Vakatekivu 41 - Ai Vola Tabu (Vakadewa Makawa Vakavoutaki 2021)

Na Tadra nei Fero

¹ Ia ni sa oti vinaka e rua na yabaki, sa qai tadra ko Fero; ka raica, sa tu mai na uciwai.

² Ka raica, sa lako cake mai na uciwai e vitu na bulumakau sa rairai vinaka, ka sa yago vinaka na lewedra; a ra sa kana voli e veico.

³ Ka raica, sa muri ira cake mai e vitu tale na bulumakau mai na uciwai, sa rairai ca ka sa suivotu; a ra sa tu vata kei ira na bulumakau e na bati ni uciwai.

⁴ Ia na bulumakau sa rairai ca ka suivotu era sa kania na bulumakau e vitu sa rairai vinaka ka yago vinaka. A sa yadra mai ko Fero.

⁵ A sa moce ka tadra tale; ka raica, sa tubu cake e na dua na tolo ni sila e vitu na kena sola, sa lelevu, ka vinaka.

⁶ Ka raica, sa vitu na sola ca, ka sa malai e na cagi mai na tokalau, sa tubu e muri.

⁷ Ia na sola e vitu sa ca sa tiloma na sola e vitu sa lelevu ka vinaka. A sa yadra mai ko Fero, ka raica, ni sa tadra ga.

⁸ Ia e na mataka sa kidroa na lomana; a sa talaki ka kacivi ira kece mai na daucaka-mana mai Ijipita, kei na tamata vuku kecega sa tiko kina. A sa tukuna vei ira ko Fero na nona tadra; a sa sega me vakaibalebaletaka rawa vei Fero.

⁹ Sa qai vosa vei Fero ko koya sa turaga vei ira sa daucaka mena, ka kaya, “Au sa qai nanuma edaidai na noqu cala.

¹⁰ E na dua na gauna, a sa cudru ko Fero vei rau na nona tamata, ka biuti au kina me'u sogolati e nona vale na kavetani ni valu i vakatawa, koi keirau kei na nodra turaga na dauvavavi.

¹¹ Keirau a qai tadrataka e dua na tadra e na dua na bogi, koi au kei koya; keirau a tadra yadua ka duidui nai balebale ni neirau tadra.

¹² A sa tiko mai kea e dua na cauravou, na Iperiu, a sa qarava voli na kavetani ni valu i vakatawa ko koya. Ni keirau a tukuna vua, a sa vakaibalebaletaka vei keirau na neirau tadra, ni sa vakadewataka vei keirau yadua na neirau tadra.

¹³ E na nona sa vakaibalebaletaka vakaoqo vei keirau, a sa yaco vakakina; au sa vakalesui tale ki na noqu i tavi, ka sa vakalilici ko koya na dauvavavi.”

¹⁴ Sa qai talatala ko Fero me lako mai ko Josefa, a ra sa kauti koya vakusakusa mai na vale butobuto. A sa toroi koya ka veisautaka na nonai sulu, ka lako kivei Fero.

¹⁵ A sa kaya vei Josefa ko Fero, “Au a raica e dua na tadra, ka sa sega ni dua me vakaibalebaletaka. Ia ka'u sa rogoca ni ko sa rawa ni vakaibalebaletaka na tadra ko rogoca.”

¹⁶ A sa vosa vei Fero ko Josefa, ka kaya, “Sa sega ni koi au; ia na Kalou ga ena vakatakila vinaka vei Fero.”

¹⁷ A sa kaya vei Josefa ko Fero, “E na noqu tadra, au a tucake tu e na bati ni uciwai na Naile;

¹⁸ ka raica, sa lako cake mai na uciwai e vitu na bulumakau, sa yago vinaka, ka rairai vinaka, ka ra sa kana voli e na veico.

¹⁹ Ka raica, e vitu tale na bulumakau sa qai muri ira cake mai, sa suivotu, ka rairai ca sara, ka yali na lewedra; ka'u se sega ni bau raica vakadua na ka rairai ca vakaoqo e na vanua taucoko ko Ijipita.

