Osea 1 - Ai Vola Tabu (Vakadewa Makawa Vakavoutaki 2021)

¹ A vosa i Jiova sa yaco vei Osea na luve i Pieri, e na gauna i Usaia, kei Jocame, kei Easi, kei Esekaia, ko iratou na tui Juta, kei na gauna i Jeropoama na luve i Joasa, na tui Isireli.

Na Vuvale i Osea

² Oqo nai vakatekivu ni vosa i Jiova vei Osea. Sa kaya ko Jiova vei Osea, “Mo la'ki kauta e dua na yalewa dautagane me watimu, kei iratou na luve ni butako me luvemu: ni sa dautagane vakalevu na lewe-ni-vanua, ka ni ra sa vuki tani vei Jiova.”

³ A sa lako ko koya ka kauti Komera na luve i Tipileimi; a sa kunekune ko koya, ka vakasucuma e dua na luvena tagane.

⁴ A sa kaya vua ko Jiova, “Mo vakayacani koya ko Jesireli; ni sa vo vakalailai, ka'u na qai cudruvaka na dra i Jesireli ki na vale i Jeu, ka vakaotia na matanitu ni vale i Isireli.

⁵ Ia ena yaco e na siga ko ya, ka'u na musuka na dakai i Isireli e na buca ko Jesireli.”

⁶ A sa kunekune tale ko koya, ka vakasucuma e dua na luvena yalewa. A sa kaya vua ko Koya, “Mo vakayacani koya ko Lo-ruama, ni'u na sega ni lomani ira tale na vale i Isireli se vosoti ira.

⁷ Ia ka'u na lomani ira na vale i Juta, ka vakabulai ira e na liga i Jiova na nodra Kalou, ia ka'u na sega ni vakabulai ira e na dakai, se nai seleiwau, se nai valu, se na ose, se vei ira era dauvodo ose.”

⁸ Ia ni sa kali Lo-ruama ko koya, sa qai kunekune tale, ka sa vakasucuma e dua na luvena tagane.

⁹ A sa kaya ko Jiova, “Mo vakayacani koya ko Lo-ami, ni dou sa sega ni noqu tamata, ia koi au ka'u sa sega talega ni nomudou Kalou.”

Sa Vakalesui ka Vakacokotaki Tale ko Isireli

¹⁰ Ia na kedrai wiliwili na Isireli ena vaka na mata ni nuku ni waitui, sa sega ni vakarautaki se wili rawa; ia ena yaco, e na yasana ka kainaki kina vei ira, “Dou sa sega ni noqu tamata,” ena kainaki kina vei ira, “Dou sa luve ni Kalou bula.”

¹¹ Era na qai soqoni vata na Juta kei na Isireli, ka ra na lesia e dua me liutaki ira, ka ra na lako cake mai na vanua, ni na levu na siga i Jesireli.