Taniela 5 - Ai Vola Tabu (Vakadewa Makawa Vakavoutaki 2021)

Na Magiti Levu e Vakarautaka ko Pelisasari

¹ O Pelisasari na tui sa cakava na magiti levu vei ira na nona tamata turaga e le dua na udolu, ka sa gunu waini ko koya e na matadra na le udolu ko ya.

² Sa vakarota ko Pelisasari ni sa tovolea na waini, me kau mai na bilo koula kei na bilo siliva ka kauta mai na vale tabu mai Jerusalemi ko Nepukanesa na tamana; ka me ra gunu mai kina na tui, kei na nona tamata turaga, kei ira na watina dina, kei na watina lalai.

³ Era sa qai kauta mai na bilo koula ka kau mai na vale tabu ni vale ni Kalou mai Jerusalemi; ka ra sa gunu mai kina na tui, kei na nona tamata turaga, kei ira na watina dina, kei na watina lalai.

⁴ Era sa gunuva na waini, ka vakacaucautaki ira na kalou koula, kei na kalou siliva, na kalou parasa, na kalou kaukamea, na kalou kau, kei na kalou vatu.

Na Volavola e na Lalaga ni Valenitui

⁵ Ia e na tiki-ni-siga ko ya sa rairai nai qaqalo ni liga ni tamata, ka volavola ki nai botani lase ni lalaga ni vale levu ni tui ka me donuya nai tutu-ni-cina. Ia sa raica ko koya na tui na tiki ni ligana ka volavola.

⁶ Sa qai duatani mai nai rairai ni matana na tui, ka sa vakidroataki koya na nanuma ni lomana, sa qai tasere nai sema ni tolona, ka sa dui veiyaviti na duruna.

⁷ Sa qai kaci vakadomoilevu mai na tui me ra kau mada mai ko ira na dauvakarai mata ni lomalagi, kei ira na kai Kalitia, kei na dauparofisai vakailasu. Ka sa kaya na tui vei ira na tamata vuku ni Papiloni, “O koya sa na wilika nai vola oqo, ka vakatakila vei au na kenai balebale, ena vakaisulutaki e nai sulu kulakula, ka na vakaitaubetaki e na sinucodo koula, ka na lesi talega me kenai katolu vei keitou ka lewa na matanitu.”

⁸ Era qai curu kece mai na nona tamata vuku na tui, ia era sa sega ni wilika rawa na ka sa volai, se vakatakila rawa na kenai balebale vua na tui.

⁹ Sa qai taqaya vakalevu ko Pelisasari, ia na kenai rairai ni matana sa qai duatani mai, kei ira na nona tamata turaga era sa kidroa mai.

¹⁰ Ia e na vuku ni nodra vosa na tui kei na turaga, sa curu mai ko koya na ranadi ki na vale ni kana, ka sa kaya ko koya, “Mo ni bula, na tui, ka sega ni mudu! Me kakua ni vakidroataki iko na nanuma ni lomamu, ka me kakua ni duatani mai nai rairai ni matamu.

¹¹ Sa dua na tamata e na nomu matanitu, sa tiko kaya na yalodra na kalou tabu. Ia e na gauna i tamamu, sa kune vua na rarama kei na yalomatua kei na vuku me vaka na nodra vuku na kalou. Ia na tui ko Nepukanesa na tamamu sa lesi koya me nodra turaga na daucaka mana, kei na dauvakarai mata ni lomalagi, kei na kai Kalitia, kei na dauparofisai vakailasu. Io ko tamamu, na tui, sa lesi koya kina;

¹² ka ni sa tiko vua e dua na yalo e uasivi cake, kei na vuku, kei na yalomatua, kei na vakamacalataka na tadra, kei na vakatakila na vosa dredre, kei na dausere ka bukubukuya, io ni sa kune vei Taniela ko ya, na yacana talega sa vakayacani koya kina na tui, ko Pelitisasari. Me sa qai kacivi mada ko Taniela, ia ena vakatakila ko koya na kenai balebale.”

Sa Vakatakilai nai Balebale ni Volavola ena Lalaga

¹³ Sa qai kau mai vua na tui ko Taniela. A sa kaya vei Taniela ko koya na tui, “Ko iko li ko Taniela, vei ira na yavusa i Juta ka vakabobulataki mai, ko ira ka kauta mai Juta na tui ko tamaqu?

¹⁴ Au sa rogoci iko, ni sa tiko vei iko na yalodra na kalou, ka sa kune vei iko na rarama, kei na yalomatua, kei na vuku e uasivi cake.

