NA SAME 85 - Ai Vola Tabu (Vakadewa Makawa Vakavoutaki 2021)

A Masu me Vakalesui Tale Mai na Yalololoma ni Kalou

Vua nai liuliu. A Same vei ira na luve i Kora.

¹ I Jiova, o ni sa yalovinaka ki na nomuni vanua; o ni sa kauti ira tale mai na Jekope era a vakabobulataki.

² O ni sa vosota na nodra caka ca na nomuni tamata; o ni sa buluta na nodra i valavala ca kecega. Sela

³ O ni sa vakasuka lesu na nomuni cudru kecega; o ni sa gole tani mai na nomuni cudru waqawaqa.

⁴ Mo ni lesu mai vei keimami, na Kalou na neimami vakabula, ka mo ni cegu ni cudruvi keimami tiko.

⁵ Ena sega beka ni mudu na nomuni cudru vei keimami? O ni na vakadedetaka beka na nomuni cudru me yacova nai tabatamata kecega?

⁶ O ni na sega beka ni vakabulabulataki keimami tale; me ra reki tale e na vukumuni na nomuni tamata?

⁷ Mo ni vakatakila, Jiova, vei keimami na nomuni yalololoma, ka mo ni solia vei keimami na bula mai vei kemuni.

⁸ Au na rogoca na ka ena kaya mai na Kalou ko Jiova, ni na tauca na vosa ni veivakacegui vei ira na nona tamata, kei ira na nona yalododonu, ia me ra kakua ni lesu tale ki na ka lialia.

⁹ E dina sa voleka na nona vakabulai ira era sa rerevaki koya, me lagilagi tiko kina na noda vanua.

¹⁰ Sa veitavaki na loloma kei na dina; sa veireguci na yalododonu kei na veivinakati.

¹¹ Ena tubu ga e vuravura na ka dina, ka na rai sobu mai lomalagi na ka dodonu.

¹² Io, ena solia ko Jiova na ka vinaka; ena vuataka talega na vuata na noda vanua.

¹³ Ena liutaki koya na cakacaka dodonu, ka kauti keda ki na sala sa lako kina ko koya.