Vakatekivu 27 - Ai Vola Tabu (Vakadewa Makawa Vakavoutaki 2021)

Sa Vosavakalougatataki Jekope ko Aisake

¹ Ia ni sa qase mai ko Aisake, a sa buawa na matana, me sega ni rai rawa, sa qai kacivi Iso na luvena sa ulumatua, ka sa kaya vua, “Na luvequ”; a sa kaya ko koya, “Koi au oqo.”

² A sa kaya vua ko Aisake, “Raica, ka'u sa qase mai; au sa sega ni kila na siga ka'u na mate kina.

³ Ia oqo, mo kauta mada na nomu i yaragi, na nomu taga gasau kei na nomu dakai-titi, ka lako yani ki na veikau, ka vakasasa manumanu me kequ.

⁴ Mo qai cakava vei au na kakana sa kana vinaka ka'u sa vinakata, ka kauta mai vei au me'u kania, ka me'u na qai vosavakalougatataki iko ni bera ni'u qai mate.”

⁵ Ia ko Repeka sa rogoca ni sa vosa ko Aisake kivei Iso na luvena. A sa lako yani ki veikau ko Iso me tobo manumanu, ka me kauta mai.

⁶ A sa vosa vei Jekope na luvena ko Repeka, ka kaya, “Raica, ka'u a rogoca ni sa vosa ko tamamu vei Iso na tuakamu, ni sa kaya,

⁷ ‘Mo kauta mai vei au na manumanu sa vakasasataki, ka cakava vei au na kakana vinaka, me'u kana kina, ka'u na vosavakalougatataki iko e na mata i Jiova ni bera ni'u qai mate.’

⁸ Ia oqo, na luvequ, mo vakarorogo vei au e na ka ka'u sa vakarota vei iko.

⁹ Mo lako mada ki na qele ni me, ka kauta mai vei au e rua na luve ni me vinaka. Ia ka'u na vakarautaka me kakana vinaka me kei tamamu, me vaka sa dauvinakata ko koya.

¹⁰ Ka mo qai kauta vei tamamu me kania ko koya, ka me vosavakalougatataki iko ni se bera ni mate.”

¹¹ Ia sa kaya ko Jekope kivei Repeka na tinana, “Raica, ko Iso na tuakaqu sa tamata vutivutia, ia koi au ka'u sa tamata drulua.

¹² De yamoci au ko tamaqu, ia ka'u na qai vaka na dauveivakaisini vua, ka'u na vakatauca kina vei au na cudru ka segai na veivakalougatataki.”

¹³ A sa kaya vua ko tinana, “Me tau vei au na kena cudru ka me kakua vei iko, na luvequ; mo vakarorogo ga ki na noqu vosa, ka la'ki kauta mai vei au.”

¹⁴ A sa lako ka taura, ka kauta mai vei tinana; ka sa cakava na kakana vinaka ko tinana, me vaka na ka sa dauvinakata ko tamana.

¹⁵ A sa qai kauta mai ko Repeka nai sulu vinaka nei luvena qase ko Iso ka ra tu vua e vale, ka sa vakaisulutaki Jekope kina na luvena gone.

¹⁶ A sa vakaisulutaka na ligana kei na domona sa drulua e na kuli ni me.

¹⁷ A sa qai solia vei Jekope na luvena na kakana vinaka, kei na madrai, ka sa vakarautaka oti ko koya.

¹⁸ A sa lako vei tamana ko koya, ka kaya, “Kemuni na tamaqu”; a sa kaya ko koya, “Koi au oqo; ko cei ko iko, na luvequ?”

¹⁹ A sa kaya vei tamana ko Jekope, “Koi au ko Iso na nomu ulumatua. Au sa cakava na ka ko ni a kaya vei au. Mo ni duri mada, mo ni dabe ka kania na noqu manumanu sa vakasasataki, ka mo ni qai vosavakalougatataki au.”

²⁰ Ia sa kaya vua na luvena ko Aisake, “E yaco vakacava mo kunea rawa kina vakatotolo, na luvequ?” A sa kaya, “Ni sa kauta vakatotolo mai kivei au ko Jiova na nomuni Kalou.”

²¹ A sa qai kaya vei Jekope ko Aisake, “Toro mada mai, me'u yamoci iko, na luvequ, se dina ni ko sa luvequ ko Iso, se segai.”

²² A sa torovi Aisake na tamana ko Jekope; a sa vakayamoci koya ka sa kaya, “Na rorogo ni domo sa domo i Jekope, ia na liga sa liga i Iso.”

²³ A sa sega ni kilai koya, ni sa vutivutia na ligana me vaka na liga i Iso na tuakana; ka sa qai vosavakalougatataki koya.

²⁴ A sa kaya, “Ko iko dina li na luvequ ko Iso, se segai?” A sa kaya, “Sai au ga.”

²⁵ A sa qai kaya ko koya, “Kauta mai vei au, ka'u na kania na manumanu sa vakasasataka na luvequ, ka me'u vosavakalougatataki iko.” A sa kauta vua, a sa kana; ka sa kauta vua na waini, a sa gunu.

²⁶ Sa kaya qai vua ko Aisake na tamana, “Toro mada mai, ka reguci au, na luvequ.”

