Taniela 4 - Ai Vola Tabu (Vakadewa Makawa Vakavoutaki 2021)

Nai Karua ni Tadra i Nepukanesa

¹ Mai vei Nepukanesa na tui, kivei ira na tamata, na lewe ni veivanua, kei ira na dui vosavosa era tiko e vuravura taucoko: Me vakalevutaki vei kemudou na vakacegu!

² Au sa vaka e vinaka me'u tukuna nai vakatakilakila kei na cakacaka mana sa cakava vei au ko koya na Kalou Cecere Sara.

³ Sa cecere sara na nona i vakatakilakila! Sa veivakurabuitaki na nona cakacaka mana! A nona matanitu na matanitu e sega ni mudu, kei na nona lewa sa mai na dua nai tabatamata ki na dua tale.

⁴ Oi au ko Nepukanesa, ka'u a tiko vakacegu e na noqu vale, ka'u sa kalougata e na noqu i tikotiko vakatui.

⁵ Ka'u a tadrataka e dua na tadra sa vakarerei au, ia na nanuma ni lomaqu e na noqu i mocemoce kei na raivotu ka'u sa raica sa vakidroataki au.

⁶ O koya oqo sa dua kina na noqu lewa ka'u sa vakatura, me ra kau mai kivei au na tamata vuku kecega e Papiloni, ia me ra vakatakila vei au nai balebale ni tadra.

⁷ Sa ra qai curu mai na daucaka mana, kei ira na kai Kalitia, kei ira na dauparofisai vakailasu, ka'u a tukuna vei ira na tadra; ia era sa sega ni vakatakila vei au na kenai balebale.

⁸ A sa curu mai e muri sara kivei au ko Taniela—a yacana ko Pelitisasari, me vaka na yaca ni noqu kalou, ia na yalodra na kalou tabu sa tiko vua—ka'u a tukuna talega vua na tadra, ka kaya,

⁹ “I Pelitisasari, na nodra turaga na daucaka mana, ni'u sa kila sa tiko vei iko na yalodra na kalou tabu ka sa sega e dua na ka vuni me dredre vei iko, me tukuna mai vei au na raivotu ni noqu tadra ka'u a raica, kei na kenai balebale.

¹⁰ Sa vakaoqo na raivotu ka'u a raica e na noqu i mocemoce; au a rai, ka raica, sa dua na kau ka tu e lomadonu kei vuravura, ia na kena cecere sa ka levu vakaidina.

¹¹ Sa tubu na kau oqori me kaukauwa, ia na kena cecere sa yala ki lomalagi, ka sa raici mai nai yalayala kei vuravura.

¹² A drauna sa matavinaka, kei na vuana sa ka levu, a sa tu kina na kakana e rauta kecega. Sa vakaruru e rukuna na manumanu ni vanua, sa ro talega e na tabana na manumanu vuka, a sa kana kina na ka kecega sa bula.

¹³ “Au a raica e na raivotu, e na noqu i mocemoce, ka raica, sa dua nai vakatawa ka yalosavasava sa lako sobu mai lomalagi.

¹⁴ Sa kaci vakadomoilevu ko koya, ka vaka, ‘Taya sobu na kau, ka taya laivi na tabana, kurea na drauna, ka duibiubiuta na vuana. Me lako tani na manumanu mai na rukuna kei na manumanu vuka mai na tabana.

¹⁵ Ia na vu ni wakana me laivi tu ga e na qele, ka me sa vauci e na wa kaukamea ka parasa, ki na veico ni vanua. Me vakasuasuataki talega e na tegu ni lomalagi, ia me sa votai vata ko koya kei ira na manumanu e na co ni qele.

¹⁶ Me kakua ni tiko vua na yalo ni tamata, ia me solia vua na yalo ni manumanu; ka me lako siviti koya mada vakavitu.

¹⁷ Ni sa nodra lewa oqo ko ira nai vakatawa, kei na taro e na nodra vosa na yalosavasava, me ra kila kina ko ira sa bula ni sa lewa ko Koya sa Cecere Sara e na matanitu ni tamata; ka sa solia vua sa lomana kina, ia na tamata wale sa lesia ko koya me lewa kina.’

¹⁸ A tadra oqo ka'u a raica koi au, ko Nepukanesa na tui. Ia ko iko, Pelitisasari, mo tukuna mai na kenai balebale, ni ra sa sega ni rawata ko ira kece na tamata vuku e na noqu matanitu me vakatakila vei au na kenai balebale. Ia ko sa rawata ga, ni sa tiko vei iko na yalodra na kalou tabu.”

Sa Tukuna ko Taniela nai Balebale ni Karua ni Tadra

¹⁹ Ia ko Taniela, na yacana ko Pelitisasari, sa qai kidacala tiko ka dua na tiki-ni-siga, ia sa kidroa ko koya e na nanuma ni lomana. Sa qai kaya na tui vei Pelitisasari, “Mo kakua ni kidroa e na tadra, se na kenai balebale.” Sa vosa ko Pelitisasari, ka kaya, “Noqu turaga, me yacovi ira sa cati kemuni na tadra oqo, kei na kenai balebale, vei ira na nomuni meca.

