Vakatekivu 17 - Ai Vola Tabu (Vakadewa Makawa Vakavoutaki 2021)

Na Cilivi me Vakatakilakila ni Veiyalayalati

¹ Sa ciwasagavulu ka ciwa na yabaki i Eparama, sa qai rairai vei Eparama ko Jiova, a sa kaya vua, “Koi au na Kalou Kaukauwa; me dodonu na nomu i valavala vei au, ka mo kakua ni cala.

² Ia ka'u na vakayacora na noqu veiyalayalati kei iko, ka vakalewevuqataki iko vakalevu sara.”

³ A sa cuva vakatoboicu ko Eparama; ka sa vosa vua na Kalou, ka kaya,

⁴ “Raica, sa tiko kei iko na noqu veiyalayalati, ia ko na tamadra na matanitu e vuqa.

⁵ Ena sega tale ni vakatokai me yacamu ko Eparama, ia sa na yacamu ga ko Eparaama; ni'u sa lewa vei iko mo tamadra na matanitu e vuqa.

⁶ Ia ka'u na vakalewevuqataka sara na nomu kawa, ka'u na vakatubura mai vei iko na matanitu eso, a ra na tubu mai vei iko na tui eso.

⁷ Ka'u na vakataudeitaka na noqu veiyalayalati kei iko, kei ira talega na nomu kawa, e na nodra i tabatamata kecega, ka me veiyalayalati e tawa mudu, ka me'u sa nomu Kalou, ka me'u nodra Kalou talega na nomu kawa.

⁸ Ia ka'u na solia vei iko kei ira na nomu kawa, na vanua ko sa tiko vulagi kina, a vanua taucoko ko Kenani, ka me ra taukena ka tawa mudu; ia ka'u na nodra Kalou.”

⁹ Sa kaya talega vei Eparaama na Kalou, “Mo maroroya na noqu veiyalayalati, ko iko, kei ira na nomu kawa era na muri iko, e na nodra i tabatamata kecega.

¹⁰ Oqo na noqu veiyalayalati kei kemudou kei na nomu kawa, mo dou maroroya: Me ra cilivi taucoko sara na nomudou gonetagane.

¹¹ Dou ciliva na kuli ni vusomudou; ia sa na kenai vakatakilakila oqo ni noqu veiyalayalati kei kemudou.

¹² Ia ko koya vei kemudou sa bogi walu ena cilivi, na gonetagane kecega e na nomudou i tabatamata kecega, ko koya sa sucu e vale, kei koya sa voli e nai lavo mai vua na kai tani sa sega ni nomu kawa.

¹³ Me cili ga ko koya sa sucu e nomu vale, kei koya sa voli e na nomu i lavo. Ia e na tu e na lewemudou nai vakatakilakila ni noqu veiyalayalati, me veiyalayalati ka tawa mudu.

¹⁴ Ia na gonetagane sa sega ni cilivi ena muduki tani mai vei ira na kai nona; ni sa voroka ko koya na noqu veiyalayalati.”

Sa Vosaniyalayalataki na Sucu nei Aisake

¹⁵ Sa kaya talega vei Eparaama na Kalou, “Ko Serai na watimu, mo kakua tale ni vakatoka na yacana ko Serai, ia sa na yacana ga ko Sera.

¹⁶ Ia ka'u na vakalougatataki koya, ka solia me sucu mai vua e dua na luvemu tagane. Io, ka'u na vakalougatataki koya, ena tubu talega mai vua na matanitu eso; a nodra turaga lelevu na veimataqali ena tubu mai vua.”

¹⁷ A sa cuva vakatoboicu ko Eparaama, a sa dredre, ni sa kaya e lomana, “Ena sucu beka na gone vua sa qai dua na drau na nona yabaki? Ia ena vakasucu beka ko Sera, ni sa qai ciwasagavulu na nona yabaki?”

¹⁸ A sa kaya vua na Kalou ko Eparaama, “Isa, me bula mada ga e matamuni ko Isimeli!”

¹⁹ A sa kaya na Kalou, “E segai, ia ena sucu vakaidina e dua na luvemu-tagane vei Sera na watimu; ia ko na vakatoka na yacana ko Aisake. Ia ka'u na vakataudeitaka vua na noqu veiyalayalati me veiyalayalati ka tawa mudu, vei ira na nona kawa era na muri koya.

²⁰ Ia ko Isimeli talega, ka'u sa rogoci iko e na vukuna; raica, ka'u na vakalougatataki koya ka na lewe vuqa mai na luvena, ka'u na vakalevutaki koya vakalevu sara; e le tinikarua na ravouvou ena vakatubura, io ka'u na vakamatanitulevutaki koya.

²¹ Ia ka'u na vakataudeitaka ga na noqu veiyalayalati kei Aisake, ko koya na luvemu vei Sera, o koya ena sucu mai e na gauna vata oqo e na yabaki mai oqo.”

²² Ni sa oti na nona vosa tiko vua, a sa lako tani vei Eparaama na Kalou.

²³ A sa kauti Isimeli na luvena ko Eparaama, kei ira kecega era sucu e nona vale, kei ira kecega era voli e na nona i lavo, a tagane kecega vei ira na lewe-ni-vuvale i Eparaama, a sa cilivi ira e na siga dina ko ya, me vaka ka vosa vua na Kalou.

²⁴ A sa ciwasagavulu ka ciwa na yabaki i Eparaama, ni sa cilivi.

²⁵ A sa tinikatolu na yabaki i Isimeli na luvena, ni sa cilivi.

²⁶ Ia e na siga dina ko ya sa cili ko Eparaama kei Isimeli na luvena;

²⁷ kei ira kece na tagane era nona lewe-ni-vuvale, era sucu e vale, kei ira era voli e nai lavo mai vua na kai tani, era sa cili vata kaya.