Osea 11 - Ai Vola Tabu (Vakadewa Makawa Vakavoutaki 2021)

Na Loloma ni Kalou vei Ira na Nona Tamata Talaidredre

¹ Ni sa gone ko Isireli, ka'u a lomani koya, ia ka'u a kaciva na luvequ mai Ijipita.

² Na levu ni noqu kacivi ira, na levu ni nodra sa lako tani ga mai vei au; sa ra soro vei ira na Peali, ia era vakama na ka boi vinaka ki na matakau ceuceu.

³ Ia ka'u a vakavulici ira na Ifereimi e na lako, ka taura na ligadra; ia era sega ni kila ni'u a vakabulai ira.

⁴ E na dali ni tamata ka'u a tuberi ira, e nai vau ni loloma. Ia ka'u a vakataki ira era sa laveta nai vau mai na gusudra, ia ka'u a tauca vei ira na kakana.

⁵ Era na sega ni lesu tale ki na vanua ko Ijipita, ia na kai Asiria ena nodra tui ga ni ra bese ni veivutuni.

⁶ Ia nai seleiwau ena tau ki na nodra veikoro, ka vakaotia na tabana, ka kania, e na vuku ni ka era bosea.

⁷ Ia na noqu tamata era sa gu ga me ra vuki tani vei au. Ni ra kacivi ira me ra lako mai vua sa Cecere, ia sa sega e dua sa vakacaucautaki koya.

⁸ Au na laivi iko vakaevei, i Ifereimi? Au na soli iko yani vakaevei, i Isireli? Au na soli iko vakaevei mo tautauvata kei Atima? Au na vakayacori iko vakaevei mo tautauvata kei Sepoimi? Sa duatani mai na yaloqu e lomaqu; sa tubu sara mai na noqu dauloloma.

⁹ Au na sega ni vakayacora na noqu cudru katakata; au na sega ni lesu tale me'u vakarusai Ifereimi; ni'u sa Kalou, ka'u sega ni tamata, sai au na Yalosavasava e na kemudou maliwa, ia ka'u na sega ni cudruva na nodra veikoro.

¹⁰ Era na muri Jiova, ena qai tagi ko koya me vaka na laione; ni sa tagi ko koya, era na qai lako rerere mai ko ira na luvena mai na ra.

¹¹ Era na lako rerere mai Ijipita me vaka na manumanu vuka, ka vaka na ruve mai na vanua ko Asiria; ia ka'u na vakaitaukeitaki ira tale e na nodra veivale, sa kaya ko Jiova.

¹² Sa ra vakavolivoliti au e na lasu ko ira na Ifereimi, kei na vale i Isireli talega e na veivakaisini; ia ko ira na Juta sa ra lewa vata tiko kei na Kalou, ka sa lomadina vua sa Yalosavasava sara.