Vakatekivu 24 - Ai Vola Tabu (Vakadewa Makawa Vakavoutaki 2021)

Na Vakawati nei Aisake

¹ A sa qase mai ko Eparaama, sa vuqa na nona yabaki. A sa dauvakalougatataki Eparaama ko Jiova e na ka kecega.

² A sa kaya ko Eparaama vua na nona dauniveiqaravi, o koya sa qase e nona vale, ko koya ka lewa na nona ka kecega, “Mo daramaka mada na ligamu ki ruku ni sagaqu,

³ ka'u na vakayacori iko mo bubului mada vei Jiova, ko koya na Kalou ni lomalagi kei na Kalou ni vuravura, ka mo kakua kina ni kauta mai e dua me watina na luvequ mai vei ira na goneyalewa ni Kenani, ko ira ka'u tiko e na kedra maliwa.

⁴ Ia mo lako ki na noqu vanua, vei ira na wekaqu, ka kauta mai kina e dua me watina na luvequ ko Aisake.”

⁵ A sa kaya vua na dauniveiqaravi ko ya, “Ia de sa na sega ni via muri au mai ki na vanua oqo na yalewa; me'u kauta tale vakaidina beka na luvemu ki na vanua ko a lako mai kina?”

⁶ A sa kaya vua ko Eparaama, “Mo qarauna vinaka mo kakua ni qai kauta tale ki kea na luvequ.

⁷ Ko Jiova, ko koya na Kalou ni lomalagi, ko koya ka kauti au tani mai na vale nei tamaqu, kei na nodra vanua na wekaqu, ia ko koya ka vosa vei au, ka bubului vei au, ka kaya, ‘Au na solia na vanua oqo vei ira na nomu kawa,’ ko koya ena tala na nona agilosi me liutaki iko, ia ko na kauta mai kina e dua me watina na luvequ.

⁸ Ia kevaka sa na sega ni via muri iko mai na yalewa, ko na sega ni cala e na vuku ni nomu bubului vei au; ia mo kakua ga ni kauta tale ki kea na luvequ.”

⁹ A sa daramaka na ligana na dauniveiqaravi ki na ruku ni saga i Eparaama na nona turaga, ka sa bubului vua e na vuku ni ka ko ya.

¹⁰ Ia na tamata ko ya ka kauta e tini na kameli mai vei ira na kameli ni nona turaga, a sa lako; ni sa lewa ko koya nai yau kecega ni nona turaga; a sa ia, ka lako ki Mesopotemia, ki na koro i Neori.

¹¹ A sa lewa na nona kameli me ra tekiduru sobu e nai bili ni koro, mai na dua nai keli-wai, ni sa yakavi mai, io e na gauna era sa daulako yani kina na yalewa me taki wai.

¹² A sa kaya, “Kemuni Jiova, na Kalou i Eparaama na noqu turaga, au masuti kemuni mo ni vakayacora na ka ka'u sa talai kina e na siga oqo, ka vakatakila na yalololoma vei Eparaama na noqu turaga.

¹³ Raica, au sa wavu tu oqo e nai keli-wai, ka ra sa lako tiko mai na nodra goneyalewa na lewe ni koro me ra taki wai.

¹⁴ Ia mo ni vakayacora mada vua na goneyalewa ka'u na kaya vua, ‘Yalo vinaka, mo tauca sobu mada na nomu saqa me'u bau gunu,’ ka me na qai kaya ko koya, ‘Mo gunu mada, ka'u na vagunuvi ira talega na nomu kameli’ — me sai koya mada ga ko ni sa lesia me nona na nomuni tamata ko Aisake. E na ka oqo ka'u na qai kila kina ni kemuni sa vakatakila na yalololoma vua na noqu turaga.”

¹⁵ A sa yaco, ni se vosa tikoga ko koya, ka sa raici Repeka, na luve i Pecueli, o koya na luve i Milika, na wati Neori, na tuakai Eparaama, ni sa lako mai ka sa colata tu na nona saqa ni wai.

