Osea 7 - Ai Vola Tabu (Vakadewa Makawa Vakavoutaki 2021)

¹ Ni'u a via vakabulai ira na Isireli, sa qai vakavotui mai na caka cala i Ifereimi, kei na ca i Samaria; ni ra sa cakacaka vakailasu, ia sa curu mai na daubutako, ka ra ia na veivakacacani mai tautuba na matadaubutako.

² A ra sa sega ni kaya e lomadra ni ka'u sa nanuma tiko na nodra ca kece. Sa qai vakavolivoliti ira na nodra i valavala, sa tu ga e mataqu.

Na Buki Vere ena Valenitui

³ Era sa vakamarautaki koya na tui e na nodra ca, kei ira na turaga e na nodra vosa lasu.

⁴ O ira kece era sa ia na veibutakoci; era sa vaka na lovo sa vakatakatataka na dauvavi madrai, ka sa sega ni yaga me lewa na kena katakata na dauvavi madrai, mai na kena natuki na madrai me yacova ni sa vakalevenitaki.

⁵ E na siga ni noda tui era sa tauvi mate kina na turaga ni ra katakata e na waini; sa dodoka na ligana ko koya kei ira na dauveivakalialiai.

⁶ Ni ra sa vakarautaka na lomadra me vaka na lovo, ni ra sa lawavaka tiko; sa moce na nodra dauvavi madrai ka sigavaka; e na mataka sa waqa mai ko koya me vaka na bukawaqa caucaudre.

⁷ Era sa katakata kece me vaka na lovo, a ra sa kani ira na nodra turaganilewa; sa bale ko ira kece na nodra tui; sa sega e dua vei ira e masu vei au.

Ko Isireli kei na Veimatanitu

⁸ O ira na Ifereimi, sa ra vakaduavatataki ira kei ira na veimataqali; ko ira na Ifereimi, sa ra keke e sega ni vukici.

⁹ O ira na kai tani era sa kania na nodra kaukauwa, ka ra sa sega ni kila ko ira; io, sa sikasika mai eso na drau ni uludra, a ra sa sega ni kila ko ira.

¹⁰ Ia na nodra viavialevu na Isireli sa tukuni ira e na matanavotu; a ra sa sega ni lesu vei Jiova na nodra Kalou, se vakasaqarai koya e na vuku ni ka kecega oqo.

¹¹ Ia ko ira na Ifereimi era sa vaka na ruve sesewa e sega ni vakayalo; era tagi ga ki Ijipita, era lakovi Asiria.

¹² Ni ra lako, au na tevuka na noqu lawa me rawai ira; au na kauti ira sobu me vaka na manumanu vuka; au na vakanakuitataki ira, me vaka ni sa rogoci e na nodra i soqosoqo.

¹³ E ca ko ira, ni ra sa dro tani vei au! Na ca ga ena rawai ira, ni ra sa talaidredre vei au! E dina, ka'u a vakabulai ira, ia era sa lasutaki au ga.

¹⁴ Era sa sega ni tagi vei au mai na vu ni lomadra, ni ra qoqolou koto e na nodra i davodavo; e na vuku ga ni sila kei na waini era sa soqoni vata kina; ka ra sa vuki tani vei au.

¹⁵ Ia koi au, ka'u a vakavulici ira ka vakaukauwataka na ligadra, ia era sa vakananuma na vere ca vei au.

¹⁶ Era lesu, ka segai vua sa cecere sara; era sa vaka na dakai daulasu; ena bale e nai seleiwau ko ira na nodra turaga e na vuku ni cudru ni yamedra. A ka oqo era na vakalialiai kina e na vanua ko Ijipita.