Ruci 2 - Ai Vola Tabu (Vakadewa Makawa Vakavoutaki 2021)

Sotavi Poasa ko Ruci

¹ A sa dua na wekai koya na wati Neomai, sa lewe ni vuvale vata kei Elimeleki, a tamata vutuniyau sara, na yacana ko Poasa.

² A sa kaya vei Neomai ko Ruci na yalewa ni Moapi, “Me'u lako mada ki na were, me'u tomitomika na sola ni sila ni ka'u sa muria e dua sa na lomani au.” A sa kaya vua ko koya, “Mo lako ga, na luvequ.”

³ A sa lako yani ko koya, ka vakatotomi e na were ka muri ira era tamusuki sila. Ia ni sa lako voli, a sa yaco ki na tiki ni were sa nei Poasa, o koya ka rau vuvale vata kei Elimeleki.

⁴ Ka raica, sa lako mai Peceliema ko Poasa, a sa kaya vei ira na tamata sa tamusuki sila, “Me tiko vata kei kemudou ko Jiova.” A ra sa kaya vua, “Me vakalougatataki kemuni ko Jiova.”

⁵ A sa kaya ko Poasa vua na nona tamata sa lesi me vakaraici ira era tamusuki sila, “Ko cei beka ka taukena na yalewa oqo?”

⁶ A sa vosa na tamata sa lesi me vakaraici ira era tamusuki sila, ka kaya, “Oqo na yalewa ni Moapi, o koya ka lesu mai kei Neomai mai na vanua ko Moapi.

⁷ A sa kaya ko koya, ‘Me'u vakatotomi mada ka kumukumuna na sila e na maliwa ni veivau sila, ka muri ira era tamusuki sila.’ A sa lako mai ko koya, ka se tiko voli mai na mataka lailai ka yacova mai na gauna oqo, ka se qai vakacegu ga vakalekaleka oqo.”

⁸ Sa qai kaya vei Ruci ko Poasa, “Mo rogoci au mada, na luvequ. Mo kakua ni la'ki vakatotomi sila tale e na were tani se biuta na vanua oqo, ia mo tikotiko ga eke kei ira na noqu goneyalewa.

⁹ Mo raica tikoga na were era sa tamusuki sila kina, ka muri ira tiko. Au sa sega li ni vakaroti ira na cauravou me ra kakua ni tarai iko? Ia ni ko sa viagunu, mo la'ki gunu mai na saqa, mai na ka era sa takiva na cauravou.”

¹⁰ A sa cuva e matana ko Ruci, ka cuva vaka ki na qele, ka sa kaya vua, “E na vuku ni cava ka'u sa kune loloma kina e matamuni, mo ni nanumi au kina, ni'u sa yalewa ni vanua tani?”

¹¹ A sa vosa ko Poasa, ka kaya vua, “Sa tukuni vakavinaka vei au na ka kecega ko sa cakava vua na vugomu ni sa mate na watimu, ka ni ko sa biuta na tamamu kei na tinamu kei na vanua ko a sucu kina, ia ko sa lako mai vei ira na tamata ko a sega ni kila eliu.

¹² Me sauma na nomu cakacaka ko Jiova, ia me vakayacori sara na kemui sau mai vei Jiova na Kalou ni Isireli, o koya ko sa mai vakararavi e ruku ni tabana!”

¹³ Sa qai kaya ko koya, “Me'u kune loloma mada e matamuni, na noqu turaga; ni kemuni sa vakacegui au, ka vosa vakayalololoma vei au na nomuni tamata, ka dina ga ni'u sa sega ni dua vei ira na nomuni tamata dauveiqaravi.”

¹⁴ E na gauna sa ia kina na kana, a sa kaya vua ko Poasa, “Mo toro mai ki ke, ka kania eso na kakana, ka tokoca na kemu e na waini wiwi.” A sa dabe vata ko koya kei ira era tamusuka na sila, ka sa solia vakalevu vua ko koya na sila tavu. A sa kana ko koya, a sa mamau, ka sa vo tale.

¹⁵ Ia ni sa tucake ko koya me vakatotomi, sa vakaroti ira na nona cauravou ko Poasa, ka kaya, “Me qai vakatotomi ko koya e na maliwa talega ni veivau sila, ka dou kakua ni vakatabuya.

¹⁶ Ka mo dou cavuta talega eso, mai na veivau sila, ka vakalutuma me tomika ko koya, ia dou kakua ni vunauca.”

¹⁷ A sa vakatotomi tiko e na were ko koya, ka yakavi mai. A sa samuta na ka sa tomika, a sa volekata e dua na efa na barile.

¹⁸ A sa taura ko koya, ka lako ki na koro. A sa raica ko vugona na ka sa tomika. A sa kauta mai, ka solia vua na ka sa vo ni sa mamau ko koya.

¹⁹ A sa kaya vua ko vugona, “O a vakatotomi mai vei edaidai? Ia ko a cakacaka mai vei? Me kalougata ko koya ka lomani iko.” A sa tukuna ko koya vei vugona se ko cei sa cakacaka kina ko koya. A sa kaya, “Na yacana na tamata ka'u a cakacaka kaya edaidai ko Poasa.”

²⁰ A sa kaya vua na vugona ko Neomai, “Me vakalougatataki ko koya mai vei Jiova, na Kalou yalovinaka sa sega ni dau biuti ira sa bula tiko se ko ira sa mate.” A sa kaya vua ko Neomai, “Sa wekadatou na tamata ko ya, sa dua vei ira na wekadatou dina.”

²¹ A sa kaya ko Ruci na yalewa ni Moapi, “Sa kaya talega vei au ko koya, ‘Mo tiko ga kei ira na noqu cauravou, me yacova ni sa qaravi oti kece sara na tatamusuki.’ ”

²² A sa kaya vei Ruci na vugona ko Neomai, “Sa vinaka, na luvequ, mo dou lako vata kei ira na nona yalewa, de ko na qai sotavi leqa ni ko lako ki na were tani.”

²³ A sa tikotiko ga kei ira na yalewa nei Poasa ko koya me tomitomi me yacova nai cavacava ni gauna ni tamusuki ni barile kei na tamusuki witi; ka rau sa bula vata voli ga kei na vugona.