Vakatekivu 11 - Ai Vola Tabu (Vakadewa Makawa Vakavoutaki 2021)

Na Vale Cecere mai Pepeli

¹ A sa gusu vata ko vuravura taucoko, a sa duavata ga na kena vosa.

² A sa yaco, ni ra a lako vaka ki na tokalau, era kunea e dua na buca mai na vanua ko Saina; a ra sa tiko kina.

³ A ra sa veikayaka vakataki ira, “Tou ia mada, tou cakava na vatu-buli, ka tavuna vakavinaka.” Ka ra sa rawata na vatu-buli mei sosomi ni vatu, ka sai sosomi ni lase na qele dregadregata.

⁴ A ra kaya, “Tou ia mada, tou tara e dua na noda koro, ka dua na vale cecere, me yacovi lomalagi na delana; tou cakava me rogo kina na yacada, de sa da dui vakasevi yani e dela i vuravura taucoko.”

⁵ A sa lako sobu ko Jiova me raica na koro kei na vale cecere era sa tara na tamata.

⁶ A sa kaya ko Jiova, “Raica, sa duavata ga ko ira na tamata, a sa duavata ga na vosa vei ira kecega; a ra sa vakatekivu ni kitaka na ka oqo; ia ena qai sega e dua na ka me tarovi ira e na ka era nakita.

⁷ Tou ia mada, tou lako sobu, ka vakasesea na nodra vosa, me ra kakua kina ni veikilai vosa.”

⁸ A sa dui vakasevi ira mai kina ko Jiova, ki dela i vuravura taucoko, a ra sa cegu ni tara tiko na koro.

⁹ O koya sa vakatokai kina na yacana ko Pepeli; ni sa vakasesea mai kea na vosa ni vuravura taucoko ko Jiova; a sa dui vakasevi ira mai kina ko Jiova, ki dela i vuravura taucoko.

Na Kawa i Semi

¹⁰ Oqo na kawa i Semi. Sa dua na drau na yabaki i Semi, a sa qai sucu na luvena ko Afakisati, ni sa oti na waluvu ka yabaki rua;

¹¹ a sa bula tiko ko Semi, ni sa sucu ko Afakisati, ka lima na drau na yabaki, a sa sucu eso tale na luvena tagane kei na luvena yalewa.

¹² A sa bula ko Afakisati ka tolusagavulu ka lima na yabaki, a sa qai sucu ko Sela na luvena;

¹³ a sa bula tiko ko Afakisati, ni sa sucu ko Sela, ka va na drau ka tolu na yabaki, a sa sucu eso tale na luvena tagane kei na luvena yalewa.

¹⁴ A sa bula ko Sela ka tolusagavulu na yabaki, a sa qai sucu na luvena ko Iperi;

¹⁵ a sa bula tiko ko Sela ni sa sucu ko Iperi, ka va na drau ka tolu na yabaki, a sa sucu eso tale na luvena tagane kei na luvena yalewa.

¹⁶ A sa bula ko Iperi ka tolusagavulu ka va na yabaki, a sa qai sucu ko Peleki na luvena;

¹⁷ a sa bula tiko ko Iperi, ni sa sucu ko Peleki, ka va na drau ka tolusagavulu na yabaki, a sa sucu eso tale na luvena tagane kei na luvena yalewa.

¹⁸ A sa bula ko Peleki ka yabaki tolusagavulu, sa qai sucu ko Riu na luvena;

¹⁹ a sa bula tiko ko Peleki, ni sa sucu ko Riu, ka rua na drau ka ciwa na yabaki, a sa sucu eso tale na luvena tagane kei na luvena yalewa.

²⁰ A sa bula ko Riu ka tolusagavulu ka rua na yabaki, a sa qai sucu ko Seruke na luvena;

²¹ a sa bula tiko ko Riu, ni sa sucu ko Seruke, ka rua na drau ka vitu na yabaki, a sa sucu eso tale na luvena tagane kei na luvena yalewa.

²² A sa bula ko Seruke ka tolusagavulu na yabaki, a sa qai sucu ko Neori na luvena;

²³ a sa bula tiko ko Seruke, ni sa sucu ko Neori, ka rua na drau na yabaki, a sa sucu eso tale na luvena tagane kei na luvena yalewa.

²⁴ A sa bula ko Neori ka ruasagavulu ka ciwa na yabaki, a sa qai sucu ko Tira na luvena;

²⁵ a sa bula tiko ko Neori, ni sa sucu ko Tira, ka yabaki dua na drau ka tinikaciwa, a sa sucu eso tale na luvena tagane kei na luvena yalewa.

²⁶ A sa bula ko Tira ka vitusagavulu na yabaki, a sa qai sucu ko iratou na luvena ko Eparama, kei Neori, kei Erani.

Na Kawa i Tira

²⁷ A sa vakaoqo na kawa i Tira. Sa sucu na luve i Tira ko Eparama, ko Neori, kei Erani; a sa sucu ko Loti na luve i Erani.

²⁸ A sa mate ko Erani e na mata i tamana ko Tira, e na vanua ka sucu kina, io mai Uri mai Kalitia.

²⁹ A rau a qai vakawati ko Eparama kei Neori, a yaca ni wati Eparama ko Serai, ia na yaca ni wati Neori ko Milika, na luvei Erani, ko koya na tamai Milika kei Isika.

³⁰ A sa yava ko Serai; sa sega na luvena.

³¹ A sa kauti Eparama na luvena ko Tira, kei Loti na luve i Erani, na makubuna, kei Serai na vugona, a wati Eparama na luvena; a ratou a lako tani vata mai Uri mai Kalitia, ka me ratou lako ki na vanua ko Kenani. Ni ratou sa yaco ki Karana, a ratou a mani tiko kina.

³² Ia na yabaki i Tira sa rua na drau ka lima na yabaki; a sa ciba ko Tira mai Karana.