Vakatekivu 1 - Ai Vola Tabu (Vakadewa Makawa Vakavoutaki 2021)

Nai Tukutuku ni Veibuli ni Kalou

¹ E nai vakatekivu sa bulia na lomalagi kei na vuravura na Kalou.

² A sa sega ni vakacokotaki ko vuravura ka sa lala tu; a sa tu na butobuto e dela ni wasa titobu. A sa yavavala na Yalo ni Kalou e dela ni wai.

³ Sa qai kaya na Kalou, “Me rarama mai”; a sa rarama mai.

⁴ A sa kunea na rarama na Kalou ni sa vinaka; a sa wasea na rarama mai na butobuto na Kalou.

⁵ A sa vakatoka na rarama na Kalou me Siga, a sa vakatoka na butobuto me Bogi. Ia na yakavi kei na mataka sa kenai matai ni siga.

⁶ A sa kaya na Kalou, “Me dua na maliwa lala, me wasei kina na wai mai na wai.”

⁷ A sa cakava na maliwa lala na Kalou, a sa wasea kina na wai e ruku ni maliwa lala mai na wai e cake e na maliwa lala. A sa vakakina.

⁸ A sa vakatoka na vu ni maliwa lala e cake na Kalou me Lomalagi. Ia na yakavi kei na mataka sa kenai karua ni siga.

⁹ A sa kaya na Kalou, “Me soqoni vata na wai e ruku i lomalagi ki na dua na yasana, me rairai mai na vanua mamaca.” A sa vakakina.

¹⁰ A sa vakatoka na vanua mamaca na Kalou me Vuravura, a sa vakatoka na wai sa soqoni vata tu me Wasawasa. A sa raica na Kalou ni sa vinaka.

¹¹ A sa kaya na Kalou, “Me vakatubura na co ko vuravura, na co sa vakasorena, kei na kau dauvua e vuravura me vuataka na vuana, sa vakasorena e na kena mataqali.” A sa vakakina.

¹² A sa vakatubura na co na qele, na co sa vakasorena, e na kena mataqali, kei na kau sa vuataka na vuana, ka sa vakasorena, e na kena mataqali. A sa raica na Kalou ni sa vinaka.

¹³ Ia na yakavi kei na mataka sa kenai katolu ni siga.

¹⁴ A sa kaya na Kalou, “Me tu na vu-ni-rarama e na maliwa lala kei lomalagi, me wase kina na siga mai na bogi; me i vakatakilakila talega ni veigauna bibi eso, kei na siga, kei na yabaki,

¹⁵ ka me rau vu-ni-rarama mai na maliwa lala kei lomalagi, me vakararamataki vuravura.” A sa vakakina.

¹⁶ A sa bulia e rua na vu-ni-rarama lelevu na Kalou — na vu-ni-rarama levu me lewa na siga kei na vu-ni-rarama lailai me lewa na bogi — kei na veikalokalo.

¹⁷ A sa viritoka na Kalou me rau tu mai na maliwa lala kei lomalagi, me vakararamataki vuravura,

¹⁸ ka me lewa na siga kei na bogi, me wasea talega na rarama mai na butobuto. A sa raica na Kalou ni sa vinaka.

¹⁹ Ia na yakavi kei na mataka sa kenai kava ni siga.

²⁰ A sa kaya na Kalou, “Me vakatubura vakalevu sara na wai na veika bula sa lako voli, ka me ra vuka voli na manumanu e dela i vuravura, e na maliwa ni vuravura kei lomalagi.”

²¹ A sa bulia na ika lelevu ka rerevaki na Kalou, kei na ka kecega sa bula ka yavavala rawa, sa vakatubura vakalevu na wai, e na kedra mataqali, kei na manumanu vuka kecega, e na kedra mataqali. A sa raica na Kalou ni sa vinaka.

²² A sa vosavakalougatataki ira na Kalou, ka kaya, “Dou vakaluveni, ka tubu me vuqa mai, ka vakatawa na veiwasawasa, me tubu me vuqa mai na manumanu vuka talega e vuravura.”

²³ Ia na yakavi kei na mataka, sa kenai kalima ni siga.

²⁴ A sa kaya na Kalou, “Me vakatubura na ka bula na qele e na kedra mataqali, na manumanu e yavai va, kei na ka sa qasi voli, kei na manumanu kila kecega ni vanua e na kedra veimataqali.” A sa vakakina.

²⁵ A sa bulia na manumanu kila kecega ni vanua na Kalou e na kedra veimataqali, kei na manumanu e yavai va, me vaka na kedra veimataqali, kei na ka kecega sa qasi voli e dela ni vanua e na kedra veimataqali. A sa raica na Kalou ni sa vinaka.

²⁶ A sa kaya na Kalou, “Me datou bulia na tamata e na kedatou i yaloyalo [me i tovo vata kei kedatou] ka me ucui kedatou; ka me ra lewa na ika ni veiwasawasa, kei na manumanu vuka, kei na manumanu e yavai va, kei vuravura taucoko, kei na ka kecega sa qasi voli e dela i vuravura.”

²⁷ A sa bulia na tamata na Kalou e na kena i yaloyalo vakai koya [me i tovo vata kei koya]; e nai yaloyalo [tovo] ni Kalou sa bulia na tamata ko koya; na tagane kei na yalewa sa buli rau ko koya.

²⁸ A sa vosavakalougatataki rau na Kalou, ka sa kaya vei rau na Kalou, “Drau vakaluveni, ka tubu me lewe vuqa, ka vakatawai vuravura, ka vakamalumalumutaka; ka lewa na ika ni waitui, kei na manumanu vuka, kei na ka bula kecega sa qasi voli e dela i vuravura.”

²⁹ A sa kaya na Kalou, “Raica, ka'u sa solia vei kemudrau na co kecega sa vakasorena, sa tu e dela i vuravura taucoko, kei na kau kecega sa tu kina na vuanikau sa vakasorena; ko ya e na kemudou kakana.

³⁰ Ia ki na manumanu kila kecega ni vanua, kei na manumanu vuka kecega, kei na ka kecega sa qasi voli e dela i vuravura, sa tu kina na bula, au sa solia na co drokadroka kecega me kedra kakana.” A sa vakakina.

³¹ A sa vakaraica na Kalou na ka kecega sa bulia ko koya, ka raica, sa ka vinaka sara. Ia na yakavi kei na mataka sa kenai kaono ni siga.