاٻٜ مُوطُمْ؞

¹² اٛ وِعِي اَللَّه، ‏«‏مِ وِعَيْ مِݧِرَاٻٜ اَمْ کُوطٜ طٜ نغَطَّا، مِ مَنْتٜتٜ ندٜرْ کَوْتَلْ مَٻّٜ؞»‏

¹³ کَدِنْ اٛ وِعِي، ‏«‏مِ حٛولٛتٛ اَللَّه؞»‏ ندٜنْ کَدِنْ اٛ وِعِي، ‏«‏رَمِّ طٛعٛ اٜ ٻِٻّٜ ٻٜ اَللَّه حٛکِّيَمْ؞»‏

¹⁴ ندٜ ٻِٻّٜ ٻٜنْ ٻٜ غٛودُٻٜ ٻَنْدُ اٜ پِيپَمْ، يٜىٰسُ اٜ حٛورٜ مُوطُمْ وَرْتِي نٜطّٛ بٛ مَٻّٜ؞ اٛ وَطُ نٛنْ نغَمْ بَرْکَ مَيْدٜ مَاکٛ اٛ حَلْکَ اٛنْ طٛنْ جٛغِيطٛ بَوْطٜ مَيْدٜ، وَاتٛ شٜيْطَنْ؞

¹⁵ نٛنْ اٛ يٛوفِرِ يِمْٻٜ ٻٜ کُلٛلْ مَيْدٜ حَٻِّ کٜىٰرٛلْ بَلْطٜ مَٻّٜ؞

¹⁶ اٜنْ تَبِّتِنِي نَاع مَلَاعِکَعٜنْ اٛ وَلِّ، اَمَّا ٻِٻّٜ ٻِٻّٜىٰجِ اِبْرَاهِمْ اٛ وَلِّ؞

¹⁷ نغَمْ مَاجُمْ دٛولٜ اٛ وَرْتِرَا نٜطّٛ اٜ کٛو نغٛلٜ لَاوٛلْ، نغَمْ اٛ وَرْتَ مَوْطٛ مَوْٻٜ اَرْدِيطٛ دِينَ مٛ غٛونغَ غٛودُطٛ يُرْمٜىٰندٜ ندٜرْ کُوغَلْ اَللَّه نغَمْ حَکّٜ يِمْٻٜ نجَافٜىٰ؞

¹⁸ ندٜ کَنْکٛ اٜ حٛورٜ مَاکٛ اٛ تٛرَّکٜ ندٜ اٛ فٛونْدَا، اٜ مٛ وَاوِ وَلُّکِ فٛوندٜتٜىٰٻٜ؞