Vakatekivu 32 - Ai Vola Tabu (Vakadewa Makawa Vakavoutaki 2021)

Vakavakarau ko Jekope me Sota kei Iso

¹ A sa lako tu e nona sala ko Jekope, a ra sa sota kaya na agilosi ni Kalou.

² Ia ni sa kunei ira ko Jekope, sa kaya, “Oqo na keba ni Kalou!” A sa vakatoka na yaca ni vanua ko ya ko Meeneimi.

³ A sa tala eso na mata ko Jekope me liu yani kivei Iso na tuakana, ki na vanua ko Sia, ki na vanua i Itomi.

⁴ A sa vakaroti ira, ka kaya, “Dou vosa vakaoqo vua na noqu turaga ko Iso: Sa kaya vakaoqo na nomuni tamata ko Jekope, ‘Au a sa tiko vulagi ga vei Lepani, ka'u sa dede kina, ka me yacova na gauna oqo;

⁵ ka sa tu vei au na bulumakau, kei na asa, na sipi, na tagane-bobula, kei na yalewa-bobula; ia ka'u sa qai talatala me'u tukuna vua na noqu turaga, ka me'u kune loloma e matamuni.’ ”

⁶ A ra sa lesu mai kivei Jekope nai talaki, ka ra kaya, “Keitou a lako vua na tuakamuni ko Iso, ka sa lako tiko mai ko koya me mai tavaki kemuni, kei ira vata kaya na tamata e lewe va na drau.”

⁷ A sa rere vakalevu ko Jekope, ka sa kidroa. A sa wasea rua na tamata era tiko kaya, kei na qele ni sipi, kei na bulumakau, kei na kameli,

⁸ ni sa kaya, “Kevaka sa lako mai ko Iso ki na dua nai wasewase ka mokuta, ena qai dro bula nai wasewase kadua.”

⁹ A sa kaya ko Jekope, “Na Kalou ni tamaqu ko Eparaama, kei na Kalou talega i Aisake na tamaqu, kemuni Jiova, ko ni a kaya vei au, ‘Mo lesu ki na nomu vanua, ka vei ira na wekamu, ka'u na caka vinaka vei iko’,

¹⁰ au sa sega ni yaga me'u rawata e dua na ka lailai e na nomuni loloma kecega, kei na nomuni vosa dina ko ni sa cakava vei au na nomuni tamata, ni'u a qalo kosova na Joritani oqo kei na noqu i titoko wale; ia oqo ka'u sa qai tubu me rua nai wasewase.

¹¹ Au masuti kemuni, mo ni vakabulai au mada mai na liga i Iso na tuakaqu, ni'u sa rerevaki koya; de sa lako mai ko koya ka mokuti au, kei ira vata na gone kei na tinadra.

¹² Ia ko ni a kaya, ‘Ka'u na caka vinaka vakaidina vei iko, ka vakatubura na nomu kawa me ra vaka na nuku mai matasawa, sa sega ni wili rawa ni ra sa lewe vuqa.’ ”

¹³ A sa moce mai kea e na bogi ko ya, ka sa taura mai na ka sa tiko vua me ka ni loloma vei Iso na tuakana,

¹⁴ e rua na drau na me yalewa, ka ruasagavulu na me tagane, e rua na drau na sipi yalewa ka ruasagavulu na sipi tagane,

¹⁵ e tolusagavulu na kameli yalewa kei na luvedra, e vasagavulu na bulumakau yalewa, ka tini na bulumakau tagane, ruasagavulu na asa yalewa, ka tini na luve ni asa.

¹⁶ A sa solia kivei ira na nona tamata, me lako vakai koya na qele ni manumanu yadua; a sa kaya vei ira na nona tamata, “Dou liu yani, ka me veilutuki toka na veiyawaki ni qele ni manumanu e dua kei na qele ni manumanu tale e dua.”

¹⁷ A sa vakarota vua na kenai matai, ka kaya, “Ni sa sotavi iko ko Iso na tuakaqu, ka tarogi iko, ‘A nei cei ko iko? Ko sa lako tiko kivei? A nei cei na ka oqo sa liu vei iko?’

¹⁸ mo qai kaya, ‘A nei Jekope na nomuni tamata; oqo nai loloma sa kau tiko vua na noqu turaga ko Iso; ka raica, sa muri keitou tiko mai ko koya.’ ”

¹⁹ A sa vakarota vakakina na kenai karua, kei nai katolu, kei ira kecega era muria na qele ni manumanu, ka sa kaya, “Dou tukuna talega na veika oqo vei Iso ni dou sa sota,

²⁰ ia dou kaya talega, ‘Ka raica, sa muri keitou tiko mai ko Jekope na nomuni tamata.’ ” Ni sa kaya ko koya, “Au na vakayalovinakataki koya taumada e na ka ni loloma sa liu yani, ia e muri ka'u na raica na matana; de sa na ciqomi au beka ko koya.”

²¹ A sa kau yani eliu na ka ni loloma; ka sa tiko vata ga kei ira ko koya e na bogi ko ya.

Sa Veimulomulo kei na Kalou mai Penieli ko Jekope

²² A sa cavu tu ko koya e na bogi ko ya, ka kauti rau na watina kei rau na vada, kei iratou na luvena tagane e le tinikadua, ka vuto-kosova na uciwai ko Japoki.

²³ A sa kauti ira, ka talai ira me ra vutokosova na uciwai, ia sa tala ki tai kadua na nona i yau.

²⁴ A sa tiko duadua ko Jekope. A sa veimulomulo kaya e dua na tamata ka yacova na kida ni mataka.

²⁵ Ia ni sa kunea ko koya sa sega ni gumatua vua, sa tara na veiuturi ni dibina; a sa mavule na veiuturi ni dibi i Jekope, ni sa veimulomulo tiko kaya.

²⁶ A sa kaya ko koya, “Mo laivi au mada me'u lako, ni sa voleka ni kida na mataka.” A sa kaya ko Jekope, “Au na sega ni laivi iko kevaka ko sega ni vosavakalougatataki au mada.”

²⁷ A sa kaya vua ko koya, “Ko cei na yacamu?” A sa kaya, “Ko Jekope.”

²⁸ A sa kaya, “Ena sega tale ni qai yacamu ko Jekope, ko Isireli ga, ni ko sa veiqaliqali kei na Kalou kei ira na tamata, ka ko sa gumatua.”

²⁹ A sa taroga ko Jekope, “Yalo vinaka mo ni tukuna mada mai vei au na yacamuni.” A sa kaya ko koya, “A cava ko sa taroga kina na yacaqu?” A sa vakalougatataki koya mai kea.

³⁰ A sa vakatoka kina ko Jekope na yaca ni vanua ko ya ko Penieli, ka tukuna, “Ni'u sa veirai mata kei na Kalou, ia ka'u sa bula ga.”

³¹ A sa cadra vua na mata-ni-siga ni sa lako tani mai Penueli, ka sa gera voli e na vuku ni dibina.

³² O koya oqo era sa sega ni kania kina na ua mai na veiuturi ni dibi ko ira na Isireli ka yacova na siga edaidai, ni sa tara ko koya na ua mai na veiuturi ni dibi i Jekope.