NA SAME 7 - Ai Vola Tabu (Vakadewa Makawa Vakavoutaki 2021)

Na Kere Veivuke mai vei Ira na Dauveivakacacani

A same i Tevita ni sa vakasavi, sa sere vei Jiova ko koya, e na vuku ni vosa i Kusa na luve i Penijamini.

¹ I Jiova noqu Kalou, au sa vakararavi vei kemuni; maroroi au mai vei ira kecega era sa vakasavi au, ka mo ni vakabulai au,

² de dresulaka vakalaione na yaloqu; ka dresulaka vakamatailalai, ka sega e dua me mai vakabula.

³ I Jiova na noqu Kalou, kevaka ka'u a kitaka na ka oqo; kevaka sa tu e na ligaqu na ca,

⁴ kevaka ka'u a saumi koya e na ca keirau a tiko vinaka kaya, (Ia, ka'u a vakabulai koya sa noqu meca ni sa sega na vuna,)

⁵ me qai vakasava na yaloqu na meca, ka vauca, io, me buturaka na noqu bula ki na soso, ka vakotora na noqu totoka ki na kuvu-ni-soso. Sela

⁶ I Jiova, ni tucake e na nomuni cudru; vakalevui kemuni cake e na vuku ni nodra cudru na noqu meca; mo ni yadra e na vukuqu me yaco na lewa ko ni a vosa kina.

⁷ Ena qai vakavolivoliti kemuni kina na lewe ni veivanua, e na vukudra ga mo ni lesu tale kina ki cake.

⁸ Ena lewai ira na tamata ko Jiova; mo ni lewai au, Jiova, me vaka na noqu yalododonu kei na noqu lomadina ka tu vei au.

⁹ Me oti laivi mada na nodra ca na tamata ca; ia mo ni vakataudeitaka na yalododonu, ni sa vakatovolea na yalo kei na ivi ni tamata, na Kalou yalododonu.

¹⁰ A noqu i vakaruru na Kalou, o koya sa vakabulai ira era sa yalododonu.

¹¹ Sa lewai ira na tamata yalododonu na Kalou, a sa cudru na Kalou e na veisiga kecega vei ira na tamata i valavala ca.

¹² Kevaka sa sega ni saumaki mai, ena vagatara ko koya na nona i seleiwau; sa kaloca oti na nona dakai-titi, ka vakarautaka,

¹³ sa vakarautaka talega vua nai yaragi ni mate; ena kitaka na nona gasau me kedra na dauveivakasavi.

¹⁴ Raica, sa yaluma e na ka ca, a sa kunekunetaka na ka rarawa sara, ka sa vakasucuma na lasu.

¹⁵ Sa kelia e dua nai keli ka vakalalagataka, a sa qai lutu ki nai keli ka cakava.

¹⁶ Ena taleva na uluna na nona veivakararawataki, ia na nona dauveivakacacani ena lutuka na nona qavokavoka.

¹⁷ Au na vakavinavinaka vei Jiova me vaka na nona yalododonu, au na seretaka na vakamolimoli ki na yaca i Jiova sa Cecere Sara.