NA SAME 92 - Ai Vola Tabu (Vakadewa Makawa Vakavoutaki 2021)

A Sere ni Vakavinavinaka vua na Kalou

A Same. A Sere me baleta na Siga ni Vakacecegu.

¹ A ka vinaka me ia na vakamolimoli vei Jiova, ka me seretaka na vakavinavinaka ki na yacamuni, oi Kemuni sa Cecere Sara;

² me dautukuna na nomuni yalololoma e na mataka, kei na nomuni lomadina e na veibogi,

³ e na qiriqiri e tini na kena wa, kei na soliteri, kei na api e domo vinaka.

⁴ Ni kemuni sa vakamarautaki au, i Jiova, e na nomuni cakacaka; au na rekitaka na cakacaka ni ligamuni.

⁵ I Jiova, sa ka levu na nomuni cakacaka! A ka titobu na nanuma ni lomamuni!

⁶ A tamata yalovakamanumanu sa sega ni kila, kei na tamata lialia sa sega ni vuku rawa e na ka oqo:

⁷ ni ra sa tubu me vaka na co ko ira nai valavala ca, ka sa bulabula na daucaka ca, sa ka ga me ra kawaboko laivi,

⁸ ia koi kemuni, i Jiova, sa cecere sara ka sega ni mudu.

⁹ Ni ra na rusa laivi vakaidina, i Jiova, ko ira na nomuni meca; ka ra na dui vakasevi tani ko ira kecega na daucaka ca.

¹⁰ Ia na noqu i leu ko na laveta cake me vaka nai leu ni iunikoni; au na lumuti e na waiwai vou.

¹¹ Ia ena raici ira na noqu meca na mataqu, ka rogoca na daligaqu ni ra rusa na tamata i valavala ca era tucake me ra vakacacani au.

¹² Ena bulabula na yalododonu me vaka na vuni niu-sawa; ena tubu tiko me vaka na sitari mai Lepanoni.

¹³ O ira era tei e na vale i Jiova era na bulabula e na lomanibai ni noda Kalou.

¹⁴ Era na vuavuai tiko ni ra sa qase mai; era na drokadroka ka bulabula,

¹⁵ me vakatakila ni sa yalododonu ko Jiova; a noqu uluvatu ko koya, ka sa sega vua na caka cala.