Vakatekivu 16 - Ai Vola Tabu (Vakadewa Makawa Vakavoutaki 2021)

Ko Eka kei Isimeli

¹ Ia ko Serai na wati Eparama sa sega ni vakaluveni vua. A sa dua na nona vada (yalewa-bobula), a yacana ko Eka na yalewa ni Ijipita.

² A sa kaya vei Eparama ko Serai, “Raica, sa tarovi au ko Jiova me'u kakua ni vakaluveni; mo la'ki veiyacovi mada kei na noqu yalewa-bobula; de'u na vakaivakawa vua.” A sa vakarorogo vei Serai ko Eparama.

³ Sa yabaki tini ko Eparama e na vanua ko Kenani, sa qai kauti Eka na nona vada ni Ijipita ko Serai na wati Eparama, a sa solia vei Eparama me watina.

⁴ A rau sa veiyacovi kei Eka ko koya, a sa kunekune ko koya; ia ni sa kila sa kunekune ko koya, sa qai beca na nona marama ko koya.

⁵ A sa kaya vei Eparama ko Serai, “Sa bale vei iko na noqu vakacacani! Au a solia na noqu vada ki na lomaseremu; ia ni sa kila ko koya sa kunekune, sa qai beci au ko koya. Me lewa mada e na kedaru maliwa ko Jiova!”

⁶ Ia sa kaya vei Serai ko Eparama, “Raica, sa tu ga vei iko na nomu vada; mo kitaka ga vua na ka ko vinakata.” A sa qai vakararawataki koya ko Serai, ka sa dro tani yani mai vua.

⁷ A sa kunei koya na agilosi i Jiova mai na dua na mata-ni-wai mai na vanua lala, io mai na mata-ni-wai e na sala ki Suri.

⁸ A sa kaya ko koya, “I Eka, na vada i Serai, ko sa lako mai vei? Ko sa lako talega kivei?” A sa kaya, “Au sa drotaki Serai na noqu marama.”

⁹ A sa kaya vua na agilosi i Jiova, “Mo lesu tale mada vua na nomu marama, ka vakayalomalumalumutaki iko vua.”

¹⁰ Sa kaya talega vua ko koya na agilosi i Jiova, “Au na vakalevutaka vakalevu na nomu kawa, ka na sega ni wili rawa e na vuku ni kena levu.”

¹¹ Sa kaya talega vua ko koya na agilosi i Jiova, “Raica, ko sa bukete, ko na vakasucuma talega e dua na gonetagane, ia ko na vakayacani koya mada ko Isimeli, ni sa kila na nomu rarawa ko Jiova.

¹² Ia ena tamata kila ko koya, a ligana ena via vakacacana na tamata kecega, kei na liga ni tamata kecega ena via vakacacani koya; ia ena tiko ko koya e na matadra na wekana kecega.”

¹³ A sa vakatoka ko koya na yaca i Jiova ka vosa vua, “Koi kemuni na Kalou ka raici au tiko”, ni sa kaya, “E ke talega ka'u sa sega li ni raici koya ka dauvakaraici au?”

¹⁴ O koya sa vakayacana kina na mata-ni-wai ko ya ko Pieri-leai-roi [Na mata-ni-wai nei Koya sa bula, ko Koya sa raici au]; raica, sa tiko e na kedrau maliwa ko Ketesa kei Pereti.

¹⁵ A sa vakasucuma vei Eparama ko Eka e dua na luvedrau tagane; ia ko Eparama sa vakayacana na luvena oqo ko Isimeli.

¹⁶ A sa walusagavulu ka ono na yabaki i Eparama, ni sa sucu na luvena ko Isimeli vei Eka.