NA SAME 99 - Ai Vola Tabu (Vakadewa Makawa Vakavoutaki 2021)

Me Dokai na Kalou na Tui Cecere

¹ Sa lewa ko Jiova; me ra sautaninini na veimatanitu! Sa tiko e na maliwa ni Jerupi; me yavavala ko vuravura!

² Sa levu ko Jiova mai Saioni; ka cecere vei ira na lewe ni veimatanitu.

³ Me ra vakavinavinaka ki na yacamuni levu ka rerevaki; sa yalosavasava ko koya.

⁴ A sa kaukauwa na tui ka sa lomana na lewa dodonu; o ni sa vakataudeitaka na ka dodonu; o ni sa vakayacora na lewa kei na cakacaka dodonu e Jekope.

⁵ Dou vakalevulevui Jiova na noda Kalou, ka cuva ki nai tutu-ni-yavana; sa yalosavasava ko koya!

⁶ O Mosese kei Eroni sa maliwai ira na nona bete, kei Samuela sa maliwai ira era sa masuta na yacana. Era sa masuti Jiova, a sa vakarorogo vei ira ko koya.

⁷ Sa vosa vei ira ko koya e na duru o; era sa vakabauta na nona vunau, kei nai lesilesi sa solia vei ira.

⁸ O ni a vakarorogo vei ira, i Jiova, na neimami Kalou; oi kemuni na Kalou ko ni sa dauvosoti ira ga, ia ko ni a sauma talega na nodra i valavala.

⁹ Dou vakalevulevui Jiova na noda Kalou, ka cuva e na nona ulunivanua tabu; ni sa yalosavasava ko Jiova na noda Kalou.