²⁰ Ko ira na bulumakau suivotu ka yago ca era sa qai kania na bulumakau e vitu ka yago vinaka era a liu mai,

²¹ ia ni ra sa kania oti, sa dredre ni kilai ni ra kania, ni ra sa rairai ca tikoga me vaka eliu. Ka'u a qai yadra.

²² Ia ka'u a qai raica talega e na noqu tadra ni sa tubu e vitu na sola ni sila e na dua na tolona, sa vuavuai vinaka ka lelevu;

²³ ka raica, sa tubu cake e muri e vitu na sola, sa malai ka lalai, e kana mate e na cagi mai na tokalau;

²⁴ ia na sola sa lalai sa qai tiloma na sola vinaka e vitu. Ia ka'u a tukuna na ka oqo vei ira na daucaka-mana, ka sa sega e dua me vakamacalataka rawa vei au.”

²⁵ A sa kaya vei Fero ko Josefa, “A tadra i Fero sa dua ga ka tautauvata; sa vakatakila vei Fero na Kalou na ka sa voleka ni cakava ko koya.

²⁶ A bulumakau vinaka e vitu sa yabaki e vitu, kei na sola vinaka e vitu sa yabaki e vitu; sa dua bauga nai balebale ni tadra.

²⁷ Na bulumakau e vitu sa suivotu ka yago ca era muri ira cake mai sa yabaki e vitu, ka vakakina na sola e vitu sa kana mate e na cagi mai na tokalau. Era yabaki ni dausiga e vitu.

²⁸ Oqo ga na ka ka'u sa kaya oti vei Fero; ni sa vakatakila na Kalou kivei Fero na veika sa voleka ni cakava.

²⁹ Raica, ena lako mai e vitu na yabaki ni sautu levu sara e na vanua taucoko ko Ijipita.

³⁰ Ni oti ko ya, ena qai yaco e muri e vitu na yabaki ni dausiga; ia na sautu kece ena guilecavi e na vanua ko Ijipita; ni na kania na vanua na dausiga.

³¹ Ena sega ni nanumi tale na sautu ni vanua e na vuku ni dausiga ko ya e na muri mai, ni na ka rerevaki sara.

³² Na kena vakaruataki vei Fero na tadra sa dusia ni sa vakataudeitaka oqo na Kalou, ka na sega ni dede ni sa na vakayacora oqo na Kalou.

³³ O koya oqo me qara mada kina ko Fero e dua na tamata yalomatua ka vuku, ka lesia me lewa na vanua ko Ijipita.

³⁴ Me lesia ko Fero eso na vakailesilesi me lewa na vanua, ka kumuna e dua-nai-kalima ni veika e rawati e na vanua ko Ijipita e na loma ni yabaki ni sautu e vitu.

³⁵ Me ra kumuna vata na kakana kecega e na loma ni yabaki ni sautu sa lako tiko mai, ka binia na sila me lewa ko Fero, ka me ra maroroya talega na kakana e na veikoro.

³⁶ Na kakana ko ya ena maninitaki me kena na vanua e na loma ni yabaki ni dausiga e vitu ka na yaco e muri e na vanua ko Ijipita, ka me kakua kina ni kawaboko na vanua e na dausiga.”

Lesi ko Josefa me Lewa na Vanua ko Ijipita

³⁷ A sa vinaka vei Fero na vakatutu oqo, ka vakakina vei ira kecega na nona tamata.

³⁸ A sa kaya vei ira na nona tamata ko Fero, “Eda na kunea li e dua vakaoqo, a tamata sa tiko vua na yalo ni Kalou?”

³⁹ A sa kaya vei Josefa ko Fero, “Me vaka ni sa vakatakila vei iko na Kalou na ka kecega oqo, sa sega tale e dua sa yalomatua ka vuku me vakataki iko.

