اِبْرَانِيَنْکٛعٜنْ 10 - اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ

¹ اَتَّوْرَ طُمْ نَنْدِنِرْطُمْ فُو فِي بٛطُّمْ غَرَيْطُمْ يٜىٰسٛ طٛعٛ، نَاع کَنْجُمْ وٛنِ فِي طُمْ اٜ حٛورٜ مَاجُمْ؞ نغَمْ نٛنْ سَکُّکِ کِ طُمْ وَطَتَ کٛو ندٜيٜ حِتَاندٜ کِ وَرْتِرْتَا ٻٜنْ طٛنْ ٻَدّٛتٛوٻٜ اَللَّه کٜىٰوُٻٜ؞

² دَا اٜ کِ وَاوِ وَرْتِرْکِٻٜ کٜىٰوُٻٜ، دَا ٻٜ اَلَايِ سَکَّنْکِ اَللَّه؟ دَا مَوْنِنٛوٻٜ اَللَّه ٻٜنْ لَاٻِنَامَ دَغَ حَکّٜ مَٻّٜ فُو، دَا ٻٜرْطٜ مَٻّٜ نغَنَّتَاٻٜ مبِعَٻٜ ٻٜ نغَطِي حَکّٜ؞

³ اَمَّا ندٜرْ سَکُّکِ کِعِ اٜ وٛودِ کٛ سِفْتٛرَنْتَ يِمْٻٜ حَکّٜ مَٻّٜ کٛو ندٜيٜ حِتَاندٜ؞

⁴ نغَمْ طُمْ وَطَتَاکٛ پِيپَمْ غَعِ اٜ پِيپَمْ بٜعِ اِتَّ حَکّٜ؞

⁵ کَنْجُمْ وَطِ شَرٜلْ کٛ اَلْمَسِيحُ نَتِّ دُونِيَارُ اٛ وِعِي اَللَّه:‏ ‏«‏نَاع سَکَّنٜىٰکِ اٜ حٛکّٜىٰکِ دٛکّٜ نغِطَّا، اَمَّا اَ سِرْيَنَکٜيَمْ ٻَنْدُ؞

⁶ نَاع شَکِّرِ غُلٜتٜىٰندِ اٜ شَکِّرِ نغَمْ اِتُّکِ حَکّٜ وٜلْنَنْتَمَ ٻٜرْندٜ؞

⁷ سٜيْ مبِيمِ، ‏‹‏يَا اَللَّه، رَمِّ طٛعٛ؞ مِ وَرِي نغَمْ مِ وَطَ کٛ نغِطَّا، نٛنْ نٛ طُمْ وِنْدِرَا ندٜرْ اَتَّوْرَ دٛوْ اَمْ؞›‏ »‏

⁸ اَرَنْدٜ اٛ وِعِي، ‏«‏اَ يِطَا سَکَّنٜىٰکِ اٜ حٛکّٜىٰکِ دٛکّٜ کٛو اٜ فُو کٛ طُمْ سَکَّتَ غُلٜتٜىٰطُمْ، کٛو کٛ طُمْ سَکَّتَ نغَمْ اِتُّکِ حَکّٜ، اَ نَنَتَا بٜلْطُمْ مَاجُمْ؞»‏ اٛ وِعِي طُعُمْ کٛو ندٜ اَتَّوْرَ وِعِي طُمْ سَکّٜىٰ؞

⁹ ندٜنْ اٛ وِعِ، ‏«‏رَمِّ طٛعٛ، مِ وَرِي نغَمْ مِ وَطَ کٛ نغِطَّا؞»‏ اَللَّه اِتِّي سَکُّکِ اَرَنْدٜحِ نغَمْ اٛ وَدَّ سَکُّکِ طِطَٻِ، وَاتٛ اَلْمَسِيحُ؞

¹⁰ ندٜ يٜىٰسُ اَلْمَسِيحُ وَطِي کٛ اَللَّه يِطِ اٛ وَطَ، اٜنْ فُو اٜنْ لَاٻِنَامَ دَغَ حَکّٜ بَرْکَ سَکُّکِ حٛورٜ مَاکٛ ندٜ غٛعٛ تَنْ نغَمْ حَا اَبَدَا؞

¹¹ کٛو مٛيٜ اَرْدِيطٛ دِينَ اٜ حُوَ کُوغَلْ مُوطُمْ کٛو ندٜيٜ ݧَلْندٜ، اٜ مٛ سَکَّ سَکُّکِ اِرِ غٛعٛ کٛو ندٜيٜ؞ سَکُّکِ کِنْ بٛو اِتَّتَا حَکّٜ حَا اَبَدَا؞

¹² اَمَّا اَلْمَسِيحُ سَکِّي حٛورٜ مُوطُمْ ندٜ غٛعٛ نغَمْ حَکّٜ يِمْٻٜ؞ کِ بٛو حٜپِي حَا اَبَدَا؞ غَطَ اٛ وَطِي نٛنْ، اٛ جٛوطِي تٛ جُنْغٛ ݧَامٛ نغٛ اَللَّه؞

