اِبْرَانِيَنْکٛعٜنْ 13 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ

نٛ طُمْ وٜلْنِرَنْتَ اَللَّه ٻٜرْندٜ

¹ نغَطٜىٰ کَ يِطِندِرْکِ بٛ بَنْدِرَاٻٜ؞

² تٛع اٛنْ نغٜجُّتُ جَٻَّاکِ حٛٻّٜ؞ اٜ وٛودِ غَطُٻٜ نٛنْ نجَٻِّي مَلَاعِکَعٜنْ اَنْدَا؞

³ ݧُمٜىٰ دٛوْ شُرَاٻٜ ندٜرْ سُودُ شُرَلْ بٛ اٛنْ شُرِدَ اٜ مَٻّٜ؞ ݧُمٜىٰ دٛوْ تٛرّٜتٜىٰٻٜ، بٛ اٛنْ تٛرِّدٜىٰ اٜ مَٻّٜ؞

⁴ کٛو مٛيٜ مَوْنِنَ تٜىٰغَلْ، ندٜنْ تٛع غٛطّٛ وَلْدَ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ؞ بَلْدُطٛ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ، اَللَّه وَطَنَيْٻٜ کِيتَ؞

⁵ شٜنْدٜىٰ کٛعٜ مٛوطٛنْ اٜ يِدّٜ شٜىٰدٜ؞ مُݧٜىٰ دٛوْ کٛ نغٛودُطٛنْ، نغَمْ اَللَّه وِعِي، ‏«‏حَا اَبَدَا مِ اَلَتَامَ، حَا اَبَدَا مِ سٜنْدِرْتَا اٜ مَاطَ؞»‏

⁶ نغَمْ نٛنْ اٜ ٻٜرْندٜ غٛعٛ اٜنْ مبِعَيْ، ‏«‏جٛومِرَاوٛ وٛنِ بَلَّيْطٛيَمْ، مِ حُلَتَا؞ طُمٜ نٜطّٛ وَاوَتَ وَطَنْکِيَمْ؟»‏

⁷ ݧُمٜىٰ دٛوْ اَرْدِيٻٜعٛنْ، وَعَجِنَنْٻٜعٛنْ وٛلْدٜ اَللَّه؞ ݧُمٜىٰ دٛوْ نٛ ٻٜ نجٛوطٛرِي، اٜکِّتٜىٰ نٛ ٻٜ کٛولٛرِي اَللَّه؞

⁸ يٜىٰسُ اَلْمَسِيحُ اٜ طٛنْ نٛ وٛنْتِندِرِ کٜىٰݧَ اٜ حَنْدٜ اٜ حَا اَبَدَا؞

⁹ تٛع اٛنْ نجَٻُ اٜکِّتِنٛلْ نغٛلْ تٛکَّايِ لَاوٛلْ غٛونغَ مَجِّنَعٛنْ؞ اٜ طُمْ وٛوطِ يِدّٜ اَللَّه سٜمْبِطِنَ ٻٜرْطٜ مٜىٰطٜنْ، نَاع تٛکُّکِ دٛوکَاجِ دٛوْ ݧَمْندُ؞ اِرِ طِنْ طٛنْ دٛوکَاجِ نَفَنْتَا تٛکّٛوٻٜطِ؞

¹⁰ اَرْدِيٻٜ دِينَ کُوٛوٻٜ ندٜرْ لُکُرُ جٛومِرَاوٛ ٻٜ کٜٻَتَا ݧَامُکِ کٛ طُمْ سَکِّ دٛوْ سَکِّرْدٜ مٜىٰطٜنْ؞

¹¹ مَوْطٛ مَوْٻٜ اَرْدِيٻٜ دِينَ اٜ نَتِّدَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ اٛ سَکَّنَطَمْ اَللَّه نغَمْ حَکّٜ، اَمَّا ٻَلِّ مَرْلٜ طٜنْ اٜ نغُلٜىٰ غَطَ حٛطٛرْدٜ؞

¹² کَنْجُمْ وَطِ يٜىٰسُ مَا مَايِ غَطَ غَرِيرِ، نغَمْ اٛ لَاٻِنَ يِمْٻٜ دَغَ حَکّٜ مَٻّٜ بَرْکَ پِيپَمْ مَاکٛ؞

¹³ نغَمْ نٛنْ اٜنْ نجَحُ تٛ مَاکٛ غَطَ غَرِيرِ نجَرٜنْ سٜمْتٜىٰندٜ ندٜ اٛ يَرِ؞

¹⁴ نغَمْ اٜنْ نغَلَا غَرِيرِ تَبٛتٛوندِ ندٜرْ دُونِيَارُ ندُعُ، اَمَّا اٜنْ کٜطِي اٜنْ کَمِّي غَرِيرِ غَرَيْندِ؞

