Taniela 11 - Ai Vola Tabu (Vakadewa Makawa Vakavoutaki 2021)

Na Tui ni Ceva (Ijipita) kei na Tui ni Tokalau (Siria)

¹ “Oi au talega, e nai matai ni yabaki i Taraiasi na kai Mitia, ka'u a tu me'u vakataudeitaki koya ka vakaukauwataka.

² “Ia ka'u na qai tukuna vei iko na ka dina. Raica, ena le tolu tale na tui me tui Perisia, ia na kenai kava ena vutuniyau vakalevu vei iratou kecega. Ia ni na kaukauwa ko koya e na vuku ni nona i yau, ena vakauqeti ira kece kina me ra vala kei na matanitu ko Kirisi.

³ Ena qai tubu mai e dua na tui qaqa, ia ena ka levu sara na nona matanitu, ka na veitalia voli talega ko koya.

⁴ Ia ni sa qai tubu cake ko koya, ena qai musuki na nona matanitu, ka na wase va vaka ki na mata ni cagi vava kei lomalagi, ka segai vei ira na nona kawa, ka na sega talega ni tautauvata kei na nona matanitu ka lewa; ni na cavuivuvu na nona matanitu, me nodratou na tani ka sega ni nodra oqori.

⁵ “Ia ena kaukauwa mai ko koya na tui ni ceva, kei na dua talega vei iratou na nona tamata turaga; ia ko koya oqo ena kaukauwa vei rau, ena lewa talega ko koya; ka sa na matanitu levu na nona matanitu.

⁶ Ia ni sa oti na yabaki eso, erau na to vata; kei na luvena yalewa na tui ni ceva ena lako mai vua na tui ni vualiku me ia na veiyalayalati. Ia ena sega ni rawata tikoga ko koya na yalewa na kaukauwa, ka na sega talega ni tiko dei ko ira na kawa ni tui. Ia ena soli ga yani ko koya na yalewa, kei ira ka kauti koya mai, kei na nona kawa, kei koya ka vakacegui koya. “E na gauna ko ya

⁷ ena tubu kina e dua na coke mai na wakana mei sosomi kei koya na tamana, ena lako vata mai ko koya kei na nona mataivalu, ka curuma na nona koro-ni-valu na tui ni vualiku, ka vala kei ira, ka na gumatua.

⁸ Ia ena kauta talega vakabobula ko koya ki Ijipita na nodra kalou, kei na nodra turaga, ena kauta talega na nodra i yaya talei e siliva ka koula, ka na tiko ko koya ka na vuqa na nona yabaki ka lailai na nona yabaki na tui ni vualiku.

⁹ Ia ena la'ki curuma ko koya na nona matanitu na tui ni ceva, ka qai lesu tale ki na nona vanua.

¹⁰ “Ko ira na luvena na tui ni tokalau ena vakauqeti mai, ka vakasoqona vata nai valu era lewe vuqa, ka lako mai me vaka na waluvu ka lako basika yani, ka ia nai valu me yaco sara ki na nona koro-ni-valu.

¹¹ Ia ena yalo ca mai na tui ni ceva, ka na lako mai me mai vala kaya na tui ni vualiku. Ena tuvai ira na lewe levu sara ko koya, ia ko ira na lewe vuqa era na soli ki na ligana.

¹² Ia ni sa kauti ira tani na lewe vuqa ko koya, ena laveti cake na lomana, ka na vakabalea na lewe udolu vakatini, ia ena sega ni kaukauwa kina vakadede ko koya.

¹³ Ni na vakatubura tale na tui ni vualiku e lewe levu, ka ra sa levu cake mai na kena eliu, ka me oti na yabaki eso, ena qai lako yani ko koya kei na mataivalu levu kei nai yau levu.

¹⁴ “Ia e na gauna ko ya ena lewe vuqa era na tucake me ra vala kaya na tui ni ceva. Ko ira talega na kai nomu era yalokaukauwa era na vakalevulevui ira, me ra vakayacora na raivotu, ka ra na bale ga.

