NA SAME 64 - Ai Vola Tabu (Vakadewa Makawa Vakavoutaki 2021)

A Masu ni Kere Veitaqomaki

Vua nai liuliu ni sere. A Same i Tevita.

¹ Mo ni rogoca na domoqu, na Kalou, e na noqu masu; mo ni maroroya na noqu bula me'u kakua ni rerevaka na meca.

² Vunitaki au mai na nodra vere lo na daucaka ca, kei na nodra ue na daucaka cala,

³ o ira era sa vagatara na yamedra me vaka nai seleiwau, era sa navuca na nodra dakai me vanataka na nodra gasau, na vosa gaga,

⁴ me ra vanai koya lo sa sega ni cala; era vanavana vakidacala vua, ka ra sega ni rere.

⁵ Era vakayaloqaqataki ira e na ka ca; era bose me ra biri dai lo, ni ra sa kaya, “O cei ena kunei ira?”

⁶ Era sa vakasaqara na ka ca, ka kaya, “Keitou sa qarava rawa na vakasaqaqara vagumatua.” Ni sa ka titobu sara na nanuma ni lomadra kei na yalodra na tamata.

⁷ Ia na Kalou ena vanai ira e na gasau; era na vakamavoataki vakasauri.

⁸ Era na vukica na yamedra me lauti ira vakai ira; era na dro tani ko ira kece sa raici ira.

⁹ Ka ra na rere na tamata kecega; ka tukuna na cakacaka ni Kalou, ka ra na nanuma vakavuku ki na nona cakacaka.

¹⁰ Era na rekitaki Jiova ka vakararavi vua ko ira na yalododonu. Ka ra na vakavinavinaka ko ira kecega na yalodina.