Vakatekivu 21 - Ai Vola Tabu (Vakadewa Makawa Vakavoutaki 2021)

Na Sucu i Aisake

¹ A sa talevi Sera ko Jiova me vaka ka kaya eliu, a sa cakacaka vei Sera ko Jiova me vaka na nona vosa.

² A sa kunekune ko Sera, ka vakasucuma vei Eparaama e dua na luvena tagane ni sa qase mai ko koya, e na gauna sa lokuci, ka sa vosa kina vua na Kalou.

³ Ia ko Eparaama sa vakayacana na luvena ko Aisake, o koya ka vakasucuma ko Sera.

⁴ A sa cilivi Aisake na luvena ko Eparaama, ni sa qai bogi walu, me vaka ka vakarota vua na Kalou.

⁵ A sa dua na drau na yabaki i Eparaama, ni sa sucu na luvena ko Aisake.

⁶ A sa kaya ko Sera, “Sa vakadredrei au na Kalou; era na dredre vata kei au ko ira kecega era na rogoca.”

⁷ Sa kaya talega ko koya, “Ko cei mada e bau kaya vei Eparaama eliu ni na qaravi gone ko Sera? Ia oqo ka'u sa vakasucuma e dua na luvena tagane ni sa qase cake sara ko koya.”

Rau Vakatalai Tani ko Eka kei Isimeli

⁸ A sa tubu na gone, ka sa kali. A sa cakava e dua na magiti levu ko Eparaama e na siga ka kali kina ko Aisake.

⁹ Ia ko Sera sa raica na luvedrau ko Eka na yalewa ni Ijipita kei Eparaama, ni qito voli kei Aisake na luvena.

¹⁰ A sa kaya kina vei Eparaama ko koya, “Mo vakatala yani na yalewa bobula oqo kei na luvena; ni na sega ni taukena vata na luvena na yalewa bobula oqo kei na luvequ ko Aisake.”

¹¹ A sa ka ni rarawa sara vei Eparaama na ka oqo e na vuku ni luvena.

¹² A sa kaya vei Eparaama na Kalou, “Me kakua ni ka ni rarawa vei iko e na vuku ni gone, kei na vuku talega ni nomu yalewa bobula. Na ka kecega sa kaya vei iko ko Sera, mo vakayacora, ni na vakatokai me nomu na kawa mai vei Aisake.

¹³ Ia ko koya na luvena na yalewa bobula, ka'u na vakatuburi koya talega me dua na matanitu, ni sa nomu kawa.”

¹⁴ A sa sou e na mataka ko Eparaama, ka kauta na kakana, kei na saqa wai, ka solia vei Eka, ka biuta ki na usouso ni domona, kei na gone, ka vakatala yani. A sa lako yani ko koya, a sa lako sese voli mai na loma ni vanua lala mai Peri-sepa.

¹⁵ Ni sa maca na saqa, a sa biuta na gone ko koya ki na dua na ruku ni vunikau.

¹⁶ A sa la'ki tiko me donuya, sa vaka beka na kena yawa sa vanataki e dua na gasau; ni sa kaya ko koya, “Isa, me'u kakua ni raica ni sa ciba na gone.” A sa tiko donuya, a sa tabalaka na domona, ka tagi.

¹⁷ A sa rogoca na domo ni gone na Kalou; a sa kaci vei Eka na agilosi ni Kalou mai lomalagi, ka sa kaya vua, “A cava ko lomaleqa kina, Eka? Kakua ni rere; ni sa rogoca na Kalou na domo ni gone e na tikina sa koto kina.

¹⁸ Mo tu cake, mo keveta cake na gone, ka taura e ligamu; ni'u na vakayacori koya me dua na matanitu levu.”

¹⁹ A sa qai dolava na matana na Kalou, ka sa kunea e dua nai keli-wai. A sa lako ko koya, ka vakasinaita na saqa e na wai, ka vagunuva na gone.

²⁰ A sa tiko kei na gone na Kalou, ka sa tubu ko koya. A sa bula voli e na loma ni vanua lala, ka sa yaco me tamata dauvavana ni dakaititi.

²¹ A sa tiko mai na vanua lala mai Perana; a sa kauta vua ko tinana e dua me watina mai na vanua ko Ijipita.

Rau Veiyalayalati ko Eparaama kei Apimeleki mai Peri-sepa

²² Ia e na gauna ko ya, erau a vosa vei Eparaama ko Apimeleki kei Fikoli na kavetani ni nona mataivalu, ka rau kaya, “Sa tiko vata kei iko na Kalou e na ka kecega ko sa cakava.

²³ O koya oqo mo bubului eke vei au e na mata ni Kalou ni ko na sega ni valavala vakailasu vei au, se vua na luvequ, se vua na makubuqu. Mo kitaka ga vei au, ki na vanua talega ko sa tiko vulagi kina, me vaka na loloma ka'u sa kitaka vei iko.”

²⁴ A sa kaya ko Eparaama, “Au sa vosa bubului kina.”

²⁵ Ni sa vunauci Apimeleki ko Eparaama e na vuku ni keli-wai era kovea na tamata nei Apimeleki,

²⁶ a sa kaya ko Apimeleki, “Au sa sega ni kila se ko cei sa kitaka na ka oqo; ia ko iko talega ko a sega ni mai tukuna vei au, ka'u a sega talega ni rogoca eliu, ia ka'u sa qai kila ga oqo edaidai.”

²⁷ A sa qai kauta kina na sipi kei na bulumakau ko Eparaama ka solia vei Apimeleki, ka rau sa ia na veiyalayalati koi rau.

²⁸ A sa taura e vitu na lami yalewa ko Eparaama ka biuti iratou vakatikitiki.

²⁹ A sa kaya vei Eparaama ko Apimeleki, “Sa vakaevei na lami yalewa e vitu oqo ko sa biuti iratou vakatikitiki?”

³⁰ A sa kaya, “Mo na ciqoma na lami yalewa e vitu oqo mai na ligaqu, me yaco kina mo noqu i vakadinadina ni ka'u a kelia nai keli-wai oqo.”

³¹ O koya sa vakatokai kina na tikina ko ya ko Peri-sepa; ni rau a bubului ruarua.

³² A rau sa ia na veiyalayalati mai Peri-sepa; sa qai cavu tu ko Apimeleki, kei Fikoli na kavetani ni nona mataivalu, a rau a lesu tale ki na vanua ko Filisitia.

³³ A sa tea mai Peri-sepa e dua na kau ko Eparaama, ka masuta mai kina na yaca i Jiova, na Kalou e Sega ni Mudu.

³⁴ A sa vuqa na siga sa tiko kina ko Eparaama e na vanua ko Filisitia.