Vakatekivu 40 - Ai Vola Tabu (Vakadewa Makawa Vakavoutaki 2021)

Vakatakila ko Josefa na Nodrau Tadra na Kaivesu

¹ Sa oti na ka oqo, erau sa vakacalaka vua na nodrau turaga na tui Ijipita ko koya na daucaka mena na tui Ijipita kei koya na dauvavavi.

² A sa cudru ko Fero vei rau na nona tamata vakailesilesi, nai liuliu ni daucaka mena, kei koya nai liuliu ni dauvavavi.

³ A sa sogolati rau e nona valeniveivesu na kavetani ni valu i vakatawa, e na tikina sa vesuki tu kina ko Josefa.

⁴ Ia na kavetani ni valu i vakatawa sa lesi Josefa me vakatawai rau, ka sa qaravi rau ko koya; a rau sa tiko vakavesu ga kina.

⁵ E na dua na bogi erau sa dui tadra koi rau ruarua—ko koya ka daucaka mena kei koya ka dauvavavi vua na tui Ijipita, koi rau sa vesuki e na valeniveivesu—ka sa duidui na nodrau tadra ka duidui nai balebale ni nodrau tadra yadua.

⁶ Ni sa lako mai vei rau e na mataka ko Josefa, a raica ni rau sa yalo rarawa.

⁷ A sa mani tarogi rau na tamata vakailesilesi i Fero eratou sa sogolati kaya tiko e na vale ni nona turaga, ka sa kaya, “A cava drau sa mata rarawa kina edaidai?”

⁸ A rau sa kaya vua, “Keirau sa tadrataka na tadra, ka sa sega me vakamacalataka na kenai balebale.” A sa kaya vei rau ko Josefa, “Sa sega beka ni nona na Kalou na kena vakaibalebaletaka na ka? Yalo vinaka drau tukuna mada mai vei au.”

⁹ A sa tukuna vei Josefa na nona tadra ko koya ka turaga vei ira sa daucaka mena na tui, a sa kaya vua, “E na noqu tadra, raica, sa tu e mataqu e dua na vuni vaini,

¹⁰ a sa tolu na tabana. Ia ni sa kubu mai, sa tubu mai na vuana ka vuataka na vua dreu na kenai soso.

¹¹ Ia sa tu e ligaqu na bilo i Fero; ka'u a vetia na vua-ni-vaini, ka lobaka ki na bilo i Fero, ka'u a qai solia na bilo ki na liga i Fero.”

¹² A sa kaya vua ko Josefa, “Oqo na kenai balebale: Na tabana e tolu sa bogi tolu.

¹³ Sa vo ga e bogi tolu me na qai vueta na ulumu ko Fero, ka vakalesui iko ki na nomu i tavi, ia ko na solia tale na bilo i Fero ki na ligana, me vaka nai valavala eliu ni ko a daucaka mena.

¹⁴ Ia mo qai nanumi au ni ko sa la'ki tiko vinaka; ka yalo vinaka mo caka loloma vei au mo na qai tukuni au vei Fero, ka kauti au tani mai na vanua oqo.

¹⁵ Ni ka'u a butakoci vakaidina mai na nodra vanua na Iperiu; sa sega talega na noqu cala e na vanua oqo me vakavuna na nodra biuti au ki na vale butobuto.”

¹⁶ Ia ni sa kila na turaga ni vavavi ni sa vinaka na kenai balebale, sa kaya vei Josefa, “Au a tadra talega ka raica, sa tolu na kato madrai vulavula e uluqu,

¹⁷ ia e na kato sa toka e cake sa tu na kakana kecega sa vavi me kei Fero; a ra sa mai kania na manumanu vuka mai na kato sa tu e uluqu.”

¹⁸ A sa vosa ko Josefa, ka kaya, “Oqo na kenai balebale: na kato e tolu sa bogi tolu.

¹⁹ Sa vo ga e bogi tolu me na qai vueta na ulumu ko Fero—mai delamu!—ka vakalilici iko e na kau, ka ra na kania na lewemu na manumanu vuka.”

²⁰ Ia e na kenai katolu ni siga, na siga ni sucu i Fero, sa cakava ko koya e dua na magiti vei ira kecega era qaravi koya, ka sa vueta na ulu ni turaga vei ira sa daucaka mena kei na ulu ni turaga vei ira sa dauvavavi.

²¹ A sa vakalesuya na turaga vei ira sa daucaka mena ki na nona i tavi, ka sa solia tale ko koya na bilo ki na liga i Fero;

²² ia sa vakalilica na turaga vei ira sa dauvavavi, me vaka sa vakaibalebaletaka vei rau ko Josefa.

²³ Ia na turaga vei ira sa daucaka mena na tui sa sega ni nanumi Josefa, ka sa guilecavi koya ga.