Vakatekivu 42 - Ai Vola Tabu (Vakadewa Makawa Vakavoutaki 2021)

Ratou Laki Voli Sila ki Ijipita na Tuakai Josefa

¹ Ni sa kila ko Jekope sa tiko na sila mai Ijipita, sa kaya ko Jekope vei ira na luvena, “A cava dou sa veiraici tu kina?”

² Sa kaya talega ko koya, “Raica, ka'u sa rogoca sa tiko na sila mai Ijipita; dou lako sobu kina, ka volia na keda mai kea, me da bula ga ka sega ni mate.”

³ A ra sa lako sobu na tuakai Josefa e le tini, me voli sila mai Ijipita.

⁴ Ia ko Penijamini, na taci Josefa, sa sega ni tala vata kei iratou na tuakana ko Jekope, ni sa lomaleqataka ko koya de yacovi koya e dua na ca.

⁵ A ratou sa la'ki volivoli vata na luve i Isireli kei ira tale eso, ni sa dausiga na vanua ko Kenani.

⁶ Ia ko Josefa sa lewa na vanua, ia sai koya ga sa volitaki sila vei ira kecega na lewe-ni-vanua. A ratou sa lako mai na tuakai Josefa, ka cuva vua ki na qele.

⁷ A sa raici iratou na tuakana ko Josefa, ka sa kilai iratou, ia sa vakalecalecavi koya vei iratou ka vosa vakaukauwa vei iratou. A sa kaya vei iratou, “Dou sa lako mai vei?” A ratou sa kaya, “Mai na vanua ko Kenani, me voli kakana.”

⁸ A sa kilai iratou na tuakana ko Josefa, ia eratou sa sega ga ni kilai koya.

⁹ A sa nanuma tale ko Josefa na tadra ka a tadrai iratou kina ko koya. A sa kaya vei iratou, “Koi kemudou na yamata; dou sa lako mai mo dou raica na ka sa malumalumu kina na vanua!”

¹⁰ A ra sa kaya vua, “E segai, noqu turaga; keitou sa lako ga mai na nomuni tamata me voli kakana.

¹¹ Koi keitou kece na luvena e le dua ga na tamata; keitou sa tamata dina; keitou sa sega ni yamata na nomuni tamata.”

¹² Ia sa kaya vei iratou ko koya, “E segai, dou sa lako ga mai mo dou raica na ka sa malumalumu tu kina na vanua!”

¹³ A ratou sa kaya, “Oi keitou na nomuni tamata, keitou sa lewe tinikarua na veitacini; keitou na luvena e le dua na tamata mai na vanua ko Kenani. Ka raica, ko koya sa gone sa tiko edaidai kei na tama i keitou, ka dua sa yali.”

¹⁴ Ia sa kaya ga vei iratou ko Josefa, “Sai koya sara ga ka'u sa vosa kina vei kemudou; kemudou sa mai yamata!

¹⁵ Na ka ga oqo ena kilai kina na nomudou dina: me vaka sa bula ko Fero, dou na sega ni lako tani eke kevaka sa sega ni lako mai ki ke na tacimudou gone!

¹⁶ Dou tala mada e dua vei kemudou me kauta mai na tacimudou, ia koi kemudou na kena vo mo dou na vesu, me kilai kina se dina na nomudou vosa se segai. Ia kevaka e segai, me vaka sa bula ko Fero, sa qai macala kina ni dou sa mai yamata.”

¹⁷ A sa biuti ira vata me ra vakatawai mada vakavesu me bogi tolu.

¹⁸ E nai katolu ni siga, sa qai kaya vei iratou ko Josefa, “Dou kitaka na ka oqo mo dou bula kina, ni'u sa rerevaka na Kalou:

¹⁹ kevaka dou sa tamata dina, me dua vei kemudou na veitacini me vesu tiko mai e na vale dou sa sogolati kina. Ia koi kemudou na kena vo mo dou la'ki kauta na sila ni ra sa viakana na nomudou lewe ni vuvale,

²⁰ ka dou kauta ga mai vei au na tacimudou sa gone. Ena qai vakadinadinataki kina na nomudou vosa, ka dou na sega ni mate.” A ratou sa vakadonuya vakakina.

