NA SAME 83 - Ai Vola Tabu (Vakadewa Makawa Vakavoutaki 2021)

A Masu me Cudruvi Ko Ira na Meca i Isireli

A Sere. A Same i Esava.

¹ Mo ni kakua ni galu, na Kalou; mo ni kakua ni tiko lo, mo ni kakua ni tiko wale, na Kalou!

² Raica, era sa ue na nomuni meca; Ka ra sa viavialevu ko ira era sa cati kemuni.

³ Era sa buki kedra vere na nomuni tamata, ka bose vakaca e na vukudra na tamata ko ni sa vakaruruga.

⁴ Era sa kaya, “Me da mai vakawabokotaki ira me ra kakua ni dua na matanitu; me kakua ni nanumi tale na yaca i Isireli.”

⁵ Ni ra sa lomavata me ra bose vata; era sa veiyalayalati me ra saqati kemuni—

⁶ na veivalelaca i Itomi kei Isimeli, kei Moapi kei ira na Akiri,

⁷ kei Kipali, kei Amoni, kei Amaleki, na kai Filisitia kei ira na kai Taia;

⁸ Sa duavata talega kei ira ko Asiria; era sa vukea na luve i Loti. Sela

⁹ Mo ni cakacaka vei ira me vaka vei ira na kai Mitiani, me vaka vei Sisera, kei Japini, mai na uciwai ko Kisoni,

¹⁰ era a rusa mai Edoa, ka ra sa yaco me vaka na de-ni-manumanu e na vanua.

¹¹ Mo ni cakava na nodra turaga me ra vakataki Orepi, kei Siepi, ia na nodra turaga kecega me vakataki Sepa kei Salimuna,

¹² ko iratou ka kaya, “Tou taura me nodatou na veika e nona na Kalou.”

¹³ Noqu Kalou, mo ni vakayacori ira me ra vaka na covulaca, me ra vaka na vu-ni-sila e na mata ni cagi.

¹⁴ Me vaka sa tavuna na veikau na bukawaqa, ka sa vakacaudreva na veiulunivanua na yameyame ni bukawaqa,

¹⁵ mo ni vakacacani ira vakakina e na nomuni cava ka vakadomobulataki ira e na nomuni cava levu.

¹⁶ Mo ni vakamaduataka vakalevu na matadra, me ra qarava kina na yacamuni, Jiova.

¹⁷ Me ra vakamaduataki ka taqaya tikoga; Ia me ra vakamaduataki, ka kawaboko.

¹⁸ Me ra kila ko ira na tamata ni sai kemuni na yacamuni ga ko JIOVA, sa cecere sara duaduaga e vuravura taucoko.