¹³ دَغَ نغٜلْ تٛنْ شَرٜلْ اٜ مٛ حٜطٛو نَا اَللَّه وَرْتِرِي وَݧْوَݧْٻٜ مَاکٛ تٛ اٛ يٛوَتَ کٛيْطٜ مَاکٛ؞

¹⁴ اٜ سَکُّکِ غٛعٛتِ کِنْ طٛنْ، اٛ وَرْتِرِي ٻٜنْ طٛنْ لَاٻِنَاٻٜ دَغَ حَکّٜ مَٻّٜ کٜىٰوُٻٜ حَا اَبَدَا؞

¹⁵ رُوحُ اَللَّه مَا اٜ حٛکَّعٜنْ شٜيْدَ دٛوْ مَاجُمْ؞ اَرَنْدٜ طُمْ وِعِي،

¹⁶ ‏«‏جٛومِرَاوٛ وِعِي، ‏‹‏رَا اَلْکَوَلْ نغَلْ نغَادَيْمِ اٜ مَٻّٜ ندٜرْ بَلْطٜ غَرَيْطٜ:‏ مِ وَطَيْ دٛوکَاجِ اَمْ ندٜرْ ٻٜرْطٜ مَٻّٜ، مِ وِنْدَطِ ندٜرْ ݧُمٛوجِ مَٻّٜ؞›‏ »‏

¹⁷ ندٜنْ اٛ ٻٜيْدِ وِيکِ، ‏«‏مِ فُطِّتَتَا مِ سِفْتٛرَ حَکّٜ مَٻّٜ اٜ کُوطٜ مَٻّٜ کَلُّطٜ؞»‏

¹⁸ ندٜنْ تٛ طُعُمْ يَافَامَ، وَلَا وٛکِّ سَکُّکِ کَدِنْ نغَمْ اِتُّکِ حَکّٜ؞

اٜنْ نجَحُ حَادٜ اَللَّه

¹⁹ نغَمْ نٛنْ، بَنْدِرَاٻٜ اَمْ، اٜنْ نغٛودِ سٜمْبٜ ٻٜرْندٜ نَتُّکِ وِغٜىٰرٜ ٻُرْندٜ سٜنَاکِ بَرْکَ پِيپَمْ يٜىٰسُ؞

²⁰ اٛ مَٻِّتَنِيعٜنْ لَاوٛلْ کٜسٛلْ، جَارَيْنغٛلْ کِسْندَمْ نَتِّرْتٜىٰنغٛلْ غَطَ وُدٜرٜ شٜنْدُندٜ سُودُ جٛومِرَاوٛ، وَاتٛ نَتِّرْتٜىٰنغٛلْ ٻَنْدُ مَاکٛ؞

²¹ اٜنْ نغٛودِ اَرْدِيطٛ دِينَ مَوْطٛ ڤَامَنٛووٛ وُرٛ اَللَّه؞

²² نغَمْ نٛنْ اٜنْ نجَحُ حَادٜ اَللَّه اٜ ٻٜرْندٜ غٛعٛ، اٜ حٛولَارٜ تَبُّتُندٜ، اٜ ٻٜرْطٜ مٜىٰطٜنْ لَاٻِنَاطٜ دَغَ ݧُمٛ کَلُّنغٛ، اٜ ٻَلِّ لٛوتِرَاطِ ندِيَمْ لَٻْطَمْ؞

²³ کَمُّندٜ ندٜ مبِعٜتٜنْ اٜنْ نغٛودِ، اٜنْ نجٛغَندٜ بٛطُّمْ، نغَمْ اٛنْ طٛنْ غَطُطٛ اَلْکَوَلْ اٛ حٜبِّنَيْنغَلْ؞

²⁴ اٜنْ نغَطُ حَکِّيلٛ مٜىٰطٜنْ دٛوْ نٛ مبَلِّندِرْتٜنْ نغَمْ کٛلّٜنْ يِدّٜ اٜ وَطُکِ کُوطٜ بٛطّٜ؞

²⁵ تٛع اٜنْ اَلُ حَوْرُتُکِ نٛ وٛٻّٜ مبٛووِ وَطُکِ؞ اَمَّا اٜنْ شٜمْبِطِندِرْ، اٜنْ ٻٜيْدُ وَطُکِ نٛنْ ندٜ اٛنْ اَنْدِ ݧَلْندٜ ندٜ يٜىٰسُ وَرْتٛيْتَ اٜ ٻَدّٛيٛو؞

²⁶ تٛ اٜنْ نغَطِي کَ وَطُکِ حَکّٜ اٜ يِدّٜ ٻٜرْندٜ مٜىٰطٜنْ غَطَ اٜنْ اَنْدِ غٛونغَ، وَلَا وٛکِّ سَکُّکِ اِتَّيْکِ حَکّٜ مٜىٰطٜنْ؞