²⁰ Na kau ko ni a raica ka tubu me kaukauwa, ka sa yala ki lomalagi na kena cecere, ka sa raici e vuravura taucoko;

²¹ ka sa matavinaka na drauna, ka sa levu na vuana, ka sa tiko kina na kakana sa rauta kece; ka sa tiko na manumanu ni vanua e rukuna, ka sa ro talega e na tabana na manumanu vuka—

²² sai kemuni, na tui! Ko ni sa tubu ka kaukauwa mai. Sa tubu cake na kemuni levu ka sa yala ki lomalagi, kei na nomuni lewa sa yaco ki nai yalayala kei vuravura.

²³ Ka ni sa raica na tui ni sa dua nai vakatawa ka yalosavasava sa lako sobu mai lomalagi, ka kaya, ‘Taya sobu na kau, ka vakarusa; ia na vu ni wakana me tu ga e na qele, ka me sa vauci kina e na wa kaukamea ka parasa, ki na veico ni vanua; ka me sa suasua e na tegu ni lomalagi, ia me sa votai vata ko koya kei ira na manumanu ni vanua e na co ni qele, ka me oti mada vua e vitu na gauna’—

²⁴ sa vakaoqo, kemuni na tui, na kenai balebale, ni oqo na lewa i Koya sa Cecere Sara ka sa yacovi koya na noqu turaga na tui:

²⁵ Era na vakasavi kemuni tani mai vei ira na tamata, ia kemuni na tiko vata kei ira na manumanu, ka ra na vakani kemuni e na co me vaka ko ni sa bulumakau, ia kemuni na suasua e na tegu ni lomalagi, ka me oti mada vei kemuni e vitu na yabaki, mo ni kila mada kina ni sa lewa ko Koya sa Cecere Sara e na matanitu ni tamata, ka sa solia vua sa lomana kina.

²⁶ Ia ni ra a vakarota me laiva tu ga na vu ni waka ni kau; ena vakataudeitaki vei kemuni na nomuni matanitu, ni kemuni sa kila oti mada ni sa lewa ko lomalagi.

²⁷ O koya oqo, na tui, me vinaka kina vei kemuni na noqu i vakavuvuli, ia mo ni muduka mada na nomuni valavala ca ka me kenai sosomi nai valavala dodonu, kei na nomuni caka cala me vakaisosomitaki e na loloma vei ira na dravudravua; de vakadedetaki kina na nomuni tiko vinaka.”

Na Vakamadualaki nei Nepukanesa

²⁸ Sa yaco kece na ka oqo vei Nepukanesa na tui.

²⁹ Sa oti mada e tinikarua na vula sa qai gade voli ko koya e na vale levu ni matanitu vaka-Papiloni.

³⁰ Ka sa kaya na tui, “Sa sega beka ni ko Papiloni levu oqo, ka'u sa tara koi au me vale levu ni matanitu e na noqu kaukauwa levu, ka me sa rogo kina na noqu lagilagi?”

³¹ Ni sa vosataka tiko na vosa oqo ko koya na tui, sa dua na domo sa rogo mai lomalagi, ka kaya: “Sa tukuni vei iko, Nepukanesa na tui, ni sa qai kau tani vei iko na nomu matanitu!

³² Era na vakasavi iko tani mai vei ira na tamata, ia ko na tiko kei ira na manumanu ni vanua. Era na vakani iko e na co me vaka na bulumakau, ka me oti mada vei iko e vitu na gauna, mo kila mada kina ni sa lewa ko Koya sa Cecere Sara na matanitu ni tamata, ka sa solia vua sa lomana kina.”

³³ E na tiki-ni-siga ko ya, sa yaco na ka oqori vei Nepukanesa; ia sa vakasavi tani kina ko koya mai vei ira na tamata, ka sa kana co, me vaka na bulumakau, ka sa suasua talega na yagona e na tegu ni lomalagi, ia na drau ni uluna sa tubu me vaka na lawe ni ikeli, kei na nona i taukuku me vaka nai qaso ni manumanu vuka.

Sa Vakacaucautaki Jiova ko Nepukanesa

³⁴ Ni sa oti na kena gauna, koi au ko Nepukanesa, ka'u a ta cake ki lomalagi, ia sa lesu tale mai vei au na yaloqu, ka'u a qai vakavinavinakataki Koya sa Cecere Sara, io, ko koya sa bula ka sega ni mudu. Ka'u a vakacaucautaka ka vakarokorokotaka, ia sa sega ni mudu na nona lewa, kei na nona matanitu mai na dua nai tabatamata ka yaco ki na dua tale nai tabatamata.

³⁵ Ia na kai vuravura kecega sa nanumi me ra ka wale, ka sa cakava na ka e vinakata ko koya e na kedra maliwa nai vavakoso vakalomalagi, kei ira talega na kai vuravura; ka sa sega e dua e vakadaroya rawa na ligana, se kaya vua, “A cava ko sa cakava?”

³⁶ E na gauna ko ya sa lesu tale mai vei au na yaloqu; ia me rogo kina na noqu matanitu, sa lesu mai vei au na noqu lagilagi kei na noqu serau; ka ra sa mai qaravi au tale ko ira na noqu lewe ni bose, kei ira na noqu tamata turaga; ia ka'u a vakataudeitaki tale e na noqu matanitu ka sa vakaikuritaki vei au na ka vakaturaga sa uasivi cake.

³⁷ Ia koi au ko Nepukanesa, ka'u sa qai vakavinavinakataka ka vakalevulevuya ka vakarokorokotaka na Tui kei lomalagi, ni sa ka dina kecega na nona cakacaka, ka sa dodonu na nona i valavala; ia ko ira era viavialevu voli sa rawa vua me vakamalumalumutaka.