⁴⁰ Ko na turaga e na noqu vale, ia ko ira na noqu tamata kecega era na vakarorogo ki na nomu vosa; ia e nai tikotiko-vakatui duaduaga ka'u na levu cake kina vei iko.”

⁴¹ Sa kaya tale vei Josefa ko Fero, “Raica, ka'u sa lesi iko mo lewa na vanua taucoko ko Ijipita.”

⁴² A sa luvata na nona mama ko Fero mai na ligana, ka daramaka ki na liga i Josefa, ka vakaisulutaki koya e na lineni matailalai, ka vakataubena e na taube koula.

⁴³ A sa vakavodoki koya ki nai karua ni nona qiqi vakaturaga; ka ra sa kacivaka voli e matana, “Mo ni tekiduru!” A sa lesi koya me lewa na vanua taucoko ko Ijipita.

⁴⁴ A sa kaya vei Josefa ko Fero, “Koi au ko Fero, ia ena sega na tamata me yavalata na ligana se na yavana e na vanua taucoko ko Ijipita kevaka ko se sega mada ni vakataulewa kina.”

⁴⁵ A sa vakayacani Josefa ko Fero me Savenaca-panea; a sa soli Asenaca vua me watina, ko koya na luve i Potifera na bete mai Oni. A sa lewa voli ko Josefa na veiyasana kecega mai Ijipita.

⁴⁶ A sa tolusagavulu na yabaki i Josefa, ni sa tu e na mata i Fero na tui Ijipita. A sa lako tani e na mata i Fero ko Josefa, ka lako voli yani e na veiyasana kecega mai Ijipita.

⁴⁷ Ia e na yabaki vakalewe e vitu sa vua vinaka ka vakalevu sara na vanua.

⁴⁸ A sa kumuna vata na kakana kecega e na yabaki e vitu, sa tu e na vanua ko Ijipita, ka binia na kakana e na veikoro. Na kakana ni veiwere sa volita e dua na koro, sa binia ko koya e na koro ko ya.

⁴⁹ A sa binia na sila ko Josefa me vaka na nuku mai matasawa, na ka levu sara, ka qai sega ni wilika tiko; ni sa sega ni wili rawa.

⁵⁰ A sa sucu e le rua na luve i Josefa erau tagane ni se bera na veiyabaki ni dausiga, sa vakasucuma ko Asenaca, na luve i Potifera na bete mai Oni.

⁵¹ A sa vakatoka ko Josefa na nona ulumatua me yacana ko Manasa, ka kaya, “Ni sa vakayacora na Kalou me'u guilecava na noqu oca kecega kei na lewe-ni-vuvale kece i tamaqu.”

⁵² A sa vakayacana nai karua ko Ifereimi, ka kaya, “Ni sa vakayacora na Kalou me'u vuavuai e na vanua ni noqu rarawa.”

⁵³ A sa oti na yabaki ni sautu e vitu e na vanua ko Ijipita,

⁵⁴ ka sa tekivu na yabaki ni dausiga e vitu, me vaka sa kaya ko Josefa. A sa kania na veivanua kecega na dausiga, ia sa tiko ga na kakana e na vanua taucoko ko Ijipita.

⁵⁵ Ia ni sa oti na kakana e na vanua taucoko ko Ijipita, era sa qai tagi vei Fero na tamata me soli kedra. A sa kaya vei ira na kai Ijipita kecega ko Fero, “Dou lako vei Josefa; ia na ka sa kaya vei kemudou, dou cakava.”

⁵⁶ Me vaka ni sa yaco na dausiga e na vanua taucoko, a sa dolava na lololo kecega ko Josefa, ka volitaki sila vei ira na kai Ijipita; ni sa gumatua sara na dausiga e na vanua ko Ijipita.

⁵⁷ A sa lako mai ki Ijipita vei Josefa na lewe ni veivanua kecega me voli sila, ni sa gumatua na dausiga e na veivanua kecega.