²⁷ اَمَّا کٛ حٛرِي وٛنِ کٜطٛوطٜنْ کِيتَ اَللَّه ندٜرْ کُلٛلْ، کِيتَ غَرَيْکَ اٜ حِيتٜ کَلُّنغٜ کَلْکَيْنغٜ ٻٜنْ طٛنْ غَݧُٻٜ اَللَّه؞

²⁸ کٛو مٛيٜ غٜوُطٛ دٛوکَ مُوسَ، اٛ وَرَامَ يُرْمٜىٰندٜ وَلَا دٛوْ شٜيْدَ يِمْٻٜ طِطٛ کٛو تَتٛ تَبِّتِنْٻٜ کٛ اٛ وَطِ؞

²⁹ تٛ نٜطّٛ وَݧِي ٻِطّٛ اَللَّه، کَدِنْ اٛ وَرْتِرِي پِيپَمْ اَلْکَوَلْ اَللَّه لَاٻِنْطَنْمٛ دَغَ حَکّٜ وَلَا کٛ نَفِ، طٛنْمَا اٛ حُطِ رُوحُ اَللَّه کٛلَّيْطُمْ يِدّٜ، اِرِ طُمٜ بٛنٜ کَلُّطُمْ حَانِ اٛ يَرَ؟ اٛ يَرَيْ بٛنٜ کَلُّطُمْ ٻُرْطُمْ طُمْ غٜوٛووٛ دٛوکَ يَرَتَ؞

³⁰ نغَمْ اٜنْ اَنْدِ اٛنْ طٛنْ بِيطٛ، ‏«‏وَاتَاکِ طُمْ کِ اَمْ، مِ وَاتَنَيْ کٛو مٛيٜ کٛ وَطِ؞»‏ طٛنْمَا اٛ وِعِي، ‏«‏جٛومِرَاوٛ وَطَنَيْ يِمْٻٜ مُوطُمْ کِيتَ؞»‏

³¹ طُمْ فِي کُلْنِيطُمْ نٜطّٛ نَتَّ جُنْغٛ اَللَّه مٛ يٛنْکِ؞

³² اَمَّا شِفْتٛرٜىٰ بَلْطٜ اَرَنْدٜىٰجٜ طٜ طُمْ فَمْتِنِعٛنْ دٛوْ اَلْمَسِيحُ؞ اٛنْ مُݧِي ندٜرْ يَرْکِ تٛرَّ کَلُّکَ؞

³³ بَنْݧٜ اٜ طُمْ سٜمْتِنَعٛنْ يٜىٰسٛ يِمْٻٜ، اٜ طُمْ حُطَعٛنْ، بَنْݧٜ طُمْ تٛرَّعٛنْ، ندٜنْ بَنْݧٜ اٛنْ مبَلَّ جَرٛوٻٜ تٛرَّ اِرِ کَ مٛوطٛنْ؞

³⁴ اٛنْ نجُرْمِنَنِي شُرَاٻٜ، ندٜنْ ندٜ طُمْ تٜىٰتَنِعٛنْ کٛ نغٛودُطٛنْ، اٛنْ نجَٻِي کٛ طُمْ وَطَنِعٛنْ اٜ وٜلْوٜلٛ؞ نغَمْ اٛنْ اَنْدِ اٛنْ نغٛودِ غٛطُّمْ ٻُرْطُمْ وٛوطُکِ تَبِتَيْطُمْ حَا اَبَدَا؞

³⁵ نغَمْ نٛنْ تٛع اٛنْ ڤَطُّ سٜمْبٜ ٻٜرْطٜ مٛوطٛنْ؞ طُمْ وَدَّنَيْعٛنْ مبَرْجَارِ مَوْندِ؞

³⁶ اٜ حَانِ مُݧٛنْ نغَمْ نغَطٛنْ کٛ اَللَّه يِطِ، کٜٻٛنْ کٛ اٛ وَطِ اَلْکَوَلْ؞

³⁷ نغَمْ اَايَارٜ وِعِي، ‏«‏نَاع کٛ نٜىٰٻِ، اٛنْ طٛنْ غَرَيْطٛ وَرَيْ؛ اٛ وٛنَّتَا شَرٜلْ؞

³⁸ نٜطّٛ اَمْ اَادِلِيجٛ اٛ جٛوطٛتٛ لَاوٛلْ حٛولَاکِيَمْ؛ اَمَّا تٛ اٛ يَاتِرِي غَطَ، مِ نَنَتَا بٜلْطُمْ مَاکٛ؞»‏

³⁹ اَمَّا اٜنٜنْ نَاع اٜنْ ندٜرْ يَاتِرْٻٜ غَطَ کَلْکِ؞ اٜنٜنْ اٜنْ ندٜرْ کٛولِيٻٜ اَللَّه کِسِ؞