Vakatekivu 26 - Ai Vola Tabu (Vakadewa Makawa Vakavoutaki 2021)

Na Vosa ni Yalayala ni Kalou kivei Aisake

¹ A sa dausiga na vanua, ka duatani nai matai ni dausiga ka yaco e na gauna i Eparaama. A sa lako ko Aisake kivei Apimeleki na tui ni kai Filisitia, ki Kira.

² A sa rairai vua ko Jiova, ka kaya, “Mo kakua ni lako sobu ki Ijipita; mo tikotiko ga e na vanua ka'u a vosa kina vei iko.

³ Mo tiko vulagi ga e na vanua oqo, ia ka'u na tiko vata kei iko, ka vakalougatataki iko; ni'u na solia vei iko kei ira na nomu kawa na veivanua kecega oqo; ia ka'u na vakataudeitaka na noqu bubului vei Eparaama na tamamu.

⁴ Ia ka'u na vakalewevuqataka na nomu kawa me ra vaka na kalokalo kei lomalagi, ka solia talega na veivanua kecega oqo vei ira na nomu kawa; ena kalougata talega na veimatanitu kecega e vuravura e na nomu kawa,

⁵ ni sa vakarorogo ki na noqu vosa ko Eparaama, ka vakabauta na ka ka'u a lesia, na noqu i vakaro, na noqu i lesilesi, kei na noqu lewa.”

Ko Aisake kei Apimeleki

⁶ A sa tiko ga mai Kira ko Aisake.

⁷ Ia ko ira na tamata e na yasana ko ya ni ra sa tarogi koya e na vuku ni watina, a sa kaya ko koya, “A ganequ ko koya”; ni sa rere ni kaya, “A watiqu,” ni sa nanuma, “de ra na vakamatei au na tamata e na vanua ko ya e na vuku i Repeka, ni sa matavinaka ko koya.”

⁸ Ia ni sa tiko vakadede mai kea ko Aisake, sa iro yani e na katuba ko Apimeleki na tui ni kai Filisitia ka raici Aisake ni rau veiqitori tiko kei Repeka na watina.

⁹ A sa kacivi Aisake ko Apimeleki, ka kaya, Raica, sa dina ga sa watimu! Ia na cava ko a kaya kina, Sa ganequ ko koya? A sa kaya vua ko Aisake, E na vuku ni'u a kaya, De'u na qai vakamatei e na vukuna.

¹⁰ A sa kaya ko Apimeleki, A cava mada na ka oqo ko sa mai kitaka vei keimami? E rawarawa me veimoceri loa kei na watimu e dua vei ira na tamata, ia ko sa qai vakavuna vei keimami nai valavala ca.

¹¹ A sa vakaroti ira kecega na tamata ko Apimeleki, ka vaka, Ko koya sa tara na tamata oqo, se na watina, ena vakamatei vakaidina.

¹² A sa kabukaburaki e na vanua ko ya ko Aisake, ka kumuna na kena vakadrau e na yabaki ko ya; ka sa vakalougatataki koya ko Jiova.

¹³ A sa tubu me tamata yaco na tamata oqo, a sa toso cake ka tubu tiko me vutuniyau sara.

¹⁴ A sa taukena na qele ni sipi kei na bulumakau, ka sa lewe vuqa na nona tamata. A ra sa vuvutaki koya na kai Filisitia.

¹⁵ Ia nai keli-wai kecega era kelia na tamata nei tamana, e na gauna i Eparaama na tamana, era sa vakasosoga e na qele ko ira na kai Filisitia.

¹⁶ A sa kaya vei Aisake ko Apimeleki, “Mo lako tani vei keimami; ni ko sa kaukauwa sara, ka sa malumalumu koi keimami.”

¹⁷ A sa lako tani mai kea ko Aisake, ka birika na nona veivalelaca e na buca mai Kira, ka sa tiko mai kea.

