Vakatekivu 48 - Ai Vola Tabu (Vakadewa Makawa Vakavoutaki 2021)

Sa Vakalougatataki Ifereimi kei Manasa ko Jekope

¹ Ni sa oti ko ya, sa qai kainaki vei Josefa, “Raica, sa tauvi mate ko tamamu.” A sa kauta vata kaya na luvena tagane ruarua, ko Manasa kei Ifereimi.

² A sa tukuni vei Jekope, ka vaka, “Raica, sa lako mai vei iko ko Josefa na luvemu.” A sa qai vakaukauwataki koya ko Isireli, ka sa duri cake e nai mocemoce.

³ A sa kaya vei Josefa ko Jekope, “Na Kalou Kaukauwa sa rairai vei au mai Lusa e na vanua ko Kenani, ka sa vosavakalougatataki au,

⁴ a sa kaya vei au, ‘Raica, au na vakatubura na nomu kawa, ka vakalewevuqataki iko, ka vakatuburi iko mo matanitu e vuqa; ka'u na solia talega na vanua oqo vei ira na nomu kawa me nodrai votavota ka tawa mudu.’

⁵ O koya oqo, koi rau na luvemu tagane ruarua, koi rau ka sucu vei iko eliu e na vanua ko Ijipita ni'u se bera ni lako mai kina vei iko ki Ijipita, erau sa noqu; ko Ifereimi kei Manasa erau na noqu, me vakataki rau ko Rupeni kei Simione.

⁶ Ia na luvemu era sa sucu e muri, era na nomu. Era na vakacurumi e na ruku ni yacadrau na tuakadra e na vuku ni nodra i votavota.

⁷ Ia koi au, ni'u a lako mai Petani, sa mate i tikiqu e gaunisala ko Raijeli e na vanua ko Kenani, ni sa vo tiko na sala me yaco ki Efiraca; ka'u a buluti koya mai kea e na sala ki Efiraca” (ko ya, ko Peceliema).

⁸ Ia ni sa raici rau na luve i Josefa ko Isireli, a sa kaya, “Ko cei koi rau oqo?”

⁹ A sa kaya vei tamana ko Josefa, “Erau sa luvequ, koi rau sa solia vei au na Kalou eke.” A sa kaya ko koya, “Yalo vinaka mo kauti rau mada mai kivei au, me'u vosavakalougatataki rau.”

¹⁰ A sa buawa na mata i Isireli ni sa qase, ka sa sega ni rai vakavinaka. A sa kauti rau mai vakavoleka ko Josefa ki vua; ka sa reguci rau ko koya, ka mokoti rau.

¹¹ A sa kaya vei Josefa ko Isireli, “Au a sega ni namaka me'u raica na matamu; ia, sa vakarautaka vakakina na Kalou me'u raici rau talega na luvemu.”

¹² A sa qai tauri rau lesu ko Josefa mai na duru i Jekope, ka sa vakacuva na matana ki na qele.

¹³ A sa tuberi rau ruarua ko Josefa, ko Ifereimi e na ligana i matau me donuya na liga i mawi i Isireli, kei Manasa e na ligana i mawi me donuya na liga i matau i Isireli, ka kauta voleka vua.

¹⁴ Ia sa dodoka na ligana i matau ko Isireli ka tabaka na ulu i Ifereimi, ko koya ka gone, kei na ligana i mawi ki na ulu i Manasa, ni sa veilataitaka na ligana, ka ni sa ulumatua ko Manasa.

¹⁵ A sa vosavakalougatataki Josefa, ka kaya, “Na Kalou ka rau daulako voli e matana na tamaqu ko Eparaama kei Aisake, na Kalou ka noqu i vakatawa ni'u a gone ka yacova na siga oqo,

¹⁶ na agilosi ka vakabulai au mai na ca kecega, me vakalougatataki rau na cauravou; ia me toka dei vei rau na yacaqu, kei na yacadrau na tamaqu ko Eparaama kei Aisake; me rau tubu talega me rau lewe vuqa sara e vuravura.”

¹⁷ Ia ni sa raica ko Josefa sa tabaka na ulu i Ifereimi ko tamana e na ligana i matau, sa sega ni vinakata; ka sa qai laveta na liga i tamana, me kauta mai na ulu i Ifereimi ki na ulu i Manasa.

¹⁸ A sa kaya vei tamana ko Josefa, “Me kakua ni vakakoya, na tamaqu! Ni sa ulumatua ko koya oqo, mo tabaka na uluna e na ligamu i matau.”

¹⁹ Ia sa bese ko tamana, ka kaya, “Au sa kila na luvequ, au sa kila; ena yaco talega ko koya me dua na yavusa, ka na levu talega ko koya. Ia, ena levu cake ga mai vua ko tacina, kei na nona kawa ena yaco me matanitu e vuqa.”

²⁰ A sa vosavakalougatataki rau kina e na siga ko ya, ka kaya, “Ena vukumu, ko ira na Isireli era na ia na vosa ni veivakalougatataki, ka ra na kaya, ‘Me qisi iko na Kalou mo tautauvata kei Ifereimi ka vakataki Manasa.’ ” A sa biuti Ifereimi kina ko koya me liu, ka me muri ko Manasa.

²¹ A sa qai kaya vei Josefa ko Isireli, “Raica, ka'u sa voleka ni mate, ia na Kalou ena tiko kei kemudou, ka kauti kemudou tale ki na nodra vanua na nomudou qase.

²² Ia koi au, ka'u sa solia oqo e dua na nomu i votavota ka levu cake mai na nodra na veitacini, ka'u a rawata mai vua na Amoraiti e na noqu i seleiwau kei na noqu dakaititi.”