Vakatekivu 39 - Ai Vola Tabu (Vakadewa Makawa Vakavoutaki 2021)

Ko Josefa mai Ijipita

¹ A sa kau sobu ki Ijipita ko Josefa; ia ko Potifa, na vakailesilesi i Fero, ka kavetani ni valu i vakatawa, a kai Ijipita, sa voli koya mai vei ira na luve i Isimeli era a kauti koya sobu yani ki kea.

² A sa tiko kei Josefa ko Jiova, ka sa tamata yaco ko koya; a sa tiko e na vale ni nona turaga na kai Ijipita.

³ A sa raica na nona turaga ni sa tiko vata kaya ko Jiova, ka sa vakayacora ko Jiova na ka kecega sa cakava ko koya.

⁴ A sa kune loloma ko Josefa e matana ka sa qaravi koya; ka sa lesi koya me liutaka na qaravi ni nona vale, ka solia ki na ligana na ka kecega sa tu vua.

⁵ Mai na siga sa lesi koya kina me lewa na qaravi ni nona vale kei na nona veika kecega, a sa vakalougatataka na nona vale na kai Ijipita ko Jiova e na vuku i Josefa; ni sa tiko na veivakalougatataki nei Jiova e na veika kecega sa taukena, e vale kei na were.

⁶ A sa laiva na nona ka kecega me lewa ko Josefa; ka sa sega ni leqataka e dua tale na ka, ia na kakana ga sa kania ko koya. Ia oqo sa musudonu ka matavinaka ko Josefa.

⁷ E na dua na gauna e muri, a sa dauvakaraici Josefa na wati koya na nona turaga, ka kaya, “Me daru moce vata mada.”

⁸ Ia sa bese ko koya, ka kaya vua na wati koya na nona turaga, “Raica, sa sega ni leqataka na noqu turaga na veika sa tu e vale, ka sa solia me'u lewa na veika kecega sa nona.

⁹ Sa sega e dua e vale oqo me levu cake vei au, ka sa sega ni dua na ka sa bureitaka vei au, ia ko iko duaduaga, ni ko sa watina. E rawa vakacava li me'u cakava na cala levu oqo, ka i valavala ca vua na Kalou?”

¹⁰ E dina ga ni sa vosa tikoga vei Josefa ko koya e na siga yadua, sa sega ga ni vakadonuya ko koya me moce vata kaya, se me rau dau tu vata.

¹¹ Ia sa dua na siga, ni sa curu ki vale ko Josefa me kitaka na nona i tavi, ka sa sega ni tiko tale e dua vei ira na lewe-ni-vuvale,

¹² a sa vesuka na nona i sulu, ka kaya, “Mai daru moce vata!” Ia sa laiva na nona i sulu ki ligana ko Josefa, ka dro, ka curu yani ki tuba.

¹³ Ia ni sa raica ko koya ni sa biuta tu yani vua na nona i sulu, ka dro tani,

¹⁴ sa qai kacivi ira na nona lewe-ni-vuvale ka tukuna vei ira, “Raica, sa kauta mai vei keda na watiqu e dua na Iperiu me vakacacani keda! Sa lako mai vei au ko koya me keirau moce vata kaya, ia ka'u a qai kaci e na domo levu.

¹⁵ Ia ni sa rogoca ko koya ni'u a tabalaka cake na domoqu, ka kaci, sa qai biuta tu mai vei au na nona i sulu, ka dro, ka curu yani ki tuba.”

¹⁶ A sa qai taura tikoga ko koya na nona i sulu me yacova na nona lesu mai ki vale na nona turaga,

¹⁷ ka sa tukuna vua nai talanoa vata ko ya vakaoqo, “Ko koya na Iperiu, na tamata ko a kauta mai vei keda, sa curu mai vei au me vakacacani au;

¹⁸ ia ni'u sa tabalaka cake na domoqu ka kaci, sa qai biuta tu mai vei au na nona i sulu, ka dro ki tuba.”

¹⁹ Ni sa rogoca na nona turaga na vosa nei watina, ni sa kaya, “Oqo nai vakarau sa vakayacora vei au na nomu tamata,” a sa qai cudru vakalevu sara.

²⁰ A sa tauri Josefa na nona turaga ka biuta ki na valeniveivesu, na tikina era dauvesu kina ko ira na nona kaivesu na tui; ka sa tiko ga kina ko koya.

²¹ Ia sa tiko vata kei Josefa ko Jiova ka vakatakila vua na nona yalololoma; ka sa daukune loloma e matai koya nai vakatawa ni valeniveivesu.

²² Ko koya nai vakatawa ni valeniveivesu sa lesi Josefa me lewa na tamata kecega sa vesu tiko e na valeniveivesu; ka sa vakatautaki vua na ka kecega era via cakava.

²³ Sa sega tale ni qai leqataka nai vakatawa ni valeniveivesu na veika sa tiko e na ruku ni lewa nei Josefa, ni sa tiko vata kei koya ko Jiova; kei na ka kecega sa cakava ko koya, a sa vakasaututaka ko Jiova.