¹⁶ A sa matavinaka sara na goneyalewa oqo, a goneyalewa tabu-tagane, ni se sega na tagane erau veiyacovi kaya. A sa lako sobu ki nai keli-wai, ka vakasinaita na nona saqa, ka cabe tale mai.

¹⁷ A sa cici na dauniveiqaravi me la'ki tavaki koya, ka sa kaya, “Yalo vinaka, kerea mo vagunuvi au mada vakalailai e na wai mai na nomu saqa.”

¹⁸ A sa kaya ko koya, “Ni gunu saka ga, noqu turaga,” ka sa vakusarawa ni tauca sobu ki na ligana na nona saqa, ka vagunuvi koya.

¹⁹ Ia ni sa vagunuvi koya oti, a sa kaya, “Au na takiva talega na medra na nomu kameli, ka me yacova ni ra sa gunu kece sara.”

²⁰ A sa vakusarawa ko koya, ka sova maca na nona saqa ki loma ni gunugunu ni manumanu, ka cici tale ki nai keli-wai me taki, a sa takiva na medra na nona kameli kece sara.

²¹ A sa kurabuitaki koya na dauniveiqaravi, ka tiko lo, ka me kila mada se sa vakayacora na ka sa talai koya kina ko Jiova, se segai.

²² Ia ni ra sa gunu oti na kameli, sa taura na dauniveiqaravi e dua na sau koula, na kena bibi e veimama na sikeli, ka rua na qato ni ligana, e tini na sikeli koula na kedrau bibi.

²³ A sa kaya, “A luve i cei ko iko? Mo tukuna mada mai vei au. Sa dua beka na tikina e na vale nei tamamu me keitou moce kina, se segai?”

²⁴ A sa kaya vua, “Koi au na luve i Pecueli, ko koya na luvedrau ko Milika kei Neori.”

²⁵ Sa kaya talega vua, “Sa levu vei keitou na co ni sila kei na kedra na manumanu, kei na tikina mo dou moce kina.”

²⁶ A sa cuva na dauniveiqaravi ka vakarokoroko vei Jiova.

²⁷ A sa kaya, “Me vakavinavinakataki ko Jiova na Kalou ni noqu turaga ko Eparaama, ko koya sa vakayacora tiko na nona loloma kei na nona vosa dina vua na noqu turaga. Ia koi au, ni'u a lako tu e na sala, sa tuberi au ko Jiova ki na nodra vale na wekana na noqu turaga.”

²⁸ A sa cici yani na goneyalewa, ka tukuna vei ira na lewe-ni-vuvale i tinana na ka oqo.

²⁹ A sa dua na gane i Repeka, na yacana ko Lepani. A sa cici yani ki vua na dauniveiqaravi ko Lepani, ki nai keli-wai.

³⁰ Ia ni sa kunea na sau, kei na qato e na liga i ganena, ka rogoca na vosa i Repeka na ganena, ni sa kaya, “Sa vosa vakaoqo vei au na tamata oqo,” a sa qai lako ko koya vua na tamata ko ya; ka raica, ni sa tu vata kei na kameli mai nai keli-wai.

³¹ A sa kaya ko koya, “Mo ni curu mai, koi kemuni sa vakalougatataki mai vei Jiova. A cava tale mo ni tu kina e tautuba ni ka'u sa vakarautaka oti na vale kei na tikina me nodra na kameli?”

³² A sa curu ki vale na tamata; a sa luvata ko Lepani nai vodovodo ni kameli, ka sa solia na co ni sila kei na kedra na kameli, kei na wai me vui kina na yavana kei na yavadratou na tamata eratou tiko kaya.

³³ A sa tau e matana na kakana; ka sa kaya ko koya, “Au na sega ni kana me yacova ni'u sa tukuna taumada na ka ka'u sa talai mai kina.” A sa kaya ko Lepani, “Mo tukuna mada.”