¹⁵ نغَمْ مَاجُمْ، بَرْکَ يٜىٰسُ اٜنْ مَنْتُ اَللَّه کٛو نغٜلٜ شَرٜلْ؞ مَنْتُکِ کِنْ وٛنِ کٛ شَکَّنْتٜنْمٛ، اٜنٜنْ بِعٛوٻٜ يٜىٰسُ وٛنِ جٛومِرَاوٛ؞

¹⁶ تٛع اٛنْ نغٜجُّتُ وَطُکِ کٛ وٛوطِ اٜ سٜنْدُدُکِ کٛ نغٛودُطٛنْ اٜ وٛٻّٜ، نغَمْ طُعُمْ کَنْجُمْ وٛنِ شَکِّرِ بٜلْنَنٛورِ اَللَّه ٻٜرْندٜ؞

¹⁷ تٛکّٜىٰ اَرْدِيٻٜعٛنْ نغَطٛنْ کٛ ٻٜ مبِعِعٛنْ؞ اٜ ٻٜ ڤَامَنَ يٛنْکِيجِ مٛوطٛنْ:‏ اَللَّه بٛو پَمَيْٻٜ دٛوْ نٛ ٻٜ ڤَامِرَنِعٛنْ؞ تٛکّٜىٰ کٛ ٻٜ مبِعِ نغَمْ ٻٜ نغَطَ کُوغَلْ نغَلْ ندٜرْ بٜلْطُمْ ٻٜرْندٜ نَاع ندٜرْ تٜدّٛرَلْ؞ تٛ طُمْ وَرْتِي تٜدّٛرَلْ، نٛنْ وَرْتَيْ وَلَا کٛ نَفَنْتَعٛنْ؞

¹⁸ نغَطٜىٰ کَ وَطَنْکِمِنْ دٛعَارٜ؞ مِنْ تَبِّتِنِي ٻٜرْطٜ اَمِنْ طٜ لَٻْطٜ، اٜ مِنْ نغِطِ وَطُکِ کٛ حَانِ ندٜرْ کٛو طُمٜ؞

¹⁹ اٜ مِ ٻٜيْدَ تٛرَاکِعٛنْ نغَطٛنْ دٛعَارٜ نغَمْ اَللَّه سٛعّٛيَيَمْ تٛ مٛوطٛنْ نَاع کٛ نٜىٰٻِ؞

دٛعَارٜ شَکِتِيندٜ

²⁰ اَللَّه جٛومُ جَمْ اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ لَاوٛلْ پِيپَمْ اَلْکَوَلْ تَبٛتٛونغَلْ؞ کَنْجُمْ وَطِ يٜىٰسُ وَرْتِ دُرٛووٛ بَالِ مَوْطٛ،

²¹ اٛ وَطَعٛنْ مبَاوٛنْ وَطُکِ کٛو نغَلٜ کُوغَلْ بٛنْغَلْ نغَلْ اٛ يِطِ نغَطٛنْ؞ اٛ وَرْتِرَعٛنْ کٛ وٜلْنَنْتَمٛ ٻٜرْندٜ بَرْکَ يٜىٰسُ اَلْمَسِيحُ؞ مَنْغُ تَبِّتَ تٛ يٜىٰسُ حَا اَبَدَا اَبَدِنْ؞ اَامِنْ؞

بٛلِيطٜ شَکِتِيطٜ

²² اٜ مِ تٛرٛوعٛنْ بَنْدِرَاٻٜ، نجَٻٜىٰ وَغِّنٛورٜ ندٜعٜ، نغَمْ طٜرٜوٛلْ نغٛعٛلْ نغٛلْ مبِنْدَنْمِعٛنْ نغٛلْ جُوتَا؞

²³ اٜ مِ يِطِ اَنْدٛنْ بَنْدِرَاوٛ مٜىٰطٜنْ تِمٛوتِ يٛوفَامَ دَغَ ندٜرْ سُودُ شُرَلْ؞ تٛ اٛ وَرِي تٛ اَمْ نَاع کٛ نٜىٰٻِ، مِ وَرْدَيْ اٜ مَاکٛ تٛ مٛوطٛنْ؞

²⁴ کٛوْنَنٛنْمِنْ فُو اَرْدِيٻٜ مٛوطٛنْ اٜ يِمْٻٜ اَللَّه حٛرِيٻٜ؞ تٛکُّٻٜ يٜىٰسُ غٛنْٻٜ لٜيْدِ اِتَالِيَ اٜ کٛوْنَعٛنْ؞

²⁵ اَللَّه بَرْکِطِنَعٛنْ، اٛنْ فُو؞