Taniela 6 - Ai Vola Tabu (Vakadewa Makawa Vakavoutaki 2021)

Na Bukiveretaki nei Taniela

¹ Sa vinakata ko Taraiasi me lesia e le dua na drau ka ruasagavulu, era turaga, me ra lewa na matanitu taucoko,

² ka lewe tolu me nodra turaga lelevu, ka sa kenai matai vei iratou ko Taniela; ka me ra vakarorogo vei iratou ko ira na turaga me kakua kina ni lako vakaca e dua na ka e na matanitu ni tui.

³ Ia ko Taniela oqo sa uasivi cake vei ira na turaga lelevu kei ira na vakailesilesi, ni sa tiko vua na yalo e uasivi cake; ka sa nanuma na tui me lesi koya me lewa na matanitu taucoko.

⁴ Ia ko ira na turaga lelevu kei ira na vakailesilesi era sa qai qaqa me ra kunea e dua na ka e cala kina ko Taniela e na ka ni matanitu; ia era sa sega ni kunea rawa e dua na ka e caka vakatani, se dua na ka e cala kina; ni sa dina tikoga ko koya, ka sa sega e dua na nona cala se dua na ka ca me kune vua.

⁵ Era sa qai kaya ko ira na tamata oqori, “Eda na sega ni kunea e dua na ka e cala kina ko Taniela oqo, eda na kunea ga na ka me vu ni nona cala e na nona lotu vua na nona Kalou.”

⁶ Ia ko ira na turaga lelevu kei ira na vakailesilesi era sa qai soqoni vata vua na tui, ka ra kaya vakaoqo vua, “Kemuni Taraiasi na tui, mo ni bula ka sega ni mudu.

⁷ Era sa bose vata kece na turaga lelevu ni matanitu, kei ira na kovana, kei na vakailesilesi, kei na lewe ni bose, kei na turaga ni qali, me vakatura e dua na lawa ni tui, ka vakadreta e dua na sau tabu, ka vaka, O koya sa na kerea e dua na ka vua e dua na kalou se vua e dua na tamata ka bogi tolusagavulu, vei kemuni duaduaga, na tui; me sa biu ki na qara ni laione.

⁸ Ia koi kemuni na tui, mo ni vakatura mada na lawa oqo, ka vola na kenai vola, me kakua ni vakatanitaki, me vaka ga na noda lawa na kai Mitia kei na kai Perisia, sa sega ni veisautaki rawa.”

⁹ O koya oqo sa vola kina ko Taraiasi na tui na kenai vola kei na sau.

Ko Taniela e na Qara ni Laione

¹⁰ Ia ni sa kila ko Taniela sa volai oti nai vola, sa curu ki na nona vale; ka ni sa dola tu na katuba ni nona loqi me donui Jerusalemi, sa tekiduru e duruna vakatolu e na veisiga, me masu, ka vakavinavinaka vua na nona Kalou, me vaka sa dau cakava eliu ko koya.

¹¹ Era sa qai soqoni vata mai ko ira na tamata oqori, ka kunei Taniela ni sa masu ka kere loloma tiko vua na nona Kalou.

¹² Era sa qai lako mai, ka vosa vua na tui e na vuku ni nona sau, ka kaya, “Kemuni na tui! Ko ni a sega li ni vola e dua na lawa, ka vaka, ni o koya ena kerea e dua na ka vua e dua na kalou se vua e dua na tamata me oti mada na bogi tolusagavulu, vei kemuni duaduaga, na tui, sa na biu ki na qara ni laione?” Sa qai kaya na tui, “Sa dina ga na ka oqori, me vaka na noda lawa na kai Mitia kei na kai Perisia, ka sa sega ni boko rawa.”

¹³ Sa ra qai kaya vua na tui, “Ko Taniela, e dua vei ira na Juta ka vakabobulataki mai sa sega ni vakarorogo vei kemuni, na tui, se muria na sau ko ni sa vola, ka sa ia ga ko koya na nona masumasu vakatolu e na veisiga.”

