Taniela 12 - Ai Vola Tabu (Vakadewa Makawa Vakavoutaki 2021)

Nai Otioti ni Veika e na Yaco

¹ “Ia e na gauna ko ya, ena tucake ko Maikeli, na turaga levu o koya sa totaki ira na luvedra na kai nomu. Ena qai yaco e dua na gauna rarawa, sa sega sara e vakakina mai nai vakatekivu ni matanitu ka yacova na gauna ko ya. Ia e na gauna ko ya era na vakabulai na kai nomu, ko ira kece sa na kune ni ra volai e nai vola.

² Ia era lewe vuqa vei ira sa moce e na kuvu-ni-soso era na yadra, eso vei ira me ra bula ka sega ni mudu, ka so vei ira me ra madua ka beci ka sega ni mudu.

³ Ia ko ira sa vuku era na serau mai me vaka na rarama kei lomalagi; kei ira era sa saumaki ira na lewe vuqa me ra yalododonu, me vaka na kalokalo ka sega ni mudu.

⁴ Ia ko iko, Taniela, mo maroroya na vosa, ka dregata nai vola, me yaco mada na kenai vakataotioti. Era na veiciciyaki na lewe vuqa, ka na vakalevutaki talega na vuku.

⁵ Ia koi au, ko Taniela, ka'u a vakararai, ka raica, sa lewe rua tale erau wavu tu, e dua e na bati ni uciwai oqo, ka dua e na bati ni uciwai ko ya.

⁶ A sa kaya e dua vua na tamata sa vakaisulu lineni, o koya ka tiko e na uciwai ki cake, “A cava na kena dede me na qai yaco nai otioti ni veika oqo e veivakurabuitaki?”

⁷ Au a qai rogoca na tamata sa vakaisulu lineni ka tiko e na uciwai ki cake, ni sa dulaka ko koya na ligana i matau kei na ligana i mawi ki lomalagi, ka bubului, ka cavuti Koya sa bula ka sega ni mudu, ni na dua na gauna, kei na rua, kei na veimama ni gauna, ka gauna e musuka oti kina ko koya na nodra kaukauwa na tamata tabu, ena qai vakayacori na ka kecega oqo.

⁸ Ia koi au ka'u a rogoca, ia ka'u sa sega ni kila. Au a qai kaya, “Noqu Turaga, a cava ena kenai tinitini na veika oqo?”

⁹ A sa kaya ko koya, “Mo lako ga, Taniela, ni sa maroroi tu ka dregati na vosa me yaco mada nai vakataotioti ni gauna.

¹⁰ Era na lewe vuqa ena vakasavasavataki, ka vakavulavulataki, ka vakatovolei; ia ko ira na tamata ca era na caka ca ga. Ka ra na sega sara ni kila rawa ko ira na tamata ca, ia ko ira sa vuku era na kila rawa.

¹¹ Ia mai na gauna ena kau tani kina nai soro ni veisiga, ka vakaduri cake na ka vakasisila sa dauveivakarusai, ena bogi dua na udolu ka rua na drau ka ciwasagavulu.

¹² Sa kalougata ko koya sa waraka, ka yacova na bogi e dua na udolu ka tolu na drau ka tolusagavulu ka lima.

¹³ Ia ko iko, mo lako ga me yaco mada nai vakataotioti, ni ko na vakacegu, ka tu e na nomu i votavota ni sa yaco na kenai tinitini ni veibogi.