Osea 2 - Ai Vola Tabu (Vakadewa Makawa Vakavoutaki 2021)

Na Sega ni Yalodina i Isireli, na Nodra Cudruvi kei na Nodra Lomani

¹ Dou kaya vei ira na tacimu, Ko iko Ami; kei ira na tacimu yalewa, Ko iko Ruama.

² “Dou ia na vakamamasu vua na tinamudou, dou vakamasuta— ni sa sega ni watiqu ko koya, koi au talega ka'u sa sega ni watina— me biuta laivi ko koya na nona dautagane mai matana, kei na nona veibutakoci mai na maliwa ni sucuna,

³ de'u na vakaluvawaletaki koya, ka vakavotui koya me vaka e na siga ka sucu kina, ka cakava me vaka na vanua lala, ka soli koya me tautauvata kei na vanua mamaca, ka vakamatei koya e na viagunu.

⁴ Ia ka'u na sega ni lomani ira na luvena, ni ra sa luve ni dauveibutakoci.

⁵ Ni sa ia na dautagane ko tinadra; sa ia nai valavala e veivakamaduataki ko koya ka kunekunetaki ira. Ni sa kaya ko koya, ‘Au na muri ira na noqu i tau; era solia mai na qau madrai kei na mequ wai, na noqu vutika ni sipi kei na noqu laino, na noqu waiwai kei na mequ ka ni gunu.’

⁶ O koya oqo, raica, ka'u na latia kina na nomu sala e na soni; ka viria e dua na bai vatu, me na sega ni kunea rawa ko koya na nona i lakolako.

⁷ Ena cicimuri ira talega ko koya era sa nona i tau, ka sega ni vauci ira; ka na qarai ira ko koya, ka sega ni kunea. Ena qai kaya ko koya, ‘Au na lako ka lesu tale vua na watiqu e liu, ni sa vinaka cake vei au na noqu tiko e liu.’

⁸ Ia na ka oqo sa lecava ko koya, ni sai au ga ka solia vua na sila kei na waini, kei na waiwai, ia ka'u a vakalevutaka vua na siliva, kei na koula, ia era sa vakayagataka vei Peali.

⁹ O koya oqo ka'u na lesu kina, ka kauta tani na noqu sila e na kena gauna, kei na noqu waini e na kena gauna; ka kauta tani na noqu vutika ni sipi kei na noqu laino sa vuni kina na nona luvawale.

¹⁰ Ia oqo ka'u na vakaraitaka na nona lialia e matadra na nona i tau, ena sega talega e dua me kaliraki koya mai na ligaqu.

¹¹ Ia ka'u na vakaotia kecega na nona marau, kei na nona solevu, kei na nona vula vou, kei na nona Siga ni Vakacecegu, kei na nona solevu tabu kecega.

¹² Au na vakacacana talega na nona veivaini, kei na nona veilolo, sa kaya kina ko koya, ‘Sa qau i soli oqo, era solia vei au ko ira na noqu i tau.’ Ia ka'u na cakava ga me veikau, ena kania talega na manumanu ni vanua.

¹³ Au na cudruvaka talega vua na gauna i Peali, ka vakama kina na ka boi vinaka vei ira, ka vakaiukuukutaki koya e na mama ni ucuna kei na nona ka ni ukuuku, ka muri ira na nona i tau, ia sa guilecavi au, sa kaya ko Jiova.

Na Loloma i Jiova vei Ira na Nona Tamata

¹⁴ “Ia ka raica, ka'u na rawai koya, ka kauti koya ki na vanua lala, ka vosavakayalovinaka vua.

¹⁵ Ia ka'u na volia vua na nona veiloga-ni-vaini e muri, kei na buca ko Akori me vu ni nona vakanananu vinaka. Ia ena sere mai kea ko koya, me vaka e na gauna sa goneyalewa kina, ka vaka e na gauna ka lako cake mai kina ko koya mai na vanua ko Ijipita.

¹⁶ “Ia sa kaya ko Jiova e na siga ko ya ko na qai vakatokai au ko ‘Isi’ (Na watiqu), ka sega ni vakatokai au tale, ‘Noqu Peali’ (Noqu turaga).

¹⁷ Ni'u na kauta tani na yacadra na Peali mai na gusuna, ena sega talega ni nanumi na yacadra.

¹⁸ Ia e na siga ko ya ka'u na ia na veiyalayalati e na vukudra, kei na manumanu ni vanua, kei na manumanu vuka, kei na ka sa qasi voli e na qele; ia ka'u na musuka tani mai na vanua na dakai kei nai seleiwau kei nai valu, ka lewa me ra koto sobu e na vakacegu.

¹⁹ Ia ka'u na tauri iko mo watiqu ka sega ni mudu; io, ka'u na tauri iko mo noqu e na yalododonu, kei na lewa dodonu, kei na yalovinaka, kei na yalololoma.

²⁰ Io, ka'u na tauri iko mo noqu e na lomadina; ia ko na kilai Jiova.

²¹ “Ia e na siga ko ya, au na rogoca, sa kaya ko Jiova, au na rogo yani ki na mata-ni-lagi, o koya talega ena rogo yani ki na vuravura;

²² ko vuravura talega ena rogo yani ki na sila, kei na waiwai, kei na waini; ia na ka talega ko ya ena rogo yani ki Jesireli.

²³ Ia ka'u na kaburaki koya e na vanua me noqu. Ka'u na yalololoma vei Sega ni Lomani [Lo-ruama]; au na kaya talega vei Sega ni Noqu Tamata [Lo-ami], ‘Koi kemudou sa noqu tamata’; ka na kaya ko koya, ‘Koi kemuni sa noqu Kalou.’ ”