¹⁴ Ia ni sa rogoca na vosa oqo na tui, sa qai cati koya vakalevu vakataki koya, a sa gu na yalona vei Taniela ka segata me vakabulai koya. A sa segata tiko ko koya ka yacova na kena dromu na mata-ni-siga me vakabulai koya.

¹⁵ Era sa qai soqoni vata vua na tui ko ira na tamata oqori, ka kaya vua, “Mo ni kila, na tui, ni sa noda lawa na kai Mitia kei na kai Perisia, me kakua ni veisautaki e dua na lawa se na sau tabu e vakatura ko koya na tui.”

¹⁶ Sa qai vosa na tui, ka ra sa kauti Taniela mai, ka biuta ki na qara ni laione. Sa qai kaya vei Taniela ko koya na tui, “Na nomu Kalou, o koya ko sa qarava tikoga, me qai vakabulai iko!”

¹⁷ A sa kau mai e dua na vatu, ka virinoca ki na gusu ni qara; ka sa tabaka ko koya na tui e na nona mama-ni-taba, e na nodra mama-ni-taba talega na kena turaga; me kakua ni vakatanitaki na ka sa nakiti vei Taniela.

¹⁸ Sa qai lako sara na tui ki na nona vale vakaturaga, ka sa lolo e na bogi ko ya ka siga; ka sa sega ni kau mai ki matana na daunivakatagi domo vinaka, ka sa sega talega ni moce rawa ko koya.

Sa Vakabulai ko Taniela mai na Laione

¹⁹ Ia sa sou e na mataka caca na tui, a sa lako vakatotolo ki na qara ni laione.

²⁰ Ia ni sa torova na qara, sa kaci vakatagi vei Taniela, ka sa kaya vei Taniela na tui, “I Taniela, na tamata ni Kalou bula, sa rawata li na nomu Kalou, o koya ko sa qarava tikoga, me vakabulai iko mai vei ira na laione?”

²¹ Sa qai kaya vua na tui ko Taniela, “Mo ni bula, na tui, ka sega ni mudu!

²² Na noqu Kalou sa tala mai na nona agilosi, ka sa sogota na gusudra na laione, a ra sa sega kina ni vakacacani au, ni sa sega e dua na ka ca sa kunea vei au ko koya; ia sa sega talega na ka ca ka'u cakava e matamuni na tui.”

²³ Sa qai reki vakalevu na tui e na vukuna, ka sa kaya me ra kauti Taniela cake mai na qara. A sa qai kau cake mai na qara ko Taniela, a sa sega ni kune vua e dua na tikina e ca, ka ni sa vakabauta na nona Kalou.

²⁴ Sa qai vakarota na tui, a ra sa kauti ira mai na tamata ko ya era beitaki Taniela, ka ra sa biuti ira ki na qara ni laione—ko ira, kei na luvedra kei na watidra; ka sa kani ira sara na laione, ka quruqurulaka na suidra ni se bera na nodra tau ki na boto ni qara.

²⁵ Sa qai volavola ko Taraiasi na tui vei ira kece na tamata, kei na veivanua, kei na dui vosavosa, era tiko e vuravura taucoko ka vaka: “Me vakalevutaki vei kemudou na vakacegu!

²⁶ E dua na lawa ka'u sa vakatura, ka vaka, E na veiyasana kecega e na noqu matanitu, me ra sautaninini ka rere ga na tamata e na mata ni Kalou i Taniela: Ni sa Kalou bula ko koya, ka tudei na nona tiko ka sega ni mudu. Ia na nona matanitu ena sega ni vakacacani rawa, kei na nona lewa ena sega ni oti rawa.

²⁷ Sa dauia ko koya na veivakabulai kei na veivueti, ka sa cakava nai vakatakilakila kei na cakacaka mana mai lomalagi kei vuravura, o koya sa vakabulai Taniela mai na kaukauwa ni laione.”

²⁸ Ia ko Taniela oqo sa tamata cakacaka yaco ni sa lewa tiko ko Taraiasi, ni sa lewa talega ko Sairusi na kai Perisia.