³⁴ A sa kaya ko koya, “Koi au na dauniveiqaravi nei Eparaama.

³⁵ A sa vakalougatataka vakalevu na noqu turaga ko Jiova, ka sa tubu me turaga levu; a sa solia vua na qele ni sipi eso, na qele ni bulumakau eso, na siliva kei na koula, na tagane-bobula kei na yalewa-bobula, na kameli kei na asa.

³⁶ Ia ko Sera, na watina na noqu turaga, sa vakasucuma e dua na luvena tagane na noqu turaga ni sa qase sara; ka sa solia vua na nona ka kecega.

³⁷ A sa vakayacori au me'u vosa bubului na noqu turaga, ka sa kaya, ‘Mo kakua ni kauta vua na luvequ e dua me watina mai vei ira na goneyalewa ni kai Kenani, a nodra vanua ka'u sa tiko kina;

³⁸ ia mo lako ga ki na vale nei tamaqu, vei ira na wekaqu, ka kauta mai e dua me watina na luvequ.’

³⁹ Ka'u a mani kaya vua na noqu turaga, ‘De sa sega ni via muri au na yalewa.’

⁴⁰ Ia sa kaya vei au ko koya, ‘Ko Jiova, ko koya ka'u sa dau bula voli e matana, ena tala na nona agilosi kei iko, ka vakayacora na ka ko sa talai kina. Ia ko na kauta mai e dua me watina na luvequ mai vei ira na wekaqu, mai na vale i tamaqu.

⁴¹ Ko na qai vakagalalataki kina mai na nomu bubului vei au, ni ko sa yaco vei ira na wekaqu; ia kevaka mada ga era na sega ni solia e dua vei iko, ko na vakagalalataki ga mai na nomu bubului vei au.’

⁴² “Ia ka'u a lako mai edaidai ki nai keli-wai, ka'u a qai kaya, ‘I Jiova, na Kalou ni noqu turaga ko Eparaama, mo ni yalo vinaka mada mo ni vakayacora na ka ka'u sa talai mai kina!

⁴³ Raica, au sa wavu tu oqo e nai keli-wai; mo ni vakayacora mada vua na goneyalewa ka sa lako mai me taki, ka'u sa kaya vua, “Yalo vinaka, mo tauca sobu mada na nomu saqa me'u bau gunu,”

⁴⁴ ka me qai kaya vei au ko koya, “Mo gunu mada, ka'u na vagunuvi ira talega na nomu kameli”—me sai koya mada ga ko ni sa lesia me nona na luve ni noqu turaga.’

⁴⁵ “Ni'u se bera ni'u vosa oti e lomaqu, raica, sa lako mai ko Repeka, ka colata tu na nona saqa; a sa lako sobu ki nai keli-wai, ka taki mai. Ka'u sa qai kaya vua, ‘Yalo vinaka, mo vagunuvi au mada.’

⁴⁶ A sa kusarawa ko koya, ka tauca sobu na nona saqa, a sa kaya, ‘Mo gunu, ka'u na vagunuva talega na nomu kameli.’ Au a qai gunu, a sa vagunuva talega na kameli ko koya.

⁴⁷ Au a qai taroga, ka vaka, ‘A luve i cei ko iko?’ A sa kaya, ‘Koi au na luve i Pecueli, ko koya ka luve i Neori, kei Milika.’ Au a qai daramaka na sau ki na ucuna kei na qato ki na ligana.

⁴⁸ Au a qai cuva, ka vakarokoroko vei Jiova, ka vakavinavinaka vei Jiova, na Kalou i Eparaama na noqu turaga, ko koya ka tuberi au e na sala dodonu me'u rawata kina na luvena yalewa na tuakana na noqu turaga me watina na luvena.

