Vakatekivu 47 - Ai Vola Tabu (Vakadewa Makawa Vakavoutaki 2021)

Vakatikori mai Koseni na Vuvale i Jekope

¹ A sa lako ko Josefa ka tukuna vei Fero, ka kaya, “Ko tamaqu kei iratou na tuakaqu, kei na nodra qele ni sipi, kei na nodra qele ni bulumakau, kei na nodra ka kecega, sa lako mai na vanua ko Kenani; ka ra sa tiko mai na vanua ko Koseni.”

² A sa kauta e lewe lima vei iratou na tuakana, me ratou tu e na mata i Fero.

³ A sa kaya ko Fero vei iratou na veitacini, “A cava dou sa daukitaka?” A ratou sa kaya vei Fero, “A nomuni tamata sa dauvakana sipi, koi keitou, ko ira talega na neitou qase.”

⁴ Eratou sa kaya talega vei Fero, “Keitou sa lako mai me keitou tiko vulagi e na vanua oqo; ni sa sega na kedra na neitou sipi na nomuni tamata ni sa ka levu sara na dausiga e na vanua ko Kenani. Ia keitou sa kerekere kina vei kemuni me keitou tiko mada na nomuni tamata e na vanua ko Koseni.”

⁵ A sa qai kaya vei Josefa ko Fero, “Sa lako mai vei iko ko tamamu kei iratou na tuakamu.

⁶ Sa tiko e matamu na vanua ko Ijipita. E na vanua vinaka mo vakatikora kina na tamamu kei na veitacini. Me ra tiko e na yasana ko Koseni, ia kevaka ko sa kila eso vei ira era tamata gugumatua, mo qai lesi iratou me ratou lewa na noqu manumanu.”

⁷ A sa qai kauti Jekope na tamana ko Josefa, me tu e na mata i Fero, ka sa vosavakalougatataki Fero ko Jekope.

⁸ A sa kaya vei Jekope ko Fero, “E vica na yabaki ni nomu bula?”

⁹ A sa kaya vei Fero ko Jekope, “Na yabaki ni noqu veitokiyaki voli sa dua na drau ka tolusagavulu na yabaki; sa vica ga ka ca vakalevu na veiyabaki oqori ni noqu bula. Sa sega ni tautauvata kei na nodra yabaki ni bula na noqu qase e na gauna ni nodra veitokiyaki.”

¹⁰ A sa qai vosavakalougatataki Fero ko Jekope, ka lako tani mai na mata i Fero.

¹¹ Ia sa vakatikora na tamana kei na veitacini ko Josefa, ka solia vei ira e dua nai votavota e na vanua ko Ijipita, io e na vanua ka vinaka cake, e na yasana ko Ramisese, me vaka sa vakarota ko Fero.

¹² A sa vakania na tamana kei na veitacini, kei na vuvale kecega i tamana ko Josefa e na kakana me rauta na nodra vuvale yadua.

Ko Josefa kei na Dausiga e Ijipita

¹³ A sa sega na kakana e na vanua taucoko ko ya, ni sa ka levu sara na dausiga. A sa malumalumu e na viakana na vanua ko Ijipita kei na vanua ko Kenani e na vuku ni dausiga.

¹⁴ A sa kumuna vata ko Josefa nai lavo kecega sa kune e na vanua ko Ijipita kei na vanua ko Kenani, me kenai sau ni sila era volia; ka sa kauta nai lavo ko Josefa ki na vale i Fero.

¹⁵ Ia ni sa oti nai lavo e na vanua ko Ijipita kei na vanua ko Kenani, era sa qai lako kecega mai vei Josefa na kai Ijipita, ka ra kaya, “Mo ni solia mada vei keimami na kakana! A cava me keimami mate kina e matamuni? Ni sa qai oti na neimami i lavo.”

¹⁶ A sa kaya ko Josefa, “Dou solia mai vei au na nomudou manumanu, ka'u na solia vei kemudou na kakana mei sau ni nomudou manumanu, ke sa oti na nomudou i lavo.”

