Vakatekivu 45 - Ai Vola Tabu (Vakadewa Makawa Vakavoutaki 2021)

Vakatakilai Koya ko Josefa vei Iratou na Veitacini

¹ Sa qai sega ni kinoci koya rawa tiko ko Josefa e na matadra na nona tamata era tu vata kaya, ka kacivaka yani, “Me ra lako tani vei au ki tuba na noqu tamata kecega.” A sa sega e dua sa tiko vata kaya ni sa tukuni koya ko Josefa vei iratou na tuakana.

² A sa tabalaka na tagi ko koya, ka ra sa rogoca na kai Ijipita, kei na lewe-ni-vuvale i Fero talega sa rogoca.

³ A sa kaya ko Josefa vei iratou na veitacini, “Koi au ko Josefa. Sa bula dina tiko li ko tamaqu?” Ia eratou sa sega ni vosa rawa vua na tuakana, ni ratou sa taqaya vakalevu e matana.

⁴ Sa qai kaya vei ira na veitacini ko Josefa, “Dou toro voleka mai vei au.” A ra sa toso volekati koya yani. A sa kaya ko koya, “Koi au ko Josefa na tacimudou, ko koya dou a volitaka ki Ijipita.

⁵ Ia oqo, mo dou kakua ni taqaya, se veicudruvi vakai kemudou, ni dou a volitaki au ki ke; ni sa talai au mai liu na Kalou ka qai muri koi kemudou me maroroi kina na bula.

⁶ Ni se qai yabaki rua ga oqo na dausiga ni vanua; ka se vo e lima tale na yabaki me na sega kina na laulau se na tamusuki sila.

⁷ A sa talai au taumada mai na Kalou me maroroi na nomudou kawa e vuravura, ka me ra lewe vuqa na nomudou kawa me ra bula.

⁸ Ena ka oqo, dou sa sega kina ni vakatalai au mai ki ke, ia na Kalou ga; ka sa qisi au ko koya me'u dua na tama vei Fero, ka me'u turaga vei ira kecega na nona lewe-ni-vuvale, ka lewa e na vanua taucoko ko Ijipita.

⁹ Dou kusarawa, ka lako cake vei tamaqu, ka kaya vua ni sa vosa vakaoqo ko Josefa na luvemu, ‘Sa qisi au na Kalou me'u turaga mai Ijipita taucoko; mo lako sobu mai vei au, ka mo kakua ni vakaberabera.

¹⁰ Ko na la'ki tiko mai na vanua ko Koseni, mo voleka kina vei au, ko iko kei ira na luvemu kei na makubumu, kei na nomu qele ni sipi kei na nomu qele ni bulumakau, kei na ka kecega sa nomu.

¹¹ Ka'u na vakani iko mai kea—ni sa vo e lima na yabaki ni dausiga—mo kakua kina ni dravudravua mai ko iko kei ira na nomu lewe-ni-vuvale, kei na ka kecega e nomu.’

¹² O koya oqo mo dou raica vinaka kina e matamudou kei na mata i Penijamini na taciqu, ni'u sa vosa dina sara mai gusuqu kivei kemudou.

¹³ Mo dou tukuna vua na tamaqu na noqu lagilagi kecega e Ijipita, kei na ka kecega dou sa raica. Dou vakatotolo ka kauta sobu mai ki ke na tamaqu.”

¹⁴ A sa qai mokoti Penijamini na tacina, ka tagi; a sa tagi talega ko Penijamini.

¹⁵ A sa reguci iratou kece sara na tuakana ka tagicaki iratou; ka ni sa oti, era sa qai veivosaki kaya na veitacini.

¹⁶ A sa rogo yani ki na vale i Fero na kenai tukutuku, ni sa kainaki, “Era sa lako mai na tuakai Josefa.” A sa lomavinaka kina ko Fero kei ira na nona tamata.

¹⁷ A sa kaya vei Josefa ko Fero, “Mo kaya vei ira na tuakamu, ‘Dou kitaka oqo: dou vakavodoka na nomudou manumanu ka lesu tale ki na vanua ko Kenani.

¹⁸ Dou kauti koya mai na tamamudou kei na nomudou lewe ni veivale, ka lako mai vei au, ka'u na solia vei kemudou na vanua vinaka duadua e Ijipita, ka dou na kania na uro ni vanua.’

¹⁹ Ko sa vakaroti mo kaya talega oqo, ‘Dou kitaka oqo: dou kauta eso na qiqi-ni-tamata mai na vanua ko Ijipita e na vukudra na nomudou lalai kei na watimudou, ka kauti koya mai na tamamudou, ka lako mai.

²⁰ Dou kakua ni nanuma tale na veika dou taukena, ni sa nomudou na veika vinaka ni vanua taucoko ko Ijipita.’ ”

²¹ A ra kitaka vakakina na luve i Isireli. A sa solia vei ira eso na qiqi-ni-tamata ko Josefa, me vaka na lewa i Fero, ka solia vei ira nai vaqa e gaunisala.

²² Sa solia ko koya vei ira kecega na tamata yadua nai sulu me ra veisau kina; ia sa solia ko koya vei Penijamini e tolu na drau na tiki ni siliva, ka lima nai sulu me veisau kina.

²³ Ia vei tamana sa vakauta na ka oqo: e tini na asa sa colata eso na ka vinaka mai Ijipita, ka tini na asa yalewa sa colata na sila kei na madrai kei na kakana me kei tamana e gaunisala.

²⁴ A sa vakatalai ira yani na veitacini, ka ra sa lako. A sa kaya vei ira ko koya, “Dou kakua ni veicudruvi e na gaunisala.”

²⁵ A ra sa lako cake mai Ijipita, ka yaco ki na vanua ko Kenani kivei Jekope na tamadra,

²⁶ ka tukuna vua, ka vaka, “E se bula tiko ko Josefa! Sa lewa ko koya na vanua taucoko ko Ijipita.” A sa kidacala ko Jekope; a sa sega ni vakadinati iratou.

²⁷ Ia ni ra sa tukuna vua na vosa kecega i Josefa ka vosataka vei ira, ka sa raica ko koya na qiqi-ni-tamata sa vakatala mai ko Josefa me kauti koya, sa qai kilai yalona tale mai ko Jekope na tamadra.

²⁸ A sa kaya ko Isireli, “Sa rauta! E se bula tiko ko Josefa na luvequ. E dodonu me'u ia ka la'ki raici koya ni'u se bera ni mate.”