Taniela 10 - Ai Vola Tabu (Vakadewa Makawa Vakavoutaki 2021)

Na Veisaqasaqa ni Matanitu kei na Kaukauwa Vakalomalagi

¹ E nai ka tolu ni yabaki i Sairusi na tui Perisia sa dua na ka sa vakaraitaki vei Taniela, o koya ka vakayacani talega ko Pelitisasari. Ka sa ka dina sara, io sa dua nai valu dede. Ka sa kila na ka oqo ko koya, ka sa macala vua na raivotu.

² Ia koi au ko Taniela, ka'u a tagi tikoga e na gauna ko ya ka tolu sara na macawa.

³ Ka'u a sega ni kania na kakana vinaka, se'u tovolea na lewe ni manumanu se na waini, ka'u a sega talega ni lumulumu, ka me oti mada e tolu na macawa taucoko.

⁴ Ia e nai karuasagavulu ka va na siga, e nai matai ni vula, ni'u a tiko e na bati ni uciwai levu (ko Taikirisi),

⁵ au a qai ta cake, ka vakararai, ka raica, sa dua na tamata sa vakaisulu e nai sulu lineni, ia na tolona sa vauci e na koula dina ni Ufasi.

⁶ A yagona talega sa vaka na perili, kei na matana sa rairai vaka na livaliva, na matana ruarua sa vaka na cina caucaudre e rua, ia na ligana kei na yavana sa vaka na parasa makamakalivata, kei na rorogo ni domona sa vaka na domo ni lewe vuqa.

⁷ Ia koi au duaduaga ko Taniela, ka'u a raica na raivotu; ia ko ira na tamata keitou tiko vata sa ra sega ni raica na raivotu, ia sa tauvi ira na sautaninini levu ka ra sa dro me vunitaki ira.

⁸ Ia koi au ka'u a tiko duaduaga, ka raica na raivotu levu oqo, ia sa sega ni vo vei au na kaukauwa. Ia na noqu vinaka sa vuki me ca, ka sa yali vei au na noqu kaukauwa.

⁹ Ia ka'u a rogoca ga na domo ni nona vosa; ia ni'u a rogoca na rorogo ni nona vosa, ka'u sa moce lutu koto, ka vakanamata ki na qele.

¹⁰ Ka raica, sa qai tarai au e dua na liga, a sa vakaduri au e na duruqu kei na qeteqete ni ligaqu.

¹¹ A sa kaya vei au, “I Taniela, na tamata daulomani, mo kila na vosa ka'u sa tukuna vei iko, ka tucake vakadodonu, ka ni'u sa talai mai vei iko.” Ia ni sa vosataka na vosa oqo vei au ko koya, ka'u sa wavu tu ka sautaninini.

¹² Sa qai kaya vei au ko koya, “Mo kakua ni rere, Taniela, ni sa rogoci na nomu vosa mai na kenai matai ga ni siga ko a vakasara kina na lomamu mo kila, ka vakayalomalumalumutaki iko kina e na mata ni Kalou, ka'u sa lako mai kina koi au e na vuku ni nomu vosa.

¹³ Ia sa vorati au na turaga ni matanitu ko Perisia ka bogi ruasagavulu ka dua. Ka raica, sa lako mai me vukei au ko Maikeli, e dua vei ira na turaga liu, ka'u mani tiko ga yani mai kea kei ira na tui Perisia.

¹⁴ Au sa qai lako mai me'u vakatakila vei iko na ka ena yacovi ira na kai nomu e na gauna mai muri; ni na bogi vuqa mada na raivotu.”

¹⁵ Ia ni sa vosa oti vakaoqo vei au ko koya, ka'u sa vakacuva na mataqu ki na qele, ka'u sa galu tu.

¹⁶ Ka raica, sa dua e rairai vaka e dua vei ira na luve ni tamata sa qai tara na tebenigusuqu. Ka'u a qai dalaga, ka vosa, ka kaya vua sa wavu tu e mataqu, “Noqu turaga, e na vuku ni raivotu sa yaco kina vei au na noqu rarawa, ia sa sega ni vo tiko vei au na kaukauwa.

¹⁷ Ni na rawa vakaevei vei au na nomuni tamata na noqu turaga me'u veivosaki kei kemuni na noqu turaga? Ia koi au, sa sega ga vei au na kaukauwa, sa sega talega ni vo vei au nai cegu.”

¹⁸ A sa qai tarai au tale e dua sa vaka na tamata na kenai rairai, ka sa vakaukauwataki au.

¹⁹ Ka sa kaya, “O iko, na tamata daulomani, kakua ni ko rere. Mo vakacegu, mo kaukauwa ga, io, mo kaukauwa ga mai!” Ia ni sa vosa oti vei au ko koya, ka'u sa qai kaukauwa mai ka kaya, “Mo ni vosa tiko mai, na noqu turaga, ni kemuni sa vakaukauwataki au.”

²⁰ Sa qai kaya ko koya, “O sa kila se cava beka na ka ka'u sa lako mai kina vei iko? Ia oqo, ka'u na lesu tale mada me'u vala kaya na tui Perisia; ia ni'u sa lako yani, raica, ena qai lako mai na tui Kirisi.

²¹ Ia ka'u na tukuna vei iko na ka sa volai e nai vola dina, ka sa sega e dua sa veivuke kei au e na veika oqo, ko Maikeli ga, na nomudou turaga.