¹⁷ A ra sa kauta mai kina vei Josefa na nodra manumanu; a sa solia vei ira na kakana ko Josefa mei voli ni ose, kei na qele ni sipi, kei na qele ni bulumakau, kei na asa. A sa vakani ira e na kakana e na yabaki ko ya me kenai voli ni nodra manumanu kecega.

¹⁸ Ia ni sa oti na yabaki ko ya, era sa lako tale mai vei koya e na yabaki ka tarava, ka ra sa kaya vua, “Keimami na sega ni vunia vua na neimami turaga ni sa oti vakadua na neimami lavo; ka sa nona na neimami turaga na neimami qele ni manumanu. Sa sega tale na ka sa vo e mata ni neimami turaga, a yagoi keimami ga kei na neimami vanua.

¹⁹ Me keimami mate beka li e matamuni, koi keimami kei na neimami vanua? Mo ni voli keimami mada vata kei na neimami vanua e na kakana. Keimami na qai nona bobula ko Fero, ena nona talega na neimami vanua; ia mo ni solia vei keimami nai tei ni sila me keimami tea, me keimami bula kina ka sega ni mate, ka me kakua ni lala tu na vanua.”

²⁰ A sa volia ko Josefa na vanua taucoko ko Ijipita me nei Fero. A ra sa volitaka na kai Ijipita na nodra dui were, ni sa ka levu tiko vei ira na dausiga; ka sa qai nei Fero na vanua.

²¹ Ia ko ira na tamata, sa vakayacori ira me ra bobula mai nai yalayala kei Ijipita e dua ka yacova na yasana kadua.

²² A nodra vanua ga na bete sa sega ni volia ko koya; ni sa vota ko Fero e dua na kedrai votavota na bete, ka ra sa bula voli e nai votavota ka vota vei ira ko Fero; o koya era sega ni volitaka kina na nodra vanua.

²³ Sa qai kaya vei ira na tamata ko Josefa, “Raica, me vaka ni'u sa voli kemudou edaidai kei na nomudou vanua me nei Fero, sa tu oqo nai tei ni sila me nomudou; mo dou la'ki teivaka ki na qele.

²⁴ Ia ni sa gauna ni tatamusuki, mo dou na solia e dua-nai-kalima vei Fero; ka me nomudou e va-nai-kalima, ka oqori me nomudou itei ki na were, ka me kemudou kakana kei na kedra na nomudou lewe ni veivale, kei na kedra talega na nomudou lalai.”

²⁵ A ra sa kaya, “Ko ni sa qai vakabulai keimami; ka mo ni lomavinaka kina na neimami turaga, ni keimami na qai bobula i Fero.”

²⁶ A sa vakatura oqo ko Josefa me kenai lesilesi tiko e na vanua ko Ijipita, ka yacova na gauna oqo, ka me nei Fero e dua-nai-kalima. Ia na nodra vanua duaduaga na bete sa sega ni yaco me nei Fero.

Otioti ni Kerekere nei Jekope

²⁷ A sa tiko ko Isireli e na vanua ko Ijipita, e na yasana ko Koseni; a ra sai taukei kina, ka ra tubu, ka lewe vuqa sara mai.

²⁸ A sa bula ko Jekope ka yabaki tinikavitu e na vanua ko Ijipita; ia na yabaki kecega sa bula kina ko Jekope sa dua na drau ka vasagavulu ka vitu na yabaki.

²⁹ Ni sa toro mai na gauna me mate kina ko Isireli, a sa kacivi Josefa na luvena ka sa kaya vua, “Kevaka ka'u sa kune loloma e matamu, mo daramaka mada na ligamu ki ruku ni sagaqu, ka yalataka mo cakacaka vakayalololoma ka vakayalodina vei au. Mo kakua ni buluti au e Ijipita.

³⁰ Ia ni'u sa moce vata kei ira na noqu qase, mo kauti au tani mai Ijipita ka la'ki buluti au e na nodra i bulubulu.” A sa kaya ko koya, “Au na cakava me vaka na nomu vosa.”

³¹ A sa kaya ko koya, “Mo bubului kina vei au”; ka sa bubului kina vua. A sa qai cuva ko Isireli e na ulu ni nonai mocemoce.