Taniela 3 - Ai Vola Tabu (Vakadewa Makawa Vakavoutaki 2021)

Na Matakau Koula

¹ O Nepukanesa na tui sa cakava e dua na matakau koula, na kena cecere sa onosagavulu na kiupiti, na kena rabailevu sa ono na kiupiti; ka sa vakaduria ko koya e na buca ko Tura, e na yasana vaka-Papiloni.

² Sa qai talaki ko Nepukanesa na tui me ra vakasoqoni ira vata na turaga lelevu, kei ira na kovana, kei ira na kavetani, kei ira na turaga-ni-lewa lelevu, kei ira na dauniyau, kei ira na lewe ni bose, kei ira na vu-ni-vunau, kei ira kece na turaga ni veitikina, me ra lako mai ki na kena veibuli na matakau sa vakaduria ko Nepukanesa na tui.

³ Sa ra qai soqoni vata na turaga lelevu, kei ira na kovana, kei ira na kavetani, kei ira na turaga-ni-lewa, kei ira na dauniyau, kei ira na lewe ni bose, kei ira na vu-ni-vunau, kei ira kece na turaga ni veitikina, ki na kena veibuli na matakau sa vakaduria ko Nepukanesa na tui; ka ra sa mai tu e na mata ni matakau sa vakaduria ko Nepukanesa.

⁴ Sa qai dua na matanivanua sa kacivaka vakadomoilevu, ka vaka ne, “Sa vakaroti vei kemudou, koi kemudou na tamata, na lewe ni veivanua, kei na dui vosavosa,

⁵ ni dou sa rogoca na domo ni koneti, na bitu-ni-vakatagi, na api, na lali e vakawa, na soliteri, na bekipaipo, kei na ka kecega sa rogo vinaka, mo dou qai cuva sobu ka vakarokoroko ki na matakau koula sa vakaduria ko Nepukanesa na tui.

⁶ Ia ko koya sa sega ni cuva sobu ka vakarokoroko ena biu ga e na tiki-ni-siga ko ya ki na loma ni lovo ni bukawaqa.”

⁷ O koya oqo e na tiki-ni-siga ko ya, ni ra rogoca na tamata kecega na domo ni koneti, na bitu-ni-vakatagi, na api, na lali e vakawa, na soliteri, kei na ka kecega sa rogo vinaka, era sa qai cuva sobu kece na tamata, na lewe ni veivanua, kei na dui vosavosa, ka ra sa vakarokoroko ki na matakau koula sa vakaduria ko Nepukanesa na tui.

Eratou sa Beitaki na Jiu e Tolu

⁸ E na tiki-ni-siga ko ya era sa qai toro mai eso na kai Kalitia, ka beitaki ira na Jiu.

⁹ Era kaya vua na tui ko Nepukanesa, “Mo ni bula na tui, ka sega ni mudu!

¹⁰ Kemuni, na tui, ko ni a vakarota vei ira kece na tamata ni ra rogoca na domo ni koneti, na bitu-ni-vakatagi, na api, na lali e vakawa, na soliteri kei na bekipaipo, kei na ka kecega sa rogo vinaka, me ra cuva sobu ga ka vakarokoroko ki na matakau koula.

¹¹ Ia ko koya sa sega ni cuva sobu ka vakarokoroko, me biu ga ki na loma ni lovo ni bukawaqa.

¹² Ia sa so na Jiu ko ni sa lesia me ra vakaitavi e na cakacaka ni yasana vaka-Papiloni, ko Setareki, kei Mesake, kei Apeteniko; ko iratou na tamata oqo eratou sa sega ni vakarorogo vei kemuni, na tui. Ka ni ratou sa sega ni qarava na nomuni kalou, ka sega talega ni vakarokorokotaka na matakau koula ko ni sa vakaduria.”

¹³ Sa qai cudru ka nini ko Nepukanesa ka sa vakarota me ra kauti iratou mai ko Setareki, kei Mesake, kei Apeteniko. Sa ra qai kauti iratou mai na tamata oqo vua na tui.

¹⁴ Sa qai kaya vei iratou ko Nepukanesa, “Sa ka dou a nakita, Setareki, kei Mesake, kei Apeteniko, ni dou a sega ni qarava na noqu kalou, ka ni dou a sega ni vakarokoroko ki na matakau koula ka'u sa vakaduria?

¹⁵ Dou rogoca mada, kevaka dou na vakarau tu e na tiki-ni-siga dou na rogoca kina na domo ni koneti, na bitu-ni-vakatagi, na api, na lali e vakawa, na soliteri, na bekipaipo, kei na ka kecega sa rogo vinaka, mo dou cuva sobu ka vakarokoroko ki na matakau ka'u sa cakava, sa vinaka. Ia, kevaka dou na bese ni vakarokorokotaka, e na tiki-ni-siga ko ya dou na biu ga ki na loma ni lovo ni bukawaqa; ia ko cei na kalou ko ya me na vakabulai kemudou mai na ligaqu?”