¹⁵ Era sa qai kau mai oqo ki mataqu na tamata vuku, na dauvakarai mata ni lagi me ra wilika na ka sa volai oqo, ka me ra vakatakila vei au na kenai balebale, ka ra sa sega ni rawa ni tukuna nai balebale ni ka oqo.

¹⁶ Ia ka'u sa rogoca na kemui rogorogo ni ko sa tukuna rawa nai balebale ni ka vuni ka sereka na ka dredre. Ia kevaka ko sa rawata mo wilika na ka sa volai tu oqo, ka vakatakila vei au na kenai balebale, ko na qai vakaisulutaki e nai sulu kulakula, ka vakaitaubetaki e na sinucodo koula, ka ko na lesi talega mo kenai katolu vei kedatou ka lewa na matanitu.”

¹⁷ Sa qai vosa ko Taniela ka kaya vua na tui, “A nomuni solisoli me sa nomuni ga, kei na nomuni yau mo ni solia ga vua e dua tale! Ia ka'u na wilika ga na ka sa volai tu, vei kemuni na tui, ka vakatakila na kenai balebale.

¹⁸ Oi kemuni na tui, sa solia na Kalou Cecere Sara vei Nepukanesa na tamamuni na matanitu, kei na ka vakaturaga, kei na ka e rogo kina, kei na lagilagi.

¹⁹ Ia e na vuku ni ka vakaturaga ka solia vua ko koya, era sa rere kina ka sautaninini vua ko ira kece na tamata, kei na veivanua, kei na dui vosavosa. Ko ira sa lewa kina me ra mate era sa vakamatei; kei ira sa lewa kina ko koya me ra bula era sa vakabulai; kei ira sa lomana kina sa vakalevulevuya; kei ira sa lomana kina sa vakasivoya.

²⁰ Ia ni sa dokadokai koya, ka sa vakaukauwataki na yalona e na viavialevu, sa qai vakasivoi ko koya mai na nona i tikotiko vakatui, ka ra sa kauta tani mai vua na ka sa rogo kina.

²¹ Ka sa vakasavi tani ko koya mai vei ira na tamata, ka sa soli talega vua na yalo vakamanumanu. Ia sa tiko ko koya kei ira na asa kila, ka ra sa vakani koya e na co me vaka sa bulumakau, ia sa suasua talega na yagona e na tegu mai lomalagi, ka yacova mada na gauna sa kila kina ko koya ni sa lewa na Kalou Cecere Sara na matanitu ni tamata, ka sa lesia me lewa kina na tamata sa vinakata ko koya.

²² Ia koi kemuni na luvena, Pelisasari, ko ni sa sega ni vakamalumalumutaka na lomamuni, ia ko ni sa kila ga na ka kecega oqo!

²³ Ko ni sa vakalevulevui kemuni vei koya na Turaga ni lomalagi, ka ra sa kauta mai ki matamuni na bilo ni nona vale, ka kemuni sa gunu waini mai kina, kei ira na nomuni tamata turaga, na watimuni dina, kei na watimuni lalai, ia kemuni sa vakacaucautaka na kalou siliva, kei na kalou koula, na kalou parasa, na kalou kaukamea, na kalou kau, kei na kalou vatu, na veika ka sega ni rai, se rogo, se kila-ka rawa; ia na Kalou ka sa tiko e ligana na nomuni cegu, ka sa lewa na nomuni lakolako kece, ko ni sa sega ni doka.

²⁴ “O koya oqo, sa talai kina mai vei koya na tiki ni liga, ka sa qai volai nai vola ka tu.

²⁵ Ia oqo na ka sa volai, MINI, MINI, TIKELI, UPIRESINI.

²⁶ Oqo na kenai balebale: MINI, sa wilika na nomuni matanitu na Kalou, ka sa qai vakaotia.

²⁷ TIKELI, ko ni sa vakatovolei e nai vakarau ni bibi, ka ko ni sa kune mo ka mamada.

²⁸ PIRESI, sa wasei oqo na nomuni matanitu, ka sa soli kivei ira na kai Mitia kei ira na kai Perisia.”

²⁹ Sa qai vakarota ko Pelisasari, ka ra sa mai vakaisulutaki Taniela e nai sulu kulakula, ka vakaitaubetaki koya e na sinucodo koula, ka sa kacivaki koya, ni sa qai lesi me sa kenai tolu vei iratou ka lewa na matanitu.

³⁰ E na bogi ga ko ya sa vakamatei ko Pelisasari na tui ni kai Kalitia.

³¹ Ia ko Taraiasi na kai Mitia sa taura na matanitu, ka sa onosagavulu ka rua beka na nona yabaki.