¹⁵ Ia ena lako ko koya na tui ni vualiku, ka viri suva, ka kaba na veikoro sa viri bai kaukauwa. Ia nai valu mai na ceva ena sega ni tu rawa, se na nona tamata digitaki, ena sega talega na nodra kaukauwa me ra tu rawa.

¹⁶ Ia ko koya sa mai vala kaya ena vakayacora na lomana, ena sega talega e dua me tu rawa e matana. Ena mai tiko talega ko koya e na vanua matalau, o koya ena vakarusai e na ligana.

¹⁷ Ia ena segata talega ko koya me la'ki curu vata kei na kaukauwa ni nona matanitu taucoko, kei ira vata kaya na tamata dodonu, ena cakacaka vakaoqo ko koya. Ia e dua na gonemarama, me sa vakacacataka, ena solia vua; ia ena sega ga ni tudei kaya, se totaki koya.

¹⁸ Ena qai segata talega na veiyanuyanu, ka na rawa e vuqa. Ia e dua na turaga-ni-valu ena muduka ga e na vukuna na nona dauveivakalialiai; ka vakasuka vua na nona veivakalialiai.

¹⁹ Ena qai vagolea na matana ko koya ki na koro-ni-valu ni nona vanua dina, ia ena tarabe ga ka bale, ka na yali sara.

²⁰ “Ena qai tu me taravi koya e dua na dauvakatadumata vakasaurara ki na veivanua sa uasivi e na matanitu. Ia sa na bogi vica ga ena qai musuki ko koya, ka segai e na cudru, se e nai valu.

²¹ Ena tu me taravi koya e dua na tamata sa na beci ga, a ra na sega ni solia vua na vakarokoroko ni matanitu. Ena lako lo ga mai, ka rawata na matanitu e na dauveicavilaki.

²² Ia e na taba ni dobui era na ceburaki tani kina e matana ka kasere, kei koya talega na turaga ni veiyalayalati.

²³ Ia ni sa mai tovata kaya ena cakacaka vakailasu ga ko koya; ni na lako cake kina ko koya, ka yaco me kaukauwa, ka lewe vica ga na nona tamata.

²⁴ Ena la'ki curu ko koya ki na veiyasana sa sautu ka vutu ni ka, ka cakava na ka eso sa ra sega ni cakava na nona qase, se na tamadra na nona qase; io ena duibiubiuta vei ira ko koya na ka e kovei, kei nai toki-ni-valu, kei nai yau. Io ena vakananuma tiko ko koya ki na veikoro ni valu, ka bogi vica ga.

²⁵ Ia ena uqeta ko koya, na nona kaukauwa, kei na nona qaqa me vala kaya na tui ni ceva kei na nona mataivalu levu; ia na tui ni ceva ena vakauqeti me vala kaya kei na mataivalu levu sara ka kaukauwa; ia ena sega ni tu rawa ko koya, ni ra na vakananuma eso na kena vere me ca kina.

²⁶ Io, ko ira era kania na nona magiti, era na vakarusai koya, ia na nona mataivalu ena vaka na dobui, a ra na bale mate e lewe vuqa.

²⁷ Ia sa na lomadrau ruarua na tui oqo me caka ca, ka rau na vosa lasu tiko ni rau kana vata e na dua na tepeli. Ia ena sega ga ni yaco, ni sa na yaco ga nai vakataotioti e na gauna sa lokuci.

²⁸ Ena qai lesu yani ko koya ki na nona vanua ka sa levu nai yau ena kauta; ia na lomana ena ca ki na veiyalayalati tabu; ena rawa ka, ka lesu tale ki na nona vanua.

²⁹ “E na gauna sa lokuci ena qai lesu tale, ka tadu yani ki na mata ni ceva; ia ena sega ni vaka na nona lako eliu, se nona lako e muri.