²⁷ A sa toro voleka, ka reguci koya; a sa boica nai boi ni nona i sulu, ka sa vosavakalougatataki koya, ka kaya, “Raica, nai boi kei luvequ sa vaka nai boi ni veiwere sa vakalougatataka ko Jiova.

²⁸ Ia me solia ga vei iko na Kalou na tegu kei lomalagi, kei na veika vinaka kei vuravura, ka levu na sila kei na waini.

²⁹ Me qaravi iko na veimataqali, ka cuva vei iko na veimatanitu. Mo turaga vei ira na tacimu, ia me ra cuva vei iko na luve i tinamu. Me cudruvi ko ira era cudruvi iko, ka me ra kalougata ko ira era vosavakalougatataki iko!”

Kerea ko Iso na Veivakalougatataki nei Aisake

³⁰ Ia ni sa vosavakalougatataki Jekope ko Aisake, ka sa qai lako tani walega ko Jekope mai vei Aisake na tamana, sa qai tale mai ko Iso na tuakana mai na nona vakasasa manumanu.

³¹ A sa cakava talega ko koya na kakana vinaka, ka kauta vei tamana, a sa kaya vei tamana, “Me duri mada na tamaqu, ka kania na manumanu sa vakasasataka na luvena, ka mo ni qai vosavakalougatataki au.”

³² A sa kaya vua ko Aisake na tamana, “Ko cei ko iko?” A sa kaya ko koya, “Koi au na luvemu, na nomu ulumatua, ko Iso.”

³³ A sa qai sautaninini vakalevu sara ko Aisake, ka kaya, “Ia ko cei beka ko koya sa vakasasa manumanu ka kauta mai vei au, ka'u sa kania oti ni ko se bera mai, ia ka'u sa vosavakalougatataki koya oti? Io, ena kalougata ko koya!”

³⁴ Ni sa rogoca na vosa i tamana ko Iso, sa tagi vakalevu ka qoqolou vakararawa sara, ka kaya vei tamana, “Mo vosavakalougatataki au, io koi au talega, na tamaqu!”

³⁵ Ia sa kaya, “Sa lako vaqaseqase mai ko tacimu, ka sa kauta na nomu vosa ni veivakalougatataki.”

³⁶ A sa kaya ko Iso, “Sa sega beka ni vakayacani dina ko koya ko Jekope? Ni sa qai vakarua oqo na nona cakacaka vaqaseqase vei au. Sa kauta tani eliu na noqu i tutu vakaulumatua. Ka raica, sa qai kauta tani tale oqo na noqu veivakalougatataki.” A sa kaya, “Sa sega beka ni vo tiko vei kemuni e dua nai votavota me'u vakalougatataki kina?”

³⁷ A sa vosa vei Iso ko Aisake, ka kaya, “Raica, ka'u sa qisi koya oti me nomu turaga, ka'u sa soli ira kecega na tacina me ra qaravi koya; au sa vakaukauwataki koya e na sila kei na waini. Ia na cava tale me'u qai cakava vei iko, na luvequ?”

³⁸ A sa kaya vei tamana ko Iso, “Sa dua bau li ga na nomuni vosa ni veivakalougatataki, na tamaqu? Mo vosavakalougatataki au mada, io koi au talega, i tamaqu!” A sa tabalaka na domona ko Iso, ka tagi.

³⁹ A sa qai vosa ko Aisake na tamana, a sa kaya vua, “Raica, na nomu i tikotiko ena yawa mai na veika vinaka kei vuravura, ka yawa mai na tegu mai lomalagi.

⁴⁰ Ko na bula e na nomu i seleiwau, ka ko na qaravi koya na tacimu; ia ena yaco ni ko sa kaukauwa, ko na qai musuka tani na nona i vau e domomu.”

Sa Dro Tani ko Jekope mai na Cudru nei Iso

⁴¹ A sa cati Jekope ko Iso e na vuku ni vosa ni veivakalougatataki sa vosavakalougatataki koya kina ko tamana. A sa kaya e lomana ko Iso, “Sa voleka mai na siga eda na tagicaki tamaqu kina; au na qai vakamatei Jekope na taciqu.”

⁴² Ia sa tukuni vei Repeka na vosa oqo ni nona ulumatua ko Iso; a sa veitalaki kina ka kacivi Jekope na luvena gone ka kaya vua, “Raica, na tuakamu ko Iso, sa vinakata me vakacegu na yalona e na vukumu, ni sa nakita me vakamatei iko.

⁴³ E na ka oqo, mo vakarorogo kina vei au na luvequ; ka cavu tu, ka dro vei Lepani na ganequ mai Karana,

⁴⁴ ka tiko kaya vakalailai mai kea, ka me oti mada na cudru katakata i tuakamu—

⁴⁵ ka me oti mada vei iko na cudru i tuakamu, ka sa guilecava na ka ko sa cakava vua. Au na qai talatala yani vei iko ka kauti iko mai kea. A cava na vuna mo drau yali ruarua kina vei au e na dua ga na siga?”

⁴⁶ A sa kaya vei Aisake ko Repeka, “Au sa lomaleqataka na noqu bula e na vukudra na goneyalewa ni Itaiti. Kevaka sa vakawati ko Jekope kei na dua vei ira na goneyalewa ni Itaiti me vakataki ira oqo, me dua vei ira na goneyalewa ni vanua oqo, a cava na kena yaga vei au na noqu bula?”