Vakatekivu 13 - Ai Vola Tabu (Vakadewa Makawa Vakavoutaki 2021)

Rau Tawase ko Eparama kei Loti

¹ A sa lako tani e Ijipita ko Eparama, ko koya, kei na watina, kei na nona ka kecega, a sa lako vata kaya ko Loti, vaka ki na Ceva.

² A sa vutuniyau sara ko Eparama, e na manumanu e yavai va, e na siliva, kei na koula.

³ A sa lako ko koya e na nona lako tu mai na Ceva ka yaco ki Peceli, ki na yasana ka tiko kina eliu na nona valelaca, e na maliwa kei Peceli vata kei Ai;

⁴ ki na yasana sa tu kina nai cabocabo-ni-soro ka cakava kina eliu ko koya; a sa masuta mai kea na yaca i Jiova ko Eparama.

⁵ Io ko Loti talega, ko koya erau a lako vata kei Eparama, sa taukena na qele ni sipi, kei na qele ni bulumakau, kei na valelaca.

⁶ A sa sega ni rauti rau na vanua me rau tiko vata; ni sa levu na nodrau ka, sa dredre kina me rau tiko vata.

⁷ A ra sa dauveileti nai vakatawa ni manumanu e yava i va i Eparama, kei nai vakatawa ni manumanu e yavai va i Loti. A ra sa tiko e na vanua na kai Kenani kei na kai Perisaiti.

⁸ A sa kaya vei Loti ko Eparama, “Me kakua mada na veileti vei kedaru, se vei ira na noqu i vakatawa ni manumanu kei ira na nomu i vakatawa ni manumanu; ni daru sa veiwekani.

⁹ Sa sega li ni tiko e matamu na vanua taucoko? Me daru tawase mada ne? Kevaka ko lako ki nai mawi, ka'u na qai lako ki nai matau; se ko lako ki nai matau, ka'u na qai lako ki nai mawi.”

¹⁰ A sa ta cake ko Loti, ka raica na buca taucoko sa volita na Joritani, e na sala vaka ki Soa, ni sa vuqa na kena wai e na veiyasana kecega, ni se bera na nona vakarusai Sotoma kei Komora ko Jiova, io sa vaka na were i Jiova, sa vaka na vanua ko Ijipita.

¹¹ A sa digitaka ko Loti na buca taucoko sa volita na Joritani me nona; a sa qai lako vaka ki na tokalau ko Loti; ka rau a dui tawase.

¹² Sa tiko e na vanua ko Kenani ko Eparama, a sa tiko ko Loti e na veikoro mai na buca sa volita, a sa la'ki birika na nona valelaca vaka ki Sotoma.

¹³ A ra sa tamata ca na kai Sotoma, ka i valavala ca sara e na mata i Jiova.

Lako ki Epironi ko Eparama

¹⁴ A sa kaya vei Eparama ko Jiova, ni sa tawase tani vua ko Loti, “Mo ta cake mada, ka rai yani e na tikina ko tu kina, ia mo rai vaka ki na vualiku, kei na ceva, kei na vanua ki na tokalau, kei na vanua ki na ra;

¹⁵ ia na vanua taucoko ko sa raica ka'u na solia vei iko, kei ira na nomu kawa me ra taukena ka tawa mudu.

¹⁶ Ia ka'u na vakalewevuqataki ira na nomu kawa me ra vaka na kuvu-ni-soso; ia kevaka sa wilika rawa na kuvu-ni-soso e dua na tamata, ena qai wili rawa na nomu kawa.

¹⁷ Mo cavu tu, mo lako voli e na vanua, e na kena balavu, kei na kena raraba; ni'u na solia vei iko.”

¹⁸ A sa cavuta na nona valelaca ko Eparama, ka la'ki tiko volekata na veivuni-oki eso mai Mamire, ko koya mai Epironi; a sa cakava mai kea e dua nai cabocabo-ni-soro vei Jiova.