Osea 12 - Ai Vola Tabu (Vakadewa Makawa Vakavoutaki 2021)

Era sa Vunauci Ruarua na Ifereimi kei na Juta

¹ O ira na Ifereimi era sa kana cagi, io, era sa muria na cagi mai na tokalau; e na veisiga kecega era sa kuria na vosa lasu kei na vakacaca; ka ra sa ia na veiyalayalati kei ira na kai Asiria, a waiwai talega sa kau ki Ijipita.

² Sa dua talega na ka e veiletitaka kei Juta ko Jiova, ia ena cudruvi Jekope ko koya me vaka na nona i valavala, ka na saumi koya me vaka na nona cakacaka.

³ E na kete i tinana sa taura ko koya na bukubuku ni yava i tuakana, ia ni sa kaukauwa ko koya sa gumatua vua na Kalou.

⁴ Io, sa gumatua vei koya na agilosi ko koya, ka sa rawai koya; sa tagi ko koya ka vakamamasu vua; ia sa kunei koya mai Peceli ko koya, ka vosa kina vei keda mai kea.

⁵ Io, ko Jiova na Kalou ni lewevuqa, ko Jiova na yacana e daukilai kina!

⁶ Ia ko iko, mo lesu mai kina vua na nomu Kalou, mo vakabauta nai valavala loloma kei na ka dodonu, ka waraki koya tikoga na nomu Kalou.

⁷ Sa dua na dauveivoli ko koya, ai vakarau ni bibi daulasu sa tu e ligana, sa vinakata me ia na veivakasaurarataki.

⁸ A sa kaya ko Ifereimi, “Au sa vutuniyau ga, au sa rawata ga eso na noqu i yau; e na noqu cakacaka kecega era na sega ni kunea vei au na caka cala mei valavala ca.”

⁹ Ia koi au ko Jiova na nomu Kalou mai na vanua ko Ijipita, ka'u na vakatikori iko tale e na valelaca, me vaka e na siga ni so tabu.

¹⁰ Au a vosa talega e na gusudra na parofita; ia, ka'u a vakalevutaka na raivotu, e na gusudra talega na parofita ka'u a ia na vosa vakatautauvata.

¹¹ Sa tu beka mai Kiliati na caka cala? E dina era sa lasu wale; era sa vakamatea na bulumakau mai Kilikali mei soro; io, na nodra i cabocabo-ni-soro sa vaka nai binibini vatu e na bati ni tova ni veiwere.

¹² A sa dro ko Jekope ki na vanua ko Siria, io, sa ia na veiqaravi ko Isireli me dua kina na watina, ia me rawa e dua na watina sa vakatawa sipi kina ko koya.

¹³ Ia e na dua na parofita sa kauti ira na Isireli mai Ijipita ko Jiova, e na dua talega na parofita sa vakatawai kina.

¹⁴ Sa ra ia na veivakacudrui vakararawa sara ko ira na Ifereimi, ena baleti ira kina na kedra dra, a nodra i rogorogo ca talega ena vakasuka vei ira ko koya na nodra Turaga.