²¹ A ratou sa veikayaka vakai iratou, “E dina sara, edatou sa sotava oqo nai totogi ni cala edatou a kitaka vua na tacida; ni datou a raica na rarawa ni yalona ni sa vakamasuti kedatou, ia edatou a sega ni via rogoci koya. O koya oqo sa yacovi kedatou kina na ka rarawa oqo.”

²² A sa vosa vei iratou ko Rupeni, ka kaya, “Au a sega beka ni vosa vei kemudou ka kaya mo dou kakua ni caka ca vua na gone? Ia dou a sega ni via rogoca. Raica, sa yaco oqo me saumi lesu tale kina na nona dra.”

²³ A ratou sa sega ni kila ni sa macala vinaka tu vei Josefa, ka ni a vosa tikoga vei iratou ko koya mai vua na dauvakadewa vosa.

²⁴ A sa vuki tani mai vei iratou ko koya, ka tagi; a sa lesu tale vei iratou, ka veivosaki kei iratou. A sa digitaki Simione ka vesuka e matadra.

²⁵ A sa qai vakarota ko Josefa me vakasinaiti na nodratou taga e na sila, ka me vakasukai na nona i lavo na tamata yadua ki na nona taga, ka me soli vei iratou nai vaqa ni gaunisala. A sa cakava vakaoqo vei iratou ko koya.

Lesu Tale ki Kenani na Tuakai Josefa

²⁶ A ratou sa vakavodoka na nodratou sila ki na nodratou asa, ka lako tani mai kea.

²⁷ Ia e dua sa sereka na nona taga e na bure me vakania na nona asa, a sa kunea na nona i lavo; ka raica, sa tiko e na gusu ni nona taga.

²⁸ A sa kaya vei iratou na veitacini, “A noqu i lavo sa vakasukai tale mai; ka sa tiko oqo e na gusu ni noqu taga!” A sa waicala na yalodratou, ka ratou sa rere vata, ka kaya, “Na cava oqo sa cakava na Kalou vei kedatou?”

²⁹ Ni ra sa yaco mai vei Jekope na tamadratou ki na vanua ko Kenani, era sa tukuna vua na ka kecega ka yacovi iratou, ka kaya,

³⁰ “Ko koya na tamata sa turaga ni vanua, sa vosa vakaukauwa vei keitou, ka beitaki keitou me yamata sa laki vakaraica na vanua.

³¹ Ia keitou a kaya vua, ‘Keitou sa tamata dina, keitou sa sega ni yamata.

³² Koi keitou na veitacini e lewe tinikarua, na luvena na tama i keitou; e dua sa yali, ia ko koya ka gone sa tiko edaidai kei na tama i keitou, e na vanua ko Kenani.’

³³ A sa kaya vei keitou na tamata, ko koya sa turaga ni vanua, ‘A ka oqo ka'u na kila kina ni dou sa tamata dina: dou biuti koya mai e dua vei kemudou na veitacini me tiko kei au, ia koi kemudou mo dou kauta na kedra na nomudou lewe ni veivale e na vuku ni dausiga, ka dou qai lako yani.

³⁴ Dou kauti koya mai na tacimudou ka gone, au na qai kila kina ni dou sa sega ni yamata, ia dou sa tamata dina ga. Au na qai sereki koya vei kemudou na tacimudou, ka dou na qai mai dauveivoli e na vanua.’ ”

³⁵ Ia ni ratou sa vakalala tiko na nodratou taga, raica, sa tiko na nona i oloolo i lavo na tamata yadua e na nona taga. Ia ni ratou sa raica kei tamadratou nai oloolo i lavo, eratou sa rere.

³⁶ A sa kaya vei ira ko Jekope na tamadratou, “Sai au dou sa vakararawataka e na vukudra na luvequ: sa yali ko Josefa, ka sa yali ko Simione, ia oqo dou na kauti Penijamini talega. Sa yaco kecega vei au na veika oqo!”

³⁷ A sa qai vosa vei tamana ko Rupeni ka kaya, “Mo vakamatei rau na luvequ kevaka ka'u sa sega ni kauti koya tale mai vei iko. Mo laiva vei au, ka'u na kauti koya tale mai vei iko.”

³⁸ Ia sa kaya ko koya, “Ena sega ni lako sobu kei kemudou na luvequ, ni sa mate na tuakana, ka sa vo duaduaga ko koya. Kevaka sa yacovi koya na ca e na sala dou sa lako kina, dou sa na kauta sobu e na rarawa na uluqu sa sika ki nai bulubulu.”