Vakatekivu 6 - Ai Vola Tabu (Vakadewa Makawa Vakavoutaki 2021)

Nai Valavala Ca ni Tamata

¹ A sa yaco, ni ra sa tubu na tamata me ra lewe vuqa mai e dela i vuravura, a sa sucu na luvedra yalewa,

² sa qai raici ira na nodra goneyalewa na tamata ko ira na luve ni Kalou ni ra sa matavinaka; a ra sa la'ki vakawati kei ira kecega oqo era sa vinakata.

³ A sa kaya ko Jiova, “A noqu Yalo Tabu ena sega ni tu vakadua vua na tamata me sega ni mudu, ka ni sa vakalewe talega ko koya; ia na nona bula ena dua na drau ka ruasagavulu na yabaki.”

⁴ A sa tiko e vuravura e na gauna ko ya eso na Nefilimi (a tamata yagolevu sara) — e muri talega — ko ira ka vakasucumi e na gauna era veiyacovi kina kei ira na nodra goneyalewa na tamata ko ira na luve ni Kalou. Oqo ko ira ka yaco me ra tamata kaukauwa, ka ra tamata rogo eliu.

⁵ A sa raica ko Jiova ni sa ka levu nai valavala ca ni tamata e vuravura, io sa ca walega e na veisiga kecega nai naki kecega kei na nanuma ni lomana.

⁶ A sa veivutuni ko Jiova ni sa bulia na tamata e vuravura, a sa rarawa kina na lomana.

⁷ A sa kaya ko Jiova, “Au na vakarusa mai na vuravura na tamata ka'u sa bulia; io na tamata kei na manumanu e yavai va, kei na ka sa qasi voli, kei na manumanu vuka, ni'u sa veivutuni ni'u sa buli ira.”

⁸ Ia ko Noa sa kune loloma e na mata i Jiova.

Sa Vakalomavinakataka na Kalou ko Noa

⁹ Oqo nai tukutuku kei Noa. A tamata yalododonu ko Noa, ka sega ni cala e na nona tabatamata; a rau sa daulako vata kei na Kalou ko Noa.

¹⁰ A sa sucu na luve i Noa e le tolu na tagane, ko Semi, ko Ame, kei Jefeca.

¹¹ A sa ka vakasisila ko vuravura e na mata ni Kalou, a sa sinai e nai valavala kaukauwa ko vuravura.

¹² A sa raici vuravura na Kalou, ka raica, sa vakasisila; ni sa ka vakasisila na nodra i valavala na tamata kecega e vuravura.

¹³ A sa kaya vei Noa na Kalou, “Sa rairai mai ki vei au nai cavacava ni tamata kecega; ni ra sa vakasinaiti vuravura e nai valavala kaukauwa; ka raica, ka'u na vakarusai ira vata kei vuravura.

¹⁴ Mo taya e dua na nomu waqa e na kau na kofera; mo cakava me so na loqi e na waqa, ka boroya e loma, e taudaku talega e na drega.

¹⁵ Ia mo cakava vakaoqo: a kena balavu ni waqa e tolu na drau na kiupiti (133 na mita), a kena raraba e limasagavulu na kiupiti (22 na mita), a kena cecere e tolusagavulu na kiupiti (13 na mita).

¹⁶ Mo cakava e dua na katuba e na waqa, ka vakaotia me dua na kiupiti na kena raraba ki cake; ia na katuba ni waqa mo cakava e na yasa ni waqa; ia mo cakava na loma ni waqa me taba tolu.

¹⁷ Ka raica, koi au, ka'u sa kauta mai e dua na waluvu ki vuravura, me vakawabokotaka na ka kecega e ruku i lomalagi sa tu kina nai cegu ni bula; ia ena mate na ka kecega sa tiko e vuravura.

¹⁸ Ia ka'u na vakataudeitaka vei iko na noqu veiyalayalati; ko na vodo ki na waqa; ko iko, kei na luvemu tagane, kei na watimu, kei na watidratou na luvemu.

¹⁹ Ka rua na manumanu e na mataqali manumanu kecega e na ka kecega sa bula, mo vakavodoka ki loma ni waqa, ka mo vakabulai ira vata kei iko; me dua na ka tagane ka dua na ka yalewa.

²⁰ Na manumanu vuka me vaka na kedra mataqali, kei na manumanu e yavai va me vaka na kedra mataqali; a ka kecega sa qasi voli e vuravura me vaka na kedra mataqali; sa yarua e na mataqali kecega era na curu kivei iko mo vakabulai ira.

²¹ Ia mo kauta vata eso e na kakana kecega sa daulaukana, ia mo kumuna vata vei iko; ia ena kemu kakana kei na kedra talega.”

²² A sa cakava ko Noa me vaka na ka kecega sa vakarota vua na Kalou; io, sa cakava vakakina.