Vakatekivu 22 - Ai Vola Tabu (Vakadewa Makawa Vakavoutaki 2021)

Nai Vakaro me Vakacabori ko Aisake

¹ Sa oti na veika oqori, sa qai vakatovolei Eparaama na Kalou, a sa kaya vua, “I Eparaama!” A sa kaya ko koya, “Koi au saka oqo, noqu Turaga.”

² A sa kaya ko koya, “Mo kauta mada na luvemu, na luvemu e dua bauga, ko Aisake ko sa lomana, ka lako ki na vanua mai Moraia, ka vakacabori koya kina mei soro kama e na dua na ulunivanua ka'u na vakatakila vei iko.”

³ A sa sou e na mataka ko Eparaama, ka vauca nai vodovodo ki na nona asa, ka kauta vata kaya e le rua na nona cauravou, kei Aisake na luvena, ka taya na buka ni soro kama, ka ia, ka lako vaka ki na yasana ka vosa kina vua na Kalou.

⁴ Ia e na kenai katolu ni siga sa ta cake ko Eparaama, ka raica na vanua ni sa tu vakayawa yani.

⁵ A sa kaya ko Eparaama vei rau na nona cauravou, “Drau tiko ga eke kei na asa; ia ka'u na lako yani vata kei na gone ki na vanua ko ya me la'ki vakacaboisoro, ka qai lako tale mai vei kemudrau.”

⁶ A sa taura na buka ni soro kama ko Eparaama, ka tauca vei Aisake na luvena, ka sa kauta e ligana na buka sa waqa kei nai sele. E rau sa qai lako vata ruarua yani.

⁷ A sa vosa vei Eparaama na tamana ko Aisake, ka kaya, “I Ratu!” A sa kaya, “Koi au oqo, na luvequ.” A sa kaya ko Aisake, “Sa tu oqo na buka kei na buka sa waqa, ia sa evei ga na lami mei soro kama?”

⁸ A sa kaya ko Eparaama, “Na luvequ, ena vakarautaka na Kalou na lami mei soro kama.” A rau sa qai lako ruarua vata yani.

⁹ Ia ni rau sa yaco ki na vanua ka vosa kina vua na Kalou, a sa tara e kea nai cabocabo-ni-soro ko Eparaama ka sa tuva na buka. A sa vesuki Aisake na luvena, ka vakotora ki nai cabocabo-ni-soro e na dela ni buka.

¹⁰ A sa dodoka na ligana ko Eparaama, ka taura nai sele, ka me vakamatea na luvena.

¹¹ Ia sa qai kacivi koya mai lomalagi ko koya na agilosi i Jiova, ka sa kaya, “I Eparaama, i Eparaama!” A sa kaya ko koya, “Koi au ga oqo.”

¹² Sa qai kaya ko koya, “Mo kakua ni dodoka na ligamu vua na gone, ia mo kakua ni kitaka vua e dua na ka; ni'u sa qai kila oqo ni ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga.”

¹³ A sa ta cake ko Eparaama, ka vakararai, ka sa raica sa tiko mai dakuna e dua na sipi tagane sa tacori e na taba-ni-kau na kenai leu. A sa la'ki kauta mai na sipi tagane ko Eparaama, ka vakacabora mei soro kama mei sosomi kei luvena.

¹⁴ A sa vakatoka kina na yaca ni vanua ko ya ko Eparaama ko “Jiova-jaire”; me vaka sa kainaki ka yacova na siga oqo, “Mai na ulunivanua ena vakarautaka ko Jiova.”

¹⁵ A sa kaci vakarua vei Eparaama mai lomalagi ko koya na agilosi i Jiova,

¹⁶ ka kaya, “Sa vaka ko Jiova, Au sa bubului ki na yacaqu: Ni ko sa cakava na ka oqo, ka sa sega ni bureitaka na luvemu, na luvemu e dua bauga,

¹⁷ au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi kei na nuku mai matasawa. Ia ena taukena na matamata-ni-koro ni nodra meca ko ira na nomu kawa,

¹⁸ ena kalougata talega na veimatanitu kecega e vuravura mai vei ira na nomu kawa, ni ko a vakarorogo ki na domoqu.”

¹⁹ A sa lesu tale vei rau na nona cauravou ko Eparaama; a ratou sa cavu tu ka lako vata ki Peri-sepa. A sa tiko mai Peri-sepa ko Eparaama.

Na Kawa i Neori

²⁰ Sa oti na ka oqo sa tukuni vei Eparaama, ka vaka, “Raica, ko Milika, sa vakasucu gone talega era luvei Neori na tuakamu:

²¹ ko Usa na nona ulumatua, kei Pusa na tacina, kei Kemueli na tama i Erami,

²² kei Kiseti, kei Eso, kei Pilitasa, kei Jetilafi, kei Pecueli.”

²³ Ia sa luve i Pecueli ko Repeka. Ko iratou na lewe walu oqo sa vakasucuma ko Milika, na tamadratou ko Neori na tuakai Eparaama.

²⁴ A watina lailai talega, na yacana ko Reuma, sa vakasucumi Tipa, kei Keama, kei Teasi, kei Meeka.