NA SAME 61 - Ai Vola Tabu (Vakadewa Makawa Vakavoutaki 2021)

Vakataudeitaki Na Nona Veimaroroi na Kalou

Vua nai liuliu: kei nai yaya ni vakatagi vaka-wa. A nei Tevita.

¹ Mo ni rogoca, na Kalou, na noqu tagi; ni vakarorogo ki na noqu masu.

² Ni sa luvuci na lomaqu, ka'u na tagi vei kemuni mai nai yalayala kei vuravura. Mo ni tuberi au ki na uluvatu sa cecere vei au;

³ ni kemuni sa noqu i vakaruru eliu, na noqu koro kaukauwa, mai vua na meca.

⁴ Au na tiko ga e na nomuni vale ka sega ni mudu, au na vakararavi e na ruku ni tabamuni. Sela

⁵ Ni kemuni sa rogoca oti, na Kalou, na noqu bubului; ko ni sa solia vei au na nodra i votavota era rerevaki kemuni.

⁶ O ni na vakabalavutaka na nona bula na tui; kei na nona yabaki, ena vaka nai tabatamata e vuqa.

⁷ Ena tiko ga e na mata ni Kalou ka sega ni mudu; mo ni vakayacora na loloma kei na dina, me rau vakabulai koya tiko.

⁸ Me'u vakacaucautaka kina na yacamuni ka sega ni mudu, me'u vakayacora kina e na veisiga na ka ka'u sa bubului kina.