NA SAME 80 - Ai Vola Tabu (Vakadewa Makawa Vakavoutaki 2021)

A Masu me Vakacokonakitaki Tale ko Isireli

Vua nai liuliu: me vaka na Lili, a Veiyalayalati. A nei Esava. A Same.

¹ Mo ni vaqara daligamuni, na nodra i vakatawa na Isireli; oi kemuni ko ni a tuberi ira na Josefa me vaka na qele ni sipi! Oi kemuni ka tiko e na maliwa ni Jerupi, mo ni cila mai

² e na mata i Ifereimi kei Penijamini kei Manasa. Mo ni uqeta na nomuni kaukauwa, ka mai vakabulai keimami!

³ Mo ni vakalesui keimami tale, na Kalou; me cilavi keimami na matamuni; ia keimami na bula kina.

⁴ I Jiova, na Kalou-ni-lewevuqa, a cava na kena dede ni kemuni na cudruva tiko na nodra masu na nomuni tamata?

⁵ O ni sa vakani ira e na madrai wai ni mata, ka vagunuvi ira vakalevu e na wai ni matadra.

⁶ O ni sa laivi keimami me ka e dauveiletitaki vei ira era voleka vei keimami; ka ra sa dredre vakataki ira ko ira na neimami meca.

⁷ Kemuni na Kalou-ni-lewevuqa, mo ni vakalesui keimami tale; me cilavi keimami na matamuni; ia keimami na bula kina.

⁸ O ni a kauta mai e dua na vaini mai Ijipita; o ni sa biuta tani na veimatanitu, ka qai tea.

⁹ O ni a vakarautaka na kena vanua; o ni a cakava me ti sobu na wakana, ka sa robota na vanua.

¹⁰ Sa ruguya na veiulunivanua na kena yaloyalo, kei na tabana sa vaka na sitari levu;

¹¹ sa teteva na waitui na tabana lelevu, kei na uciwai na tabana lalai.

¹² A cava ko ni sa qai basuka kina na kena bai, a ra sa vetia tiko ko ira kecega era sa lako voli e na sala?

¹³ Sa vakacacana na vuaka ni veikau, ka sa kana kina na manumanu kila ni vanua.

¹⁴ Kemuni na Kalou-ni-lewevuqa, keimami sa vakamamasu mo ni lesu mada mai; mo ni rai sobu mai lomalagi, ka raica, ka taleva na vaini oqo,

¹⁵ ka vakaruruga na ka sa tea na ligamuni matau, kei na luvemuni ko ni a vakaukauwataka me nomuni.

¹⁶ Sa visa e na bukawaqa, sa ta sobu; era sa rusa ni sa vunauci ira na matamuni.

¹⁷ Ia me tu na ligamuni vua na tamata sa lesia na ligamuni matau, vei koya na luve ni tamata ko ni sa vakaukauwataka me nomuni.

¹⁸ Keimami na qai sega kina ni lesu tani mai vei kemuni; mo ni vakabulabulataki keimami, keimami na masuta kina na yacamuni.

¹⁹ I Jiova na Kalou-ni-lewevuqa, mo ni vakalesui keimami tale; me cilavi keimami na matamuni; ia keimami na bula kina.