Osea 13 - Ai Vola Tabu (Vakadewa Makawa Vakavoutaki 2021)

Na Cudru ni Kalou me Baleti Isireli

¹ Ni sa vosa ko Ifereimi, ni sa rere tiko, sa vakalevulevui ko koya e Isireli; ia ni sa caka cala ko koya e na vuku i Peali, sa qai mate.

² Ia oqo, sa ra gumatua tikoga e nai valavala ca ka ra sa cakava me nodra eso na matakau kaukamea, na matakau buli mai na siliva me vaka na nodra vuku, ka sa nodra cakacaka kece sara ga na matai. Sa kainaki e na vukudra, “Ko ira na daucabora na tamata me i soro sa reguca na luve ni bulumakau!”

³ O koya oqo era na vaka kina na malawa ni mataka se vaka na tegu e na mataka caca sa yali totolo, me vaka na qa ni sila sa cagina tani sara e na rara ni samu sila, ka vaka na kubou mai na kenai kuvukuvu.

⁴ Ia koi au ga ko Jiova na nomu Kalou mai na vanua ko Ijipita; ia dou na sega ni kila e dua tale na Kalou, koi au duaduaga, ka sa sega tale nai vakabula, koi au ga.

⁵ Oi au ka'u a kilai iko mai na vanua lala, e na vanua ni dausiga.

⁶ Me vaka na nodra vakani, sa ra mamau vakakina; sa ra mamau, ka ra yaloviavialevu mai; o koya oqo sa ra guilecavi au kina.

⁷ O koya oqo ka'u na tautauvata kina vei ira kei na dua na laione, ka me vaka na lepate e na sala ka'u na yadravi ira.

⁸ Au na tavaki ira me vaka na bea sa yali na luvena, ia ka'u na dresulaka na taga ni utodra; ka kani ira sara mai kea me vaka na laione, a manumanu kila ena dresulaki ira.

⁹ Ko iko ga Isireli, ko sa vu ni nomu rusa; ia sa vu ga vei au na nomu dauniveivuke.

¹⁰ Sa qai tiko evei na nomu tui, me na vakabulai iko e na nomu veikoro kecega, kei ira na nomu turaganilewa, ko a cavuta kina vakaoqo, “Bulia mada vei au e dua na tui ka so na turaga”?

¹¹ Au sa solia vei iko e dua na tui, e na noqu rarawa; ka kauti koya tani, ni'u sa cudru.

¹² Sa tugani tu na caka cala i Ifereimi; sa maroroi tu na nona i valavala ca.

¹³ A rarawa ni yalewa ni sa taratara ena yacovi koya, ia sa gone lialia ko koya; ke sega, ke sa sega ni tiko vakadede e na tikina e basuki mai kina na gone.

¹⁴ Ka'u na sereki ira mai na kaukauwa ni bulubulu; ka'u na vakabulai ira mai na mate. Ko iko mate, sa evei na nomu dauveivakararawataki? Ko iko bulubulu, sa evei na nomu dauveivakarusai? Ena tabonaki ga mai na mataqu na veivutuni.

¹⁵ Ke sa vakaluveni ko koya e na kedra maliwa na tacina, ke na liwa ga na cagi mai na tokalau, na cagi i Jiova mai na vanua lala; ka sa na maca na nona i keli-wai, ka na vakamacari na nona mata-ni-wai. Ena vakacacana ko koya na vale ni yaya kecega sa daudomoni.

¹⁶ Ena vakalalataki ko Samaria, ni sa talaidredre vua na nona Kalou; era na bale e nai seleiwau, a nodra gone lalai era na viritaki ki na vatu, a nodra yalewa talega sa bukete, era na tavalaki.