Vakatekivu 5 - Ai Vola Tabu (Vakadewa Makawa Vakavoutaki 2021)

Na Kawa i Atama me Yaco vei Noa

¹ Oqo nai vola ni kawa i Atama. E na siga sa bulia kina na tamata na Kalou, sa buli koya me ucuya na Kalou;

² sa buli rau me dua na tagane ka dua na yalewa; a sa vosavakalougatataki rau, ka vakatokai rau me “Tamata” e na siga sa buli rau kina.

³ A sa bula ko Atama ka dua na drau ka tolusagavulu na yabaki, a sa qai sucu e dua na luvena tagane a sa ucui koya ka sai tovo vata kaya, ka sa vakayacani koya ko Seci.

⁴ Ia ni sa sucu ko Seci, sa bula tiko ko Atama ka walu na drau na yabaki; a sa sucu eso tale na luvena tagane kei na luvena yalewa.

⁵ Ia na yabaki kecega ka bula kina ko Atama sa ciwa na drau ka tolusagavulu na yabaki; a sa qai mate.

⁶ A sa bula ko Seci ka dua na drau ka lima na yabaki, a sa qai sucu na luvena ko Inosi.

⁷ Ia ni sa sucu ko Inosi, sa bula tiko ko Seci, ka walu na drau ka vitu na yabaki, a sa sucu eso tale na luvena tagane kei na luvena yalewa.

⁸ Ia na yabaki kecega ka bula kina ko Seci sa ciwa na drau ka tinikarua na yabaki; a sa qai mate.

⁹ A sa bula ko Inosi ka yabaki ciwasagavulu, a sa qai sucu na luvena ko Keinana.

¹⁰ Ia ni sa sucu ko Keinana, sa bula tiko ko Inosi, ka yabaki walu na drau ka tinikalima, a sa sucu na luvena tagane kei na luvena yalewa.

¹¹ Ia na yabaki kecega sa bula kina ko Inosi sa ciwa na drau ka lima na yabaki; a sa qai mate.

¹² A sa bula ko Keinana ka yabaki vitusagavulu, a sa qai sucu na luvena ko Meelelieli.

¹³ Ia ni sa sucu ko Meelelieli, sa bula tiko ko Keinana, ka yabaki walu na drau ka vasagavulu, a sa sucu eso tale na luvena tagane kei na luvena yalewa.

¹⁴ Ia na yabaki kecega sa bula kina ko Keinana sa ciwa na drau ka tini na yabaki; a sa qai mate.

¹⁵ A sa bula ko Meelelieli ka yabaki onosagavulu ka lima, a sa qai sucu ko Jereti na luvena.

¹⁶ Ia ni sa sucu ko Jereti, sa bula tiko ko Meelelieli, ka yabaki walu na drau ka tolusagavulu, a sa sucu eso tale na luvena tagane kei na luvena yalewa.

¹⁷ Ia na yabaki kecega sa bula kina ko Meelelieli sa walu na drau ka ciwasagavulu ka lima na yabaki; a sa qai mate.

¹⁸ A sa bula ko Jereti ka yabaki dua na drau ka onosagavulu ka rua, ka sa qai sucu ko Inoke na luvena.

¹⁹ Ia ni sa sucu ko Inoke, sa bula tiko ko Jereti ka yabaki walu na drau, a sa sucu eso tale na luvena tagane kei na luvena yalewa.

²⁰ Ia na yabaki kecega sa bula kina ko Jereti sa ciwa na drau ka onosagavulu ka rua na yabaki; a sa qai mate.

²¹ A sa bula ko Inoke ka yabaki onosagavulu ka lima, ka sa qai sucu ko Mecusela na luvena.

²² A rau sa daulako vata kei na Kalou ko Inoke, ni sa sucu ko Mecusela, ka yabaki tolu na drau, a sa sucu eso tale na luvena tagane kei na luvena yalewa.

²³ Ia na yabaki kecega sa bula kina ko Inoke sa tolu na drau ka onosagavulu ka lima na yabaki.

²⁴ A rau sa daulako vata kei na Kalou ko Inoke; a sa qai yali, ka ni sa kauti koya yani na Kalou.

²⁵ A sa bula ko Mecusela ka dua na drau ka walusagavulu ka vitu na yabaki, a sa qai sucu ko Lemeki na luvena.

²⁶ Ia ni sa sucu ko Lemeki, sa bula tiko ko Mecusela, ka yabaki vitu na drau ka walusagavulu ka rua, a sa sucu eso tale na luvena tagane kei na luvena yalewa.

²⁷ Ia na yabaki kecega sa bula kina ko Mecusela sa ciwa na drau ka onosagavulu ka ciwa na yabaki; a sa qai mate.

²⁸ A sa bula ko Lemeki ka yabaki dua na drau ka walusagavulu ka rua, a sa sucu e dua na luvena tagane;

²⁹ a sa vakayacani koya ko Noa, ni sa kaya, “O koya oqo ena vakacegui keda e na noda oca kei na cakacaka ni ligada, e na vuku ni qele sa cudruva ko Jiova.”

³⁰ Ia ni sa sucu ko Noa, sa bula tiko e muri ko Lemeki, ka lima na drau ka ciwasagavulu ka lima na yabaki, ka sa sucu eso tale na luvena tagane kei na luvena yalewa.

³¹ Ia na yabaki kecega sa bula kina ko Lemeki sa vitu na drau ka vitusagavulu ka vitu na yabaki; a sa qai mate.

³² A sa lima na drau na yabaki i Noa, a sa sucu na luvena ko Semi, kei Ame, kei Jefeca.