¹⁸ A sa kelia tale ko Aisake nai keli-wai ka sa keli eliu e na gauna i Eparaama na tamana; ni ra sa vakasogota na kai Filisitia ni sa mate ko Eparaama; a sa vakayacana e na yaca ka vakatoka kina eliu ko tamana.

¹⁹ Ia ni ra sa kelikeli e na buca na tamata nei Aisake ka kunea kina e dua nai keli-wai vure,

²⁰ era sa qai veiletitaka ko ira nai vakatawa ni manumanu mai Kira kei ira nai vakatawa ni manumanu i Aisake, a ra sa kaya, “Sa neitou na wai.” A sa vakatoka kina ko koya na yaca ni keli-wai ko Eseki, e na vuku ni ra sa veileti kaya.

²¹ A ra sa qai kelia e dua tale nai keli-wai, ka ra sa veileti talega kina; a sa vakayacana kina ko koya ko Sitina.

²² A sa toki tani mai kea ka kelia e dua tale nai keli-wai, ka ra sa sega ni veiletitaka; a sa vakayacana ko koya ko Riopoci, ni sa kaya, “Sa qai vakalalagataki keda ko Jiova, ia eda na qai tubu e na vanua oqo.”

²³ A sa lako cake mai kea ki Peri-sepa.

²⁴ A sa rairai vua ko Jiova e na bogi ko ya, ka kaya, “Koi au na Kalou i Eparaama na tamamu; kakua ni rere, ni'u sa tiko vata kei iko, ia ka'u na vakalougatataki iko, ka vakalewevuqataka na nomu kawa, e na vuku i Eparaama na noqu tamata.”

²⁵ A sa cakava mai kea e dua nai cabocabo-ni-soro, ka masuta na yaca i Jiova, a sa birika mai kea na nona valelaca. A ra sa kelia mai kea e dua nai keli-wai na tamata i Aisake.

Veiyalayalati ko Aisake kei Apimeleki

²⁶ A sa lako vua ko Apimeleki mai Kira kei Ausaci e dua na nona i tokani, kei Fikoli na kavetani ni nona mataivalu.

²⁷ A sa kaya vei iratou ko Aisake, “A cava dou sa lako mai kina vei au, ni dou sa cati au, ka talai au tani vei kemudou?”

²⁸ A ratou sa kaya, “Keitou a kunea vakaidina ni sa tiko kei kemuni ko Jiova; ia keitou a kaya, me dua mada na bubului vei kedatou, io vei keitou kei kemuni, me keitou ia talega na veiyalayalati kei kemuni

²⁹ mo ni kakua kina ni vakacacani keitou, me vaka ga ni keitou a sega ni vakacacani kemuni, ni keitou sa sega ni cakava vei kemuni e dua na ka ca, na ka vinaka ga, ka sa talai kemuni yani e na vakacegu. Koi kemuni sa vakalougatataki vei Jiova.”

³⁰ A sa caka magiti vei iratou ko koya, a ratou sa kana ka gunu.

³¹ A ratou sa sou e na mataka, ka bubului vakai iratou. A sa talatala vei iratou ko Aisake, a ratou sa lako tani vua e na vakacegu.

³² Ia e na siga dina ko ya, era sa lako mai na tamata nei Aisake, ka tukutuku vua e na vuku ni keli-wai era sa kelia, ka vaka, “Keitou sa kunea na wai!”

³³ A sa vakayacana ko koya ko Sepa; o koya sa vakatokai kina na yaca ni koro ko ya ko Peri-sepa me yacova na gauna oqo.

Yalewa Tani e Wati Iso

³⁴ Ia ni sa vasagavulu na yabaki i Iso, sa vakawati kei Jutici, ko koya na luve i Pieri vei ira na Itaiti, kei Pasemaca na luve i Eloni vei ira na Itaiti;

³⁵ ia koi rau oqo sa rarawa kina na loma i Aisake kei Repeka.