¹⁶ Eratou sa qai vosa ko Setareki, kei Mesake, kei Apeteniko, ka kaya vua na tui, “Kemuni Nepukanesa, sa sega ni yaga vei keitou me keitou vosa vei kemuni e na ka oqo.

¹⁷ Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni bukawaqa, ia ena vakabulai keitou mai na ligamuni, na tui.

¹⁸ Ia ke sega, mo ni kila, koi kemuni na tui, ni keitou sa bese ni qarava na nomuni kalou, keitou sa bese talega ni vakarokoroko ki na matakau koula ko ni sa vakaduria.”

Na Lovo Bukawaqa

¹⁹ Sa qai cudru vakalevu sara ko Nepukanesa, ia sa duatani mai nai tovo ni matana vei Setareki, kei Mesake, kei Apeteniko. A sa vakarota ko koya me vakatakatataki na lovo me uasivi cake vakavitu na kena dau katakata.

²⁰ Ia sa kaya ko koya vei ira eso era tamata qaqa sara e na nona mataivalu me ra vesuki Setareki, kei Mesake, kei Apeteniko, ka biuta ki na lovo ni bukawaqa.

²¹ Sa ratou qai dui vauci vata na tamata oqo kei na nodratou kote, kei na nodratou i sulu e loma, kei na nodratou i sala, kei na nodratou i sulu eso, a ratou sa biu ki loma ni lovo ni bukawaqa.

²² Ia ni sa duatani na vosa ni tui, ka sa katakata vakalevu sara na lovo, sa ra mate e na yameyame ni bukawaqa ko ira na tamata era biuti iratou kina ko Setareki, kei Mesake, kei Apeteniko.

²³ Ia ko iratou na tamata tolutolu oqo, ko Setareki, kei Mesake, kei Apeteniko, sa lutu sobu ki na loma ni lovo ni bukawaqa ka vesuki tu.

²⁴ Ia sa qai kidacala ko Nepukanesa na tui, ka sa tucake vakasauri mai, ka kaya vei ira na nona lewe ni bose, “Eda a sega li ni biuta e lewe tolu na tamata ka vesu tu ki na loma ni bukawaqa?” Era kaya vua, “Sa dina saka ga na tui.”

²⁵ Sa qai kaya tale ko koya, “Raica, au sa kunea e lewe va na tamata sa sereki tu, ka ratou lako voli tiko e loma ni bukawaqa, ka sa sega na ca e yacovi iratou; ia na kenai rairai ni kenai kava sa vaka na luve ni Kalou.”

Eratou sa Sereki na Jiu

²⁶ Sa qai toro mai ko Nepukanesa ki na gusu ni lovo bukawaqa, ka kaya ko koya, “I Setareki, kei Mesake, kei Apeteniko, oi kemudou na tamata ni Kalou Cecere Sara, dou curu mada ki tuba ka lako mai ki ke.” Sa qai curu mai ko Setareki, kei Mesake, kei Apeteniko mai na loma ni bukawaqa.

²⁷ Ka ra sa soqoni mai ko ira na turaga lelevu, na kovana kei na kavetani, kei ira na nona lewe ni bose na tui, ka ra sa vakaraici iratou na tamata oqo, sa sega ni kama na yagodratou e na bukawaqa, se coro e dua na drau ni uludratou, se duatani mai na nodratou kote, se boici vei iratou nai boiboi ni bukawaqa.

²⁸ Sa qai kaya ko Nepukanesa, “Me vakacaucautaki ko koya na Kalou i Setareki, kei Mesake, kei Apeteniko, o koya sa tala mai na nona agilosi, ka vakabulai iratou na nona tamata eratou sa vakararavi vua, ka sa vakatanitaka na vosa ni tui, ka sa bese ni solia na yagodratou, me qarava se vakarokoroko vua e dua tale na kalou, na nodratou Kalou duaduaga.

²⁹ O koya oqo sa dua kina na noqu lawa ka'u sa vakatura, ka vaka: Ko ira na tamata, se na vanua, se ko ira na duivosavosa kecega, sa na vosavakacacataka na Kalou i Setareki, kei Mesake, kei Apeteniko, era na tavai bulabula, ia na nodra veivale ena caka mei benubenu: ni sa sega tale na Kalou sa rawata me ia na veivakabulai vakaoqo.”

³⁰ Ia sa qai tosoya cake nai tutu nei Setareki, kei Mesake, kei Apeteniko ko koya na tui e na yasana vaka-Papiloni.