⁴⁹ Ia oqo, kevaka dou sa via caka vakayalololoma ka dina vua na noqu turaga, dou tukuna vei au; ia kevaka e segai, dou tukuna vei au, ka me'u gole kina ki nai matau se ki nai mawi.”

⁵⁰ Erau sa qai vosa ko Lepani kei Pecueli, ka kaya, “A ka oqo sa vakayacora ko Jiova; e dredre ni keitou vosataka vei iko na ka ca se na ka vinaka.

⁵¹ Raica, sa tiko oqo ko Repeka, mo kauti koya ka drau lako, me la'ki watina na luve ni nomu turaga, me vaka sa kaya ko Jiova.”

⁵² Ia ni sa rogoca na nodrau vosa na tamata nei Eparaama, sa cuva ki na qele vei Jiova.

⁵³ Ia na tamata ko ya sa tara mai na ka sa caka e na siliva, kei na ka sa caka e na koula, kei nai sulu, ka solia kivei Repeka; sa solia talega na ka talei vua na ganena kei na tinana.

⁵⁴ A ratou a kana ka gunu, ko koya kei na tamata eratou tiko kaya, ka moce. Ni ratou sa yadra cake e na mataka, a sa kaya ko koya, “Mo dou talaci au mada me'u sa lesu tale vua na noqu turaga.”

⁵⁵ A rau sa kaya ko ganena kei tinana, “Me tiko bogi vica mada vei keitou na goneyalewa, ke bogi tini walega; ka me qai lako ko koya.”

⁵⁶ Ia sa kaya vei iratou ko koya, “Dou kakua ni tarovi au, ni sa vakayacora ko Jiova na ka ka'u sa talai kina; dou vakatalai au lesu me'u lako vua na noqu turaga.”

⁵⁷ A ratou sa kaya, “Keitou na kacivi koya mada na goneyalewa, ka tarogi koya.”

⁵⁸ A ratou sa qai kacivi Repeka, ka kaya vua, “Ko na lako kei na tamata oqo, se segai?” A sa kaya ko koya, “Au na lako.”

⁵⁹ A ratou sa qai talaci Repeka na wekadratou kei na nona i mei, kei koya na dauniveiqaravi nei Eparaama kei iratou na nona tamata.

⁶⁰ A ratou sa vosavakalougatataki Repeka, ka kaya vua, “Me yaco ko iko, na neitou goneyalewa mo tinadra na oba vakaudolu; ka me ra rawa na matamata-ni-koro ni nodra meca ko ira na nomu kawa.”

⁶¹ A sa cavu tu ko Repeka kei iratou na nona goneyalewa, a ratou sa vodoka na kameli, ka muria na tamata; a sa kauti Repeka na dauniveiqaravi, ka lako yani.

⁶² Ia ko Aisake sa lako mai na sala sa lako ki nai keli-wai ko Leai-roi; ni sa tiko mai na vanua ki na ceva.

⁶³ A sa lako yani ko Aisake ki na veiwere e na yakavi me vakanananu; a sa ta cake, ka rai yani, ka raica, sa lako mai na kameli.

⁶⁴ A sa ta cake ko Repeka, ia ni sa raici Aisake, sa qai lako sobu mai na kameli

⁶⁵ ka tarogi koya na dauniveiqaravi, “Ko cei na tamata ko ya sa lako mai e na veiwere me mai tavaki kedatou?” A sa kaya na dauniveiqaravi, “Ko ya na noqu turaga.” A sa qai taura ko koya nai ubi ni matana, ka ubi koya.

⁶⁶ A sa tukuna vei Aisake na dauniveiqaravi na ka kecega sa cakava ko koya.

⁶⁷ A sa qai kauti Repeka mai ko Aisake ki na valelaca i Sera na tinana. A sa tauri Repeka, ka sa yaco me watina; a sa lomani koya. A sa vakacegui kina ko Aisake ni sa mate ko tinana.