³⁰ Ni na mai vala kaya eso na waqa ni Kitimi, ia ena waicala kina ko koya ka lesu, ka cudru ki na veiyalayalati tabu, ka na rawa ka; io ena lesu mai ko koya, ka na golevi ira era biuta na veiyalayalati tabu.

³¹ Ia e dua nai valu ena mai totaki koya, ka ra na vakacacana na tikina tabu e kaukauwa, ka kauta tani nai soro sa ia e na veisiga, ka vakaduria na ka vakasisila sa dauveivakarusai.

³² Ia ko ira eso era sa vakacataka na veiyalayalati, ena vakacacani ira ko koya e na nona dauveicavilaki; ia na tamata era kila na nodra Kalou era na gugumatua, ka rawa ka.

³³ Ia ko ira na tamata yalomatua era na vakavulici ira na lewe vuqa; ia era na bale ga e nai seleiwau, kei na yameyame ni bukawaqa, kei na veivakabobulataki, kei na veikoveraki, ka bogi vuqa.

³⁴ Ia ni ra sa bale, era na vukei vakalailai. Ia ena kabiti ira talega ko ira e lewe vuqa e na dauveicavilaki.

³⁵ Ia eso vei ira era yalomatua era na bale, me vakatovolei ira, ka vakasavasavataka, ka vakavulavulataka, ka yacova nai vakataotioti; ni se bera na gauna sa lokuci.

³⁶ “Ia na tui ena veitalia voli ga; ka na vakaceceretaki koya, ka vakalevulevui koya me uasivi vei ira kece na kalou, io ena cavuta ko koya na ka e veivakurabuitaki vua na nodra Kalou na kalou, ka cakacaka yaco, ka me oti mada na veicudruvi; ni na caka ga na ka sa lesi.

³⁷ Ia ena sega ni via kila ko koya na kalou ni nona qase, se na nodra ka domoni na yalewa, se dua na kalou tani; ni na vakalevulevui koya e na ka kecega ko koya.

³⁸ Ia me kenai sosomi sa na vakarokorokotaka ko koya na kalou ga ni valu. Io ena vakarokorokotaka ko koya na kalou era sa sega ni kila ko ira na nona qase, e na koula, kei na siliva, kei na vatu talei, kei na ka domoni.

³⁹ Ena vaka tu oqo na nona cakacaka e na koro-ni-valu, vua na kalou tani, sai koya ga e na kila ko koya, ka vakalevulevuya e na ka lagilagi, ka na lesi ira me ra nodra turaga na lewe vuqa; ia na vanua, ena vota ko koya me vakaivoli kina.

Nai Vakataotioti ni Gauna

⁴⁰ Ia e nai vakataotioti ni gauna, ena mai valuti koya na tui ni ceva. Ia na tui ni vualiku ena veivakacicivi vua me vaka na covulaca, o koya, kei na qiqi-ni-valu, kei na tamata sa vodo ose, kei na waqa e vuqa; ia ena curuma na vanua eso, ka luvuca, ka lako basika yani.

⁴¹ Ena curuma talega ko koya na vanua matalau. Ka udolu vakatini era na bale, ia ko ira oqo ena bula mai na ligana: ko Itomi, kei Moapi, kei ira ka liu vei ira na luve i Amoni.

⁴² Ena dodoka talega ko koya na ligana ki na veivanua, ia na vanua ko Ijipita ena sega ni dro bula.

⁴³ Ena rawata ko koya nai yau levu, io, na koula kei na siliva, kei na ka domoni kecega ni Ijipita; ia na kai Libiya kei na kai Eciopea ena muria na we ni yavana.

⁴⁴ Ia nai rogorogo mai na tokalau kei na vualiku ena vakidroataki koya. O koya oqo ena lako yani kina e na cudru levu me ia na veivakacacani, ka me vaqeavutaka na lewe vuqa.

⁴⁵ Ena vakaduria na veivale laca ni nona koro vakaturaga e na maliwa ni waitui ruarua e na ulunivanua tabu ka lagilagi. Ia ena yacova na nona i cavacava, ka sega e dua me na vukei koya.