Vakatekivu 12 - Ai Vola Tabu (Vakadewa Makawa Vakavoutaki 2021)

Na Kaci ni Kalou vei Eparama

¹ Ia sa kaya oti vei Eparama ko Jiova, “Mo lako tani e na nomu vanua, ka biuti ira na wekamu, kei na vale nei tamamu, ka lako ki na vanua ka'u na vakatakila vei iko.

² Ia ka'u na vakayacori iko mo matanitu levu, ia ka'u na vakalougatataki iko, ka vakarogorogoya na yacamu, ia ko na vu ni veivakalougatataki.

³ Ia ka'u na vakalougatataki ira era vosavakalougatataki iko, ka cudruvi koya sa rukaki iko; ena kalougata talega e na vukumu na veimataqali kecega e vuravura.”

⁴ A sa lako tani ko Eparama, me vaka ka vosa vua ko Jiova; a sa lako vata kaya ko Loti. Sa vitusagavulu ka lima na yabaki i Eparama, ni sa lako tani e Karana.

⁵ A sa kauti Serai na watina ko Eparama, kei Loti na luve ni tuakana, kei nai yau kecega eratou sa rawata, kei na tamata eratou sa rawata mai Karana; a ra sa lako tani me ra lako ki na vanua ko Kenani; a ra sa yaco sara ki na vanua ko Kenani.

⁶ A sa lako tu e na vanua ko Eparama, ka yaco ki na yasana mai Sikemi, ki na kau mai More. A ra sa tiko e na vanua na kai Kenani e na gauna ko ya.

⁷ A sa rairai vei Eparama ko Jiova, ka sa kaya, “Au na solia na vanua oqo vei ira na nomu kawa.” A sa cakava mai kea ko koya e dua nai cabocabo-ni-soro vei Jiova, ko koya ka rairai vua.

⁸ A sa lako tani mai kea ko koya ki na ulunivanua vaka ki na tokalau mai Peceli, a sa birika na nona valelaca, a sa koto vaka ki na ra ko Peceli, ka vaka ki na tokalau ko Ai; a sa cakava mai kea e dua nai cabocabo-ni-soro vei Jiova, a sa masuta na yaca i Jiova.

⁹ A sa lako tu ga ko Eparama, ka lako vaka ki na ceva.

Ko Eparama kei Serai mai Ijipita

¹⁰ A sa dausiga na vanua. A sa lako sobu ki Ijipita ko Eparama me la'ki tiko vulagi kina; ni sa ka tani na dausiga e na vanua.

¹¹ Ia ni sa vakarau ko koya me curu ki Ijipita, sa kaya vei Serai na watina, “Raica, ka'u sa kila ni ko sa yalewa matavinaka;

¹² ia ni ra raici iko ko ira na kai Ijipita, era na qai kaya, Oqo na watina; era na qai vakamatei au, ka vakabulai iko.

¹³ Au masuti iko kina mo kaya mada ko sa ganequ, me'u vinaka kina, ia ka'u na bula talega e na vukumu.”

¹⁴ Ia ni sa yaco ki Ijipita ko Eparama, era sa raici koya na yalewa ko ira na kai Ijipita ni sa matavinaka sara ko koya.

¹⁵ Sa ra raici koya talega na nona tamata turaga ko Fero, ka vosavakavinavinakataki koya vei Fero; a sa kau ki na vale i Fero na yalewa.

¹⁶ A sa caka vinaka vei Eparama ko koya e na vukuna; a sa rawata ko Eparama na sipi, kei na bulumakau, kei na asa tagane, kei na tagane-bobula, kei na yalewa-bobula, kei na asa yalewa, kei na kameli.

¹⁷ A sa vakararawataki Fero kei ira e nona vale ko Jiova e na mate ca sara, e na vuku i Serai na wati Eparama.

¹⁸ A sa kacivi Eparama ko Fero, ka kaya, “A cava na ka oqo ko sa cakava vei au? A cava ko a sega kina ni tukuna vei au ni sa watimu ko koya?

¹⁹ A cava ko a kaya kina, ‘A ganequ ko koya,’ ka sa rawarawa kina me'u taura me watiqu? Ia oqo, mo raica mada na watimu, mo kauta, ka lako.”

²⁰ A sa vakaroti ira na tamata ko Fero e na vukuna; a ra sa kauti koya e na nona lako tu, kei na